Bugu Ya Vhuvhili Ya Dzikhosi 2:1-25
2 Musi Yehova a tshi vho ṱoḓa u takusela Elia+ ṱaḓulu* nga ḓumbu,+ Elia na Elisha+ vha ya Giligala.+
2 Elia a amba na Elisha a ri: “Ndi khou humbela uri u sale fhano, ngauri Yehova o nthuma uri ndi ye Bethele.” Fhedzi Elisha a ri: “Ndi ana nga Yehova a tshilaho na nga iwe, ndi nga si u ṱutshele.” Vha tsela Bethele.+
3 Vharwa vha vhaporofita* vha ngei Bethele vha ḓa vha vhudzisa Elisha vha ri: “Naa u a zwi ḓivha uri ṋamusi Yehova u ḓo u dzhiela muṋe wau a si tsha vha murangaphanḓa wau?”+ Elisha a fhindula a ri: “Ndi a zwi ḓivha. Fhumulani.”
4 Elia a amba nae a ri: “Elisha, ndi khou humbela uri u sale fhano, ngauri Yehova o nthuma uri ndi ye Yeriko.”+ Fhedzi Elisha a ri: “Ndi ana nga Yehova a tshilaho na nga iwe, ndi nga si u ṱutshele.” Vha ya Yeriko.
5 Vharwa vha vhaporofita vha re Yeriko vha ḓa vha vhudzisa Elisha vha ri: “Naa u a zwi ḓivha uri ṋamusi Yehova u ḓo u dzhiela muṋe wau a si tsha vha murangaphanḓa wau?” Elisha a fhindula a ri: “Ndi a zwi ḓivha. Fhumulani.”
6 Elia a amba nae a ri: “Ndi khou humbela uri u sale fhano, ngauri Yehova o nthuma uri ndi ye Yorodane.” Fhedzi Elisha a ri: “Ndi ana nga Yehova a tshilaho na nga iwe, ndi nga si u ṱutshele.” Vha ṱuwa vhoṱhe.
7 Na vharwa vha vhaporofita vha 50 vha tevhela, vha lavhelesa vho ima kulenyana musi vhuvhili havho vho ima Mulamboni wa Yorodane.
8 Elia a dzhia tshiambaro tshawe+ a tshi peta, a rwa maḓi, maḓi a fhandekana a ya thungo ya tsha monde na thungo ya tsha u ḽa, vhoṱhe vha pfuka nga ho omaho.+
9 Musi vha tshi tou wetshela seli, Elia a amba na Elisha a ri: “Nkhumbele zwine wa ṱoḓa ndi tshi u itela zwone ndi sa athu u dzhiiwa.” Elisha a ri: “Ndi khou humbela uri u nṋee mikovhe mivhili*+ ya muya wau.”+
10 Elia a fhindula a ri: “Wo nkhumbela zwithu zwi konḓaho. Arali wa mmbona musi ndi tshi khou dzhiiwa, u ḓo ṋewa; arali wa sa mmbona, a u nga ṋewi.”
11 Musi vha tshi khou tshimbila vha tshi khou amba, vha ṱavhanya vha fhandekanywa nga gariki na bere zwe zwa vha zwi tshi penya sa mulilo,+ Elia a gonyela ṱaḓulu* e ḓumbuni.+
12 Musi Elisha o lavhelesa, o vha a tshi khou vhidzelela a tshi ri: “Khotsi anga, khotsi anga! Vhona, gariki dza Isiraele na vhaṋameli vha bere dzawe!”+ Musi a si tsha dzi vhona, a fara zwiambaro zwawe a zwi kherukanya nga vhukati.+
13 Nga murahu ha zwenezwo a doba tshiambaro+ tsha Elia tshe a tshi wisa a ṱuwa a ya a ima khunzi-khunzini ya Mulambo wa Yorodane.
14 A doba tshiambaro tsha Elia tshe a vha o tshi wisa a rwa maḓi ngatsho a ri: “Yehova Mudzimu wa Elia u ngafhi?” Musi a tshi rwa maḓi, maḓi a fhandekana a ya thungo ya tsha monde na thungo ya tsha u ḽa, Elisha a wetshela seli.+
15 Musi vharwa vha vhaporofita vha ngei Yeriko vha tshi mu vhona a tshee kulenyana, vha ri: “Muya wa Elia u kha Elisha.”+ Vha ya vha mu ṱanganedza, vha gwadama phanḓa hawe.
16 Vha amba nae vha ri: “Riṋe vhashumeli vhau ri na vhanna vha 50 vha faneleaho. Ri khou humbela uri vha ṱuwe vha ye u ṱoḓa muṋe wau. Khamusi muya wa Yehova wo mu takulela nṱha wa mu posa kha iṅwe ya dzithavha kana kha ḽiṅwe ḽa magovha.”+ Fhedzi Elisha a ri: “Ni songo vha ruma.”
17 Naho zwo ralo, vha mu kombetshedza u swika a tshi farwa nga ṱhoni, a ri: “Vha rumeni.” Vha ruma vhanna vha 50, vha mu ṱoḓa lwa maḓuvha mararu, fhedzi vha si mu wane.
18 Musi vha tshi humela khae, vha mu wana e Yeriko.+ A amba navho a ri: “Naa a tho ngo ni vhudza uri ni songo ya?”
19 Nga u ya ha tshifhinga vhanna vha wonoyo muḓi vha amba na Elisha vha ri: “Muṋe wanga u khou zwi vhona uri uyu muḓi wo dzula fhethu havhuḓi;+ fhedzi maḓi awo a si avhuḓi, shango a ḽi khou bveledza tshithu.”*
20 A ri: “Nḓiseleni tshigoḓelo tshiswa, ni shele muṋo nga ngomu.” Vha mu ḓisela tshone.
21 A ya tshisimani a shela muṋo khatsho,+ a ri: “Yehova u ri, ‘Ndo ilafha aya maḓi. Ha tsha ḓo vhulaya kana u ita uri shango ḽi si bveledze tshithu.’”*
22 Eneo maḓi a ilafhea u swika na ṋamusi, samusi Elisha o vha o amba.
23 A gonya Bethele. Musi e nḓilani vhaṅwe vhatukana vha bva muḓini vha mu kolela vha ri:+ “Gonya iwe ralupanḓane! Gonya iwe ralupanḓane!”
24 A rembuluwa a vha sedza, a vha sema nga dzina ḽa Yehova. Zwivhingwi zwivhili+ zwa bva ḓakani zwa vhulaya vhana vha 42.+
25 A ṱuwa henefho Thavhani ya Karamele,+ u bva henefho a vhuyelela Samaria.
Ṱhaluso dzi re magumoni a siaṱari
^ Kana “lutomboni.”
^ “Vharwa vha vhaporofita” zwi vhonala zwi tshi khou ambela kha tshikolo tsha u gudisa vhaporofita kana kha tshigwada tsha vhaporofita.
^ Kana “zwipiḓa zwivhili.”
^ Kana “lutomboni.”
^ Kana khamusi, “a ita uri vhafumakadzi vho vhifhaho muvhilini vha tshinyalelwe.”
^ Kana khamusi, “u ita uri vhafumakadzi vho vhifhaho muvhilini vha tshinyalelwe.”
