Bugu Ya Vhuvhili Ya Dzikhosi 20:1-21
20 Misini yeneyo Hiskia a lwala lwe a ṱoḓou fa.+ Muporofita Yesaya murwa wa Amotsi a ḓa a amba nae a ri, “Yehova u ri: ‘Onesana* na muṱa wau, ngauri u ḓo fa; a u nga fholi.’”+
2 Hiskia a rembuluwa a lavhelesa luvhondo, a thoma u rabela Yehova a ri:
3 “Yehova, ndi humbela uri u humbule nḓila ye nda u shumela ngayo nga u fhulufhedzea na nga mbilu yoṱhe, ndo ita zwine zwa u takadza.”+ Hiskia a lila nga maanḓa.
4 Yesaya o vha a sa athu u swika muṱani wa vhukati musi Yehova a tshi amba nae a ri:+
5 “Huma u ye u vhudze Hiskia, murangaphanḓa wa vhathu vhanga u ri, ‘Yehova Mudzimu wa Davida makhulukuku wau u ri: “Thabelo yau ndo i pfa. Na miṱodzi yau ndo i vhona.+ Ndi ḓo u fhodza.+ Nga ḓuvha ḽa vhuraru u ḓo gonya nḓuni ya Yehova.+
6 Ndi ḓo engedza vhutshilo* hau nga miṅwaha ya 15, ndi ḓo tshidza iwe na wonoyu muḓi zwanḓani zwa khosi ya Asuri,+ ndi ḓo tsireledza wonoyu muḓi ndi tshi itela dzina ḽanga na mushumeli wanga Davida.”’”+
7 Yesaya a ri: “Ḓisani khekhe ya mahuyu.” Vha i ḓisa, vha i ḓodza* kha tshilonda, a fhola nga zwiṱuku nga zwiṱuku.+
8 Hiskia o vha o vhudzisa Yesaya uri: “Ndi tshifhio tshiga+ tsha u sumbedza uri Yehova u ḓo mphodza na uri ndi ḓo gonya nḓuni ya Yehova nga ḓuvha ḽa vhuraru?”
9 Yesaya a fhindula a ri: “Tshiga tshi bvaho kha Yehova tsha u sumbedza uri Yehova u ḓo ita zwe a amba ndi hetshi: Naa u ṱoḓa murunzi u re kha zwiṱepisi* u tshi ya phanḓa nga maga a fumi kana u funa u tshi ya murahu nga maga a fumi?”+
10 Hiskia a ri: “Zwi a leluwa uri murunzi u ye phanḓa nga maga a fumi, fhedzi zwi a konḓa uri u humele murahu nga maga a fumi.”
11 Muporofita Yesaya a vhidzelela Yehova, Mudzimu a ita uri murunzi u re zwiṱepisini zwa Ahasi u humele murahu nga maga a fumi musi wo no tsa zwiṱepisini.+
12 Nga tshenetsho tshifhinga, khosi ya Babele Berodaka-baladani murwa wa Baladani a rumela marifhi na tshifhiwa kha Hiskia ngauri o zwi pfa uri o vha a tshi khou lwala.+
13 Hiskia a vha ṱanganedza,* a vha sumbedza nnḓu yawe yoṱhe ye a vha o vhulunga khayo lupfumo lwawe,+ siḽiva, musuku, mapfura a baḽisamu na maṅwe mapfura a mutengo muhulu, fhethu hawe he a vha a tshi vhulunga zwiṱhavhane na zwoṱhe zwine zwa wanala mbulungeloni dzawe. A hu na na tshithihi tshe Hiskia a si vha sumbedze nḓuni* yawe na kha muvhuso wawe woṱhe.
14 Muporofita Yesaya a ḓa kha Khosi Hiskia a vhudzisa a ri: “Vhaḽa vhanna vho ri mini, vha bva ngafhi?” Hiskia a ri: “Vha bva shangoni ḽa kule ngei Babele.”+
15 A dovha a vhudzisa a ri: “Vho vhona mini nḓuni* yau?” Hiskia a ri: “Vho vhona zwoṱhe zwi re nḓuni* yanga. A hu na tshe ndi si vha sumbedze kha mbulungelo dzanga.”
16 Yesaya a amba na Hiskia a ri: “Ipfa zwine Yehova a amba,+
17 ‘Hu ḓo ḓa maḓuvha ane zwoṱhe zwi re nḓuni* yau na zwoṱhe zwe vhomakhulukuku wau vha zwi vhulunga u swika ṋamusi zwa ḓo iswa Babele.+ A hu na na tshithihi tshine tsha ḓo sala,’ u ralo Yehova.
18 ‘Vhaṅwe vha vharwa vhau vhane wa ḓo vha beba vha ḓo dzhiiwa,+ vha vha vhaḓinḓa pfamoni ya khosi ya Babele.’”+
19 Hiskia a amba na Yesaya a ri: “Mulaedza wa Yehova we wa u amba ndi wavhuḓi.”+ A dovha a ri: “Ndi zwavhuḓi arali hu tshi ḓo vha na mulalo na vhudziki* ndi tshi kha ḓi tshila.”*+
20 Mafhungo oṱhe a Hiskia, mishumo yawe yoṱhe i sumbedzaho u vha na maanḓa na nḓila ye a fhaṱa ngayo damu+ na migero ya u ḓisa maḓi miḓini,+ naa a zwo ngo ṅwaliwa buguni ya mafhungo a zwifhingani zwa kale zwa mahosi a Yuda?
21 Hiskia a vhulungwa na vhomakhulukuku wawe;+ murwa wawe Manase+ a vha khosi vhudzuloni hawe.+
Ṱhaluso dzi re magumoni a siaṱari
^ Kana “Dzudzanya.”
^ Thevhedz., “maḓuvha.”
^ Kana “phupha.”
^ Khamusi zwenezwi zwiṱepisi zwi shumiswa u vhalela tshifhinga, u fana na tshishumiswa tsha u sumbedza tshifhinga musi ḓuvha ḽo ṱavha.
^ Kana “pfamoni.”
^ Kana “thetshelesa.”
^ Kana “pfamoni.”
^ Kana “pfamoni.”
^ Kana “pfamoni.”
^ Thevhedz., “maḓuvhani anga.”
^ Kana “ngoho.”
