Bugu Ya Vhuvhili Ya Dzikhosi 16:1-20
16 Nga ṅwaha wa vhu 17 hu tshi khou vhusa Peka murwa wa Remalia, Ahasi+ murwa wa Yothamu khosi ya Yuda a vha khosi.
2 Ahasi o vha e na miṅwaha ya 20 musi a tshi vha khosi, o vhusa miṅwaha ya 16 Yerusalema. Ho ngo ita zwo lugaho phanḓa ha Yehova Mudzimu wawe, ho ngo edzisa Davida makhulukuku wawe.+
3 Nṱhani hazwo, o tevhedza zwe zwa itwa nga mahosi a Isiraele,+ a ita na u posa murwa wawe muliloni,+ a mu ita tshiṱhavhelo,* a tshi tevhedza maitele a nengisaho a tshaka dze Yehova a dzi pandela phanḓa ha Vhaisiraele.+
4 O dzula a tshi ṋekedza zwiṱhavhelo na u dubisa zwiṱhavhelo fhethu ha vhurabeli,+ zwikwarani na nga fhasi ha miri yoṱhe mihulu.+
5 Ndi nga tshenetsho tshifhinga he Retsini khosi ya Siria na Peka murwa wa Remalia khosi ya Isiraele, vha ḓa vha lwa na Yerusalema.+ Vha tanga Ahasi, fhedzi vha si kone u thuba muḓi.
6 Nga tshenetsho tshifhinga, Retsini khosi ya Siria ya vhuyedzedza muḓi wa Elatha+ kha Vhaedomo, nga murahu ya pandela Vhayuda* uri vha bve Elatha. Vhaedomo vha dzhena Elatha, vha dzula henefho u swika na ṋamusi.
7 Ahasi a ruma vhaḓinḓa uri vha ye ha Thigilatha-pilesere+ khosi ya Asuri, vha ri: “Ndi mushumeli wau, ndi murwa wau. Iḓa u nndamulele zwanḓani zwa khosi ya Siria na zwanḓani zwa khosi ya Isiraele, vhane vha khou lwa na nṋe.”
8 Ahasi a dzhia siḽiva na musuku zwe zwa vha zwi nḓuni ya Yehova na mbulungeloni dza nḓuni* ya khosi a rumela tshanḓanguvhoni kha khosi ya Asuri.+
9 Khosi ya Asuri ya tenda, ya gonya Damaseko ya u thuba, ya isa vhathu vha wonoyo muḓi vhuthubwani ngei Kiri,+ ya vhulaya Retsini.+
10 Khosi Ahasi a ya a ṱangana na Thigilatha-pilesere khosi ya Asuri ngei Damaseko. Musi a tshi vhona aḽeṱare ye ya vha i Damaseko, Khosi Ahasi a rumela tshifhe Uriya pulane ya aḽeṱare, ine ya sumbedza nḓila ye ya itwa ngayo.+
11 Tshifhe Uriya+ a fhaṱa aḽeṱare+ u ya nga ndaela dzoṱhe dze Khosi Ahasi a mu rumela dzone e ngei Damaseko. Tshifhe Uriya a fhedza u i fhaṱa Khosi Ahasi a sa athu u vhuya Damaseko.
12 Musi khosi i tshi vhuya Damaseko ya vhona hu na aḽeṱare, ya ya khayo, ya ṋekedza tshifhiwa khayo.+
13 Ya bvela phanḓa i tshi ṋekedza zwifhiwa zwayo zwa u fhiswa na zwifhiwa zwayo zwa thoro zwi dubiswaho kha yeneyo aḽeṱare, ya dovha ya ṋekedza zwifhiwa zwayo zwa u nwiwa na u hasha malofha a zwiṱhavhelo zwayo zwa u pfumedzana khayo.
14 Ya pfulusa aḽeṱare ya koporo+ ye ya vha i phanḓa ha Yehova ya bva vhudzuloni hayo phanḓa ha nnḓu, vhukati ha aḽeṱare yawe na nnḓu ya Yehova, ya i vhea thungo ya devhula ha aḽeṱare yawe.
15 Khosi Ahasi a laya tshifhe Uriya+ a ri: “U dubise tshifhiwa tsha u fhiswa tsha nga matsheloni kha aḽeṱare khulwane,+ u dovhe u ṋekedze tshifhiwa tsha thoro tsha nga madekwana,+ tshifhiwa tsha u fhiswa tsha khosi na tshifhiwa tshawe tsha thoro, zwifhiwa zwa u fhiswa, zwifhiwa zwa thoro na zwifhiwa zwa u nwiwa zwa vhathu vhoṱhe. U dovhe u shashe malofha oṱhe a zwifhiwa zwa u fhiswa khayo na malofha oṱhe a zwiṅwe zwiṱhavhelo. Nṋe ndi ḓo elekanya nga zwine nda ḓo zwi ita nga aḽeṱare ya koporo.”
16 Tshifhe Uriya a ita zwoṱhe zwe Khosi Ahasi a mu laedza zwone.+
17 Zwiṅwe hafhu, Khosi Ahasi a bvisa zwitibo zwi re nga matungo ha zwigoloi+ a dovha a bvisa na masambelo azwo,+ a tsitsa sambelo ḽihulu ḽi vhidzwaho Lwanzhe ḽo vhewaho nṱha ha mboho dza koporo dzo ḽi tikaho,+ a ḽi vhea muṱani wo itwaho nga matombo.+
18 Fhethu ho fulelwaho he ha vha hu tshi shumiswa nga Savhatha he ha fhaṱwa ngomu nḓuni na muṋango wa khosi a zwi bvisa nḓuni ya Yehova; o ita zwenezwo nga nṱhani ha khosi ya Asuri.
19 Mafhungo oṱhe a Ahasi na zwe a ita, naa a zwo ngo ṅwaliwa buguni ya mafhungo a zwifhingani zwa kale zwa mahosi a Yuda?+
20 Ahasi a vhulungwa na vhomakhulukuku wawe Muḓini wa Davida; murwa wawe Hiskia*+ a vha khosi vhudzuloni hawe.
Ṱhaluso dzi re magumoni a siaṱari
^ Thevhedz., “a ita uri murwa wawe a pfuke mulilo.”
^ Kana “vhanna vha Yuda.”
^ Kana “pfamoni.”
^ Zwine zwa amba uri “Yehova U A Ṋea Maanḓa.”
