Bugu Ya Vhuvhili Ya Dzikhosi 21:1-26
21 Manase+ o vha e na miṅwaha ya 12 musi a tshi vha khosi, o vhusa miṅwaha ya 55 e Yerusalema.+ Mme awe o vha a tshi pfi Hefitsiba.
2 O ita zwi sa takadzi Yehova, o tevhedza maitele a nengisaho a tshaka+ dze Yehova a dzi pandela phanḓa ha vhathu vha Isiraele.+
3 O fhaṱulula fhethu ha vhurabeli he khotsi awe Hiskia a hu thutha,+ a fhaṱela Baali aḽeṱare a ita na thanda khethwa,*+ u fana na zwe zwa itwa nga Ahaba khosi ya Isiraele.+ A gwadamela mavhuthu oṱhe a ṱaḓulu, a a shumela.+
4 O dovha a fhaṱa dziaḽeṱare nḓuni ya Yehova,+ fhethu he Yehova a vha o ri: “Ndi ḓo vhea dzina ḽanga ngei Yerusalema.”+
5 O fhaṱela mavhuthu oṱhe a ṱaḓulu dziaḽeṱare+ miṱani mivhili ya nnḓu ya Yehova.+
6 O posa murwa wawe muliloni; o ita zwa manditi, zwa madambi,+ a vhea mingome na vhane vha bvumba.+ O ita zwi sa takadzi Yehova nga ho kalulaho, a mu sinyusa.
7 A vhea tshifanyiso tsho vhaḓwaho tsha thanda khethwa*+ nḓuni ye Yehova a amba nga hayo na Davida na murwa wawe Salomo a ri: “Kha heyi nnḓu na ngei Yerusalema, he nda hu nanga kha tshaka dzoṱhe dza Isiraele ndi ḓo vhea dzina ḽanga lini na lini.+
8 A thi tsha ḓo dovha nda tendela milenzhe ya Vhaisiraele i tshi tendeleka kule na shango ḽe nda ḽi ṋea vhomakhulukuku wavho,+ arali vha tevhedza nga vhuronwane zwoṱhe zwe nda vha laya,+ Mulayo woṱhe we Mushe mushumeli wanga a vha laya uri vha u tevhedze.”
9 Fhedzi a vho ngo thetshelesa, Manase a bvela phanḓa a tshi vha xedza, a ita uri vha ite vhuvhi vhuhulu vhu fhiraho ha tshaka dze Yehova a dzi fhelisa phanḓa ha Vhaisiraele.+
10 Yehova o bvela phanḓa a tshi amba a tshi shumisa vhashumeli vhawe vha vhaporofita+ a ri:
11 “Manase khosi ya Yuda o ita zwenezwi zwithu zwoṱhe zwi nengisaho; o ita vhuvhi vhune ha fhira ha Vhaamori vhoṱhe+ vhe vha tshila a sa athu u vha hone,+ o ita uri Vhayuda vha ite tshivhi nga midzimu yawe ya zwifanyiso i nengisaho.*
12 Zwe Yehova Mudzimu wa Isiraele a zwi amba ndi hezwi: ‘Ndi ḓo ḓisela Yerusalema+ na Yuda khombo ine ya ḓo ita uri nḓevhe dza ane a zwi pfa dzi ṱhoṱhone.+
13 Muḓi wa Yerusalema ndi ḓo u kala nga luṱale+ lwe nda kala ngalwo muḓi wa Samaria,+ nda shumisa tshishumiswa tsha u kala* tshe nda tshi shumisa kha nnḓu ya Ahaba,+ ndi ḓo swiela Yerusalema ha sala ho kuna, samusi muthu a tshi kunakisa tshigoḓelo, a tshi phumula a tshi tiba.+
14 Ndi ḓo ṱutshela masalela a maḽaifa anga+ nda a kumedzela maswina ao, vha ḓo thubiwa nga maswina avho oṱhe+
15 ngauri vho ita zwi sa ntakadzi, vha bvela phanḓa vha tshi ntsinyusa u bva nga ḓuvha ḽe vhomakhulukuku wavho vha bva Egipita u swika na ṋamusi.’”+
16 Manase o dovha a shulula malofha manzhi a vhathu vha si na mulandu a ḓadza muḓi woṱhe wa Yerusalema,+ hu sa vhalwi tshivhi tshe a ita uri ḽa Yuda ḽi ite tshivhi nga u ita zwi sa takadzi Yehova.
17 Mafhungo oṱhe a Manase na zwoṱhe zwe a ita na zwivhi zwe a zwi ita, naa a zwo ngo ṅwaliwa buguni ya mafhungo a zwifhingani zwa mahosi a Yuda?
18 Manase a vhulungwa na vhomakhulukuku wawe, a vhulungwa tsimuni ya nḓuni yawe, tsimuni ya Usa;+ murwa wawe Amoni a vha khosi vhudzuloni hawe.
19 Amoni+ o vha e na miṅwaha ya 22 musi a tshi vha khosi, o vhusa miṅwaha mivhili e Yerusalema.+ Mme awe o vha a tshi pfi Meshulemethe ṅwana wa Harutsi wa ngei Yotoba.
20 O bvela phanḓa a tshi ita zwi sa takadzi Yehova, u fana na zwe zwa itwa nga khotsi awe Manase.+
21 O bvela phanḓa a tshi tshimbila nḓilani dzoṱhe dza khotsi awe, o bvela phanḓa a tshi shumela na u gwadamela midzimu ya zwifanyiso i nengisaho ye khotsi awe a i shumela.+
22 Nga zwenezwo, a ṱutshela Yehova Mudzimu wa vhomakhulukuku wawe, a si tshimbile nḓilani ya Yehova.+
23 Mafheleloni vhashumeli vha Amoni vha mu itela tshimbevha, vha mu vhulayela nḓuni yawe.
24 Fhedzi vhathu vha ḽeneḽo shango vha vhulaya vhoṱhe vhe vha itela Khosi Amoni tshimbevha, vha vhea murwa wawe Yosia uri a vhe khosi vhudzuloni hawe.+
25 Mafhungo oṱhe a Amoni na zwoṱhe zwe a ita, naa a zwo ngo ṅwaliwa buguni ya mafhungo a zwifhingani zwa kale zwa mahosi a Yuda?
26 Vha mu vhulunga vhiḓani ḽawe tsimuni ya Usa,+ murwa wawe Yosia+ a vha khosi vhudzuloni hawe.
Ṱhaluso dzi re magumoni a siaṱari
^ Sedzani Mutevhe Wa Ṱhalutshedzo Ya Maipfi.
^ Sedzani Mutevhe Wa Ṱhalutshedzo Ya Maipfi.
^ Ipfi ḽine ḽa amba zwenezwi ḽa Tshihevheru ḽi tshimbidzana na ipfi “vhutoko” nahone ḽi shumiswa sa mubulo wa u goḓa.
^ Kana “tshishumiswa tsha u kala tshi re na luṱale.”
