Bugu Ya Vhuvhili Ya Dzikhosi 23:1-37
23 Khosi ya rumela mulaedza, vha vhidza vhahulwane vhoṱhe vha Yuda na vha Yerusalema.+
2 Nga murahu, khosi ya ya nḓuni ya Yehova i na vhanna vhoṱhe vha Yuda, vhadzulapo vhoṱhe vha Yerusalema, vhotshifhe, vhaporofita, vhathu vhoṱhe u bva kha muṱuku u swika kha muhulwane. Ya vhala mafhungo oṱhe a re buguni+ ya mulanga+ ye ya waniwa nḓuni ya Yehova+ vhathu vhoṱhe vha tshi zwi pfa.
3 Khosi ya ima tsini na phuphu, ya vhofha mulanga* phanḓa ha Yehova+ uri i ḓo tevhela Yehova, ya tevhedza ndaela dzawe, khumbudzo dzawe na milayo yawe yoṱhe nga mbilu yayo yoṱhe na nga zwoṱhe zwine ya vha zwone nga u tevhedza maipfi a hoyu mulanga wo ṅwaliwaho kha heyi bugu. Vhathu vhoṱhe vha tendelana na wonoyu mulanga.+
4 Khosi ya laya tshifhe muhulu Hilikia,+ vhotshifhe vha re nga fhasi hawe na vhalindi vha miṋango uri vha bvise thundu dzoṱhe dzo itelwaho Baali, thanda khethwa*+ na mavhuthu oṱhe a ṱaḓulu thembeleni ya Yehova. Ya zwi fhisa nnḓa ha Yerusalema tsini na zwikwara zwa Kidironi, ya hwala miḽora yazwo ya i isa Bethele.+
5 Ya pandela vhotshifhe vha midzimu ya mazwifhi, vhe vha vhewa nga mahosi a Yuda uri vha dubise zwiṱhavhelo fhethu ha vhurabeli u mona na miḓi ya Yuda na u mona na Yerusalema, na vha dubiselaho Baali zwiṱhavhelo, u dubisela ḓuvha, u dubisela ṅwedzi, u dubisela zwigwada zwa dziṋaledzi na u dubisela mavhuthu oṱhe a ṱaḓulu.+
6 Ya bvisa thanda khethwa*+ nḓuni ya Yehova ya dzi isa nnḓa ha Yerusalema, Govhani ḽa Kidironi, ya dzi fhisela henefho+ Govhani ḽa Kidironi ya dzi kuya dza vha buse ya ḽi hasha kha mavhiḓa a vhathu zwavho.+
7 Ya dovha ya thutha nnḓu dza vhanna vhane vha rengisa muvhili thembeleni,+ vha re nḓuni ya Yehova na fhethu he vhafumakadzi vha vha vha tshi lukela hone madennde a thanda khethwa.*
8 Ya bvisa vhotshifhe vhoṱhe muḓini wa Yuda, ya thutha fhethu ha vhurabeli he vhotshifhe vha vha vha tshi dubisela hone zwiṱhavhelo, u bva Geba+ u swika Beresaba.+ Ya dovha ya thutha fhethu ha vhurabeli he ha vha hu muṋangoni wa khoro ya Yoshua muhulwane wa muḓi, he ha vha hu nga thungo ya tsha monde ya muṋango wa khoro ya muḓi.
9 Vhotshifhe vha fhethu ha vhurabeli vho vha vha sa shumi aḽeṱareni ya Yehova ngei Yerusalema,+ fhedzi vho vha vha tshi ḽa vhurotho vhu si na mbiliso khathihi na vhahavho.
10 Ya fhelisa na vhurabeli ha Thofethe,+ he ha vha vhu tshi itwa ngei Govhani ḽa Vharwa vha Hinomi,*+ uri hu si vhe na muthu ane a posa murwa wawe kana ṅwananyana wawe muliloni a tshi itela Molexo.+
11 Ya ita uri bere dze mahosi a Yuda a vha o dzi ṋekedza vhurabeli ha ḓuvha dzi si dzhene nḓuni ya Yehova nga kamarani khulwane* ya muḓinḓa Nathani-meleke, ye ya vha i vurannḓani; ya fhisa gariki dza vhurabeli ha ḓuvha+ muliloni.
12 Khosi ya dovha ya thutha aḽeṱare dze mahosi a Yuda a vha o dzi fhaṱa kha ṱhanga+ ya kamara ya nṱha ya Ahasi, khathihi na aḽeṱare dze Manase a vha o dzi fhaṱa miṱani mivhili ya nnḓu ya Yehova.+ Ya dzi kuya dza vha buse ya ḽi hasha Govhani ḽa Kidironi.
13 Khosi ya thutha fhethu ha vhurabeli he ha vha hu phanḓa ha Yerusalema thungo ya tshipembe* ha Thavha yo Tshinyadzwaho,* ye Salomo khosi ya Isiraele a i fhaṱela Asiterothe mudzimukadzi a nengisaho wa Vhasidoni; na Kamosi mudzimu a nengisaho wa Moaba; na Milikomo+ mudzimu a nengisaho wa Vhaamoni.+
14 Ya thutha dziphuphu khethwa na u rema thanda khethwa,*+ vhudzuloni hadzo ya shela marambo a vhathu.
15 Ya dovha ya thutha aḽeṱare ye ya vha i ngei Bethele na fhethu ha vhurabeli he ha itwa nga Yerobeamu murwa wa Nebatha, he ha ita uri Isiraele ḽi ite tshivhi.+ Musi yo no thutha yeneyo aḽeṱare na fhethu ha vhurabeli, ya fhisa fhethu ha vhurabeli ya hu kuya ha vha buse, ya fhisa thanda khethwa.*+
16 Musi Yosia a tshi rembuluwa a vhona mavhiḓa e a vha e thavhani, a ita uri marambo a bviswe mavhiḓani, a a fhisa kha aḽeṱare, uri i si tsha fanelea vhurabeli, u ya nga zwe Yehova a zwi amba a tshi shumisa mushumeli wa Mudzimu wa ngoho we a dzula o amba uri zwenezwo zwithu zwi ḓo itea.+
17 A ri: “Tombo ḽine nda khou ḽi vhona fhaḽa ndi ḽa mini?” Vhanna vha wonoyo muḓi vha ri: “Ndi vhiḓa ḽa mushumeli wa Mudzimu wa ngoho a bvaho ngei Yuda+ we a amba hu tshee nga phanḓa nga ha hezwi zwithu zwoṱhe zwe wa zwi ita kha aḽeṱare i re Bethele.”
18 A ri: “Mu litsheni a awele. Hu songo vha na ane a fara marambo awe.” Vha si fare eneo marambo khathihi na a muporofita we a vha a tshi bva Samaria.+
19 Yosia a thutha na nnḓu dzoṱhe dzi re fhethu ha vhurabeli ngei miḓini ya Samaria,+ ye ya vha yo fhaṱwa nga mahosi a Isiraele uri a sinyuse Mudzimu, o ita zwi fanaho na zwe a zwi ita ngei Bethele.+
20 Vhotshifhe vhoṱhe vha fhethu ha vhurabeli vha re henefho, o vha vhulayela dziaḽeṱareni, a fhisa marambo avho.+ Nga murahu a vhuyelela Yerusalema.
21 Khosi ya laya vhathu vhoṱhe ya ri: “Itani vhuṱambo ha Paseka+ ha Yehova Mudzimu waṋu samusi zwo ṅwaliwa kha bugu ya mulanga.”+
22 Ho vha hu sa athu u vhuya ha vha na Paseka yo raloho u bva misini ye vhahaṱuli vha vha vha tshi khou haṱula Isiraele misi yoṱhe ya mahosi a Isiraele na mahosi a Yuda.+
23 Fhedzi nga ṅwaha wa vhu 18 wa Khosi Yosia, yeneyi Paseka ye ya itelwa Yehova yo vha hone ngei Yerusalema.
24 Yosia o fhelisa na mingome, vhabvumbi,+ zwifanyiso zwa terafimi,*+ midzimu ya zwifanyiso i nengisaho,* zwithu zwi nengisaho zwe zwa vha zwi shangoni ḽa Yuda na ḽa Yerusalema, uri a ite zwi re kha Mulayo+ wo ṅwaliwaho kha bugu ye tshifhe Hilikia a i wana nḓuni ya Yehova.+
25 A hu athu u vhuya ha vha na khosi i fanaho nae, ye ya humela ha Yehova nga mbilu yayo yoṱhe na nga zwoṱhe zwine ya vha zwone+ na nga maanḓa ayo oṱhe, u ya nga Mulayo woṱhe wa Mushe; a ho ngo vha na muṅwe ane a nga yone.
26 Naho zwo ralo, Yehova ho ngo humisa mbiti dzawe dze dza dugela Vhayuda nga nṱhani ha zwithu zwoṱhe zwi si zwavhuḓi zwe Manase a zwi ita uri a Mu sinyuse.+
27 Yehova a ri: “Na Yuda ndi ḓo mu fhelisa+ u fana na Isiraele;+ ndi ḓo laṱa Yerusalema muḓi we nda u nanga na nnḓu ye nda amba nga hayo nda ri, ‘Dzina ḽanga ḽi ḓo dzula henefho.’”+
28 Mafhungo oṱhe a Yosia na zwoṱhe zwe a ita, naa a zwo ngo ṅwaliwa buguni ya mafhungo a zwifhingani zwa kale zwa mahosi a Yuda?
29 Misini yawe Farao Nexo khosi ya Egipita o ya a ṱangana na khosi ya Asuri Mulamboni wa Yufuratha, Khosi Yosia a ya a lwa nae; fhedzi musi Nexo a tshi mu vhona, a mu vhulayela henefho Megido.+
30 Vhashumeli vhawe vha hwala tshitumbu tshawe nga gariki u bva Megido vha tshi isa Yerusalema vha tshi vhulunga vhiḓani ḽawe. Vhathu vha ḽeneḽo shango vha dzhia Yoahasi murwa wa Yosia vha mu ḓodza vha mu vhea uri a vhe khosi vhudzuloni ha khotsi awe.+
31 Yoahasi+ o vha e na miṅwaha ya 23 musi a tshi vha khosi, o vhusa miṅwedzi miraru e Yerusalema. Mme awe o vha a tshi pfi Hamutali+ ṅwananyana wa Yeremia wa ngei Libina.
32 A ita zwi sa takadzi Yehova, a tevhedza zwoṱhe zwe vhomakhulukuku wawe vha zwi ita.+
33 Farao Nexo+ a mu valela dzhele ngei Ribila+ shangoni ḽa Hamathi, uri a si vhuse ngei Yerusalema, a lifhisa shango talente* dza 100 dza siḽiva na talente ya musuku.+
34 Zwiṅwe hafhu, Farao Nexo a vhea Eliakima murwa wa Yosia uri a vhe khosi vhudzuloni ha khotsi awe Yosia, a shandula dzina ḽawe a mu ira ḽa Yehoyakimi; fhedzi a dzhia Yoahasi a mu isa Egipita,+ he a fhedzisela o fela hone.+
35 Yehoyakimi a ṋea Farao siḽiva na musuku, fhedzi o vha o thelisa vhathu vha ḽeneḽo shango uri a kone u ṋea Farao siḽiva ye a vha a tshi khou i ṱoḓa. O bvisisa muthu muṅwe na muṅwe wa ḽeneḽo shango siḽiva na musuku uri a zwi ṋee Farao Nexo.
36 Yehoyakimi+ o vha e na miṅwaha ya 25 musi a tshi vha khosi, o vhusa miṅwaha ya 11 e Yerusalema.+ Mme awe o vha a tshi pfi Zibida ṅwana wa Pedaya wa ngei Ruma.
37 O bvela phanḓa a tshi ita zwi sa takadzi Yehova,+ a tevhedza zwoṱhe zwe vhomakhulukuku wawe vha zwi ita.+
Ṱhaluso dzi re magumoni a siaṱari
^ Kana “ya vusulusa mulanga.”
^ Sedzani Mutevhe Wa Ṱhalutshedzo Ya Maipfi.
^ Sedzani Mutevhe Wa Ṱhalutshedzo Ya Maipfi.
^ Sedzani Mutevhe Wa Ṱhalutshedzo Ya Maipfi.
^ Kana “kamarani ya u ḽela.”
^ Thevhedz., “thungo ya tsha u ḽa.” Ndi tshipembe, musi muthu o sedza vhubvaḓuvha.
^ Ndi Thavha ya Miṱwari, zwihuluhulu tshipembe bvungwi hune ha dovha ha ḓivhiwa sa Thavha ya Vhutshinyi.
^ Sedzani Mutevhe wa Ṱhalutshedzo Ya Maipfi.
^ Sedzani Mutevhe Wa Ṱhalutshedzo Ya Maipfi.
^ Ipfi ḽine ḽa amba zwenezwi ḽa Tshihevheru ḽi tshimbidzana na ipfi “vhutoko” nahone ḽi shumiswa sa mubulo wa u goḓa.
^ Kana “midzimu ya nḓuni; midzimu ya zwifanyiso.”
^ Talente i lingana na khilogramu dza 34,2. Sedzani Ṱhume. B14.
