Bugu Ya Vhuvhili Ya Dzikhosi 15:1-38
15 Nga ṅwaha wa vhu 27 hu tshi khou vhusa Yerobeamu* khosi ya Isiraele, Asaria*+ murwa wa Amatsia+ khosi ya Yuda a vha khosi.+
2 O vha e na miṅwaha ya 16 musi a tshi vha khosi, o vhusa Yerusalema miṅwaha ya 52. Mme awe o vha a tshi pfi Yekolia wa Yerusalema.
3 O bvela phanḓa a tshi ita zwo lugaho phanḓa ha Yehova, u fana na khotsi awe Amatsia.+
4 Naho zwo ralo, ho ngo thutha fhethu ha vhurabeli,+ vhathu vho vha vha tshi kha ḓi ṋekedza zwiṱhavhelo, vha tshi kha ḓi dubisa zwiṱhavhelo henefho fhethu ha vhurabeli.+
5 Yehova a rwa khosi nga ṱhamu, ya vha na mapele+ u swika i tshi fa; yo vha i tshi dzula kha nnḓu i re thungo,+ ngeno Yothamu+ murwa wa khosi a tshi langa nnḓu,* a tshi haṱula vhathu vha shango.+
6 Mafhungo oṱhe a Asaria+ na zwoṱhe zwe a ita, naa a zwo ngo ṅwaliwa buguni ya mafhungo a zwifhingani zwa kale zwa mahosi a Yuda?
7 Asaria a vhulungwa na vhomakhulukuku+ wawe Muḓini wa Davida; murwa wawe Yothamu a vha khosi vhudzuloni hawe.
8 Nga ṅwaha wa vhu 38 hu tshi khou vhusa Asaria+ khosi ya Yuda, Sakaria+ murwa wa Yerobeamu a vha khosi kha ḽa Isiraele e Samaria, o vhusa miṅwedzi ya rathi.
9 O bvela phanḓa a tshi ita zwi sa takadzi Yehova, u fana na zwe zwa itwa nga vhomakhulukuku wawe. Ho ngo litsha zwivhi zwe muṱa wa Yerobeamu murwa wa Nebatha a ita uri Vhaisiraele vha zwi ite.+
10 Shalumu murwa wa Yabese a mu itela tshimbevha, a mu vhulayela+ ngei Yibiliamu.+ Musi o no mu vhulaya, a vha khosi vhudzuloni hawe.
11 Mafhungo oṱhe a Sakaria, o ṅwaliwa buguni ya mafhungo a zwifhingani zwa kale zwa mahosi a Isiraele.
12 Zwenezwo zwo ita uri hu itee zwe Yehova a zwi vhudza Yehu a tshi ri: “Vhaḓuhulu vhau vha ḓo dzula kha khuluṋoni ya Isiraele u vhuya u swika kha murafho wa vhuṋa.”+ Zwa itea nga yeneyo nḓila.
13 Shalumu murwa wa Yabese o vha khosi nga ṅwaha wa vhu 39 hu tshi khou vhusa Usia+ khosi ya Yuda, o vhusa ṅwedzi woṱhe e Samaria.
14 Menaheme murwa wa Gadi o ḓa a tshi bva Thiritsa+ a ya Samaria, a vhulaya Shalumu+ murwa wa Yabese ngei Samaria. Musi o no mu vhulaya, a vha khosi vhudzuloni hawe.
15 Mafhungo oṱhe a Shalumu na tshimbevha tshe a tshi ita, zwo ṅwaliwa buguni ya mafhungo a zwifhingani zwa kale zwa mahosi a Isiraele.
16 Ndi nga tshenetsho tshifhinga he Menaheme a bva Thiritsa a ḓa a vutshela muḓi wa Tifisa na vhoṱhe vha re khawo na vha re shangoni ḽi re tsini nawo, ngauri a wo ngo mu vulela dzikhoro. O u vutshela, vhafumakadzi vho vhifhaho muvhilini a vha vula dzithumbu.
17 Nga ṅwaha wa vhu 39 hu tshi khou vhusa Asaria khosi ya Yuda, Menaheme murwa wa Gadi a vha khosi kha ḽa Isiraele, a vhusa miṅwaha ya fumi e Samaria.
18 O bvela phanḓa a tshi ita zwi sa takadzi Yehova. Ho ngo litsha zwivhi zwe Yerobeamu murwa wa Nebatha a ita uri Vhaisiraele vha zwi ite,+ misini yawe yoṱhe.
19 Puli khosi ya Asuri+ a ḓa kha ḽeneḽo shango, Menaheme a ṋea Puli talente* dza 1 000 dza siḽiva nge a mu tikedza uri a khwaṱhise muvhuso wawe.+
20 Menaheme o kuvhanganya yeneyo siḽiva ye a i wana kha vhanna vha vhaḓivhalea na vho pfumaho vha Isiraele.+ A ṋea khosi ya Asuri shekele* dza 50 a tshi itela munna muṅwe na muṅwe. Nga zwenezwo, khosi ya Asuri i si dzule kha ḽeneḽo shango ya vhuyelela shangoni ḽa hayo.
21 Mafhungo oṱhe a Menaheme+ na zwoṱhe zwe a ita, naa a zwo ngo ṅwaliwa buguni ya mafhungo a zwifhingani zwa kale zwa mahosi a Isiraele?
22 Menaheme a vhulungwa na vhomakhulukuku wawe; murwa wawe Pekaya a vha khosi vhudzuloni hawe.
23 Nga ṅwaha wa vhu 50 hu tshi khou vhusa Asaria khosi ya Yuda, Pekaya murwa wa Menaheme a vha khosi ya ḽa Isiraele e Samaria, a vhusa miṅwaha mivhili.
24 O bvela phanḓa a tshi ita zwi sa takadzi Yehova. Ho ngo litsha zwivhi zwe Yerobeamu murwa wa Nebatha a ita uri Vhaisiraele vha zwi ite.+
25 Peka+ mulangammbi wawe murwa wa Remalia a mu itela tshimbevha, a mu vhulayela ngei Samaria mutsheṱoni wo khwaṱhaho wa nnḓu* ya khosi e na Arigobo na Ariye. O vha e na vhanna vha 50 vha Giḽiada; musi o no mu vhulaya, a vha khosi vhudzuloni hawe.
26 Mafhungo oṱhe a Pekaya na zwoṱhe zwe a ita, zwo ṅwaliwa buguni ya mafhungo a zwifhingani zwa kale zwa mahosi a Isiraele.
27 Nga ṅwaha wa vhu 52 hu tshi khou vhusa Asaria khosi ya Yuda, Peka+ murwa wa Remalia a vha khosi ya ḽa Isiraele e Samaria, o vhusa miṅwaha ya 20.
28 O bvela phanḓa a tshi ita zwi sa takadzi Yehova, ho ngo litsha zwivhi zwe Yerobeamu murwa wa Nebatha a ita uri Vhaisiraele vha zwi ite.+
29 Misini ya Peka khosi ya Isiraele, Thigilatha-pilesere+ khosi ya Asuri a ḓa a vutshela na u thuba muḓi wa Iyoni, Abele-bethe-maaka,+ Yanoha, Kedese,+ Hatsoro, Giḽiada+ na Galilea, shangoni ḽoṱhe ḽa Nafutali,+ a dzhia vhadzulapo a vha isa vhuthubwani ngei Asuri.+
30 Hoshea+ murwa wa Elaa a itela Peka murwa wa Remalia tshimbevha, a mu vhulaya; a vha khosi vhudzuloni hawe nga ṅwaha wa vhu 20 hu tshi khou vhusa Yothamu+ murwa wa Usia.
31 Mafhungo oṱhe a Peka na zwoṱhe zwe a ita, zwo ṅwaliwa buguni ya mafhungo a zwifhingani zwa kale zwa mahosi a Isiraele.
32 Nga ṅwaha wa vhuvhili hu tshi khou vhusa Peka murwa wa Remalia khosi ya Isiraele, Yothamu+ murwa wa Usia+ khosi ya Yuda a vha khosi.
33 O vha e na miṅwaha ya 25 musi a tshi vha khosi, o vhusa miṅwaha ya 16 Yerusalema. Mme awe o vha a tshi pfi Yerusa ṅwana wa Tsadoko.+
34 O bvela phanḓa a tshi ita zwo lugaho phanḓa ha Yehova, u fana na khotsi awe Usia.+
35 Naho zwo ralo, ho ngo thutha fhethu ha vhurabeli, vhathu vho vha vha tshi kha ḓi dubisela midzimu yavho zwiṱhavhelo henefho fhethu ha vhurabeli.+ Ndi ene we a fhaṱa khoro ya nṱha ya nnḓu ya Yehova.+
36 Mafhungo oṱhe a Yothamu na zwe a ita, naa a zwo ngo ṅwaliwa buguni ya mafhungo a zwifhingani zwa kale zwa mahosi a Yuda?
37 Misini yeneyo Yehova a ruma Retsini khosi ya Siria na Peka+ murwa wa Remalia uri vha ye u lwa na Yuda.+
38 Yothamu a vhulungwa na vhomakhulukuku wawe Muḓini wa Davida makhulukuku wawe. Murwa wawe Ahasi a vha khosi vhudzuloni hawe.
Ṱhaluso dzi re magumoni a siaṱari
^ Ndi Yerobeamu wa Vhuvhili.
^ Zwine zwa amba uri “Yehova O Thusa.” U vhidzwa Usia kha 2Dz 15:13; 2Krk 26:1-23; Yes 6:1; na Sak 14:5.
^ Kana “pfamo.”
^ Talente i lingana na khilogramu dza 34,2. Sedzani Ṱhume. B14.
^ Shekele nthihi i lemela gramu dza 11,4. Sedzani Ṱhume. B14.
^ Kana “pfamo.”
