Bugu Ya Vhuvhili Ya Dzikhosi 24:1-20
24 Misini ya Yehoyakimi, Nebukadanetsara+ khosi ya Babele a ḓa a lwa nae, Yehoyakimi a vha mushumeli wawe miṅwaha miraru. Fhedzi a mu shandukela.
2 Yehova a mu rumela zwigwada zwa mavemu zwa Vhakaladea,+ zwa Vhasiria, zwa Vhamoaba na zwa Vhaamoni. A zwi ruma uri zwi lwe na muḓi wa Yuda zwi u fhelise, u ya nga zwe Yehova a zwi amba+ a tshi shumisa vhashumeli vhawe vha vhaporofita.
3 Vhukuma zwenezwi zwo bvelela Yuda nga nṱhani ha ndaela ya Yehova, ya uri u ḓo vha pandela phanḓa hawe+ nga nṱhani ha zwivhi zwoṱhe zwe Manase a zwi ita,+
4 na malofha oṱhe a vhathu vha si na mulandu e a a shulula,+ ngauri o vha o ḓadza Yerusalema nga malofha a si na mulandu, Yehova o vha a songo ḓiimisela u hangwela.+
5 Mafhungo oṱhe a Yehoyakimi na zwoṱhe zwe a ita, naa a zwo ngo ṅwaliwa buguni ya mafhungo a zwifhingani zwa kale zwa mahosi a Yuda?+
6 Yehoyakimi a vhulungwa na vhomakhulukuku wawe;+ murwa wawe Yehoyakini a vha khosi vhudzuloni hawe.
7 Khosi ya Egipita a yo ngo tsha dovha ya bva shangoni ḽayo, ngauri khosi ya Babele yo vha yo dzhia mashango oṱhe a khosi ya Egipita,+ u bva Muedzini wa Egipita+ u gonya u swika Mulamboni wa Yufuratha.+
8 Yehoyakini+ o vha e na miṅwaha ya 18 musi a tshi vha khosi, o vhusa miṅwedzi miraru e Yerusalema.+ Mme awe o vha a tshi pfi Nehusita ṅwana wa Elinathani wa ngei Yerusalema.
9 O bvela phanḓa a tshi ita zwi sa takadzi Yehova, a tevhedza zwoṱhe zwe khotsi awe a zwi ita.
10 Nga tshenetsho tshifhinga, vhashumeli vha Nebukadanetsara Khosi ya Babele vha gonya vha lwa na Yerusalema, vha tanga wonoyo muḓi.+
11 Nebukadanetsara khosi ya Babele a ḓa muḓini musi vhashumeli vhawe vho u tanga.
12 Yehoyakini khosi ya Yuda a ya kha khosi ya Babele,+ e na mme awe, vhashumeli vhawe, vhaḓinḓa vhawe na vhaḓinḓa vhawe vhahulwane;*+ khosi ya Babele ya mu isa vhuthubwani nga ṅwaha wa vhumalo wa musi a tshi khou vhusa.+
13 A bvisa lupfumo lwoṱhe lwa nḓuni ya Yehova na lupfumo lwa nḓuni* ya khosi.+ A kwasha thundu dzoṱhe dza musuku dze Salomo khosi ya Isiraele a dzi ita thembeleni ya Yehova.+ Zwenezwi zwo itea sa zwe Yehova a amba.
14 O isa vhoṱhe vha Yerusalema vhuthubwani, vhaḓinḓa vhoṱhe vhahulwane,*+ vhahali vhoṱhe, vhoṱhe vha re na vhutsila na vhane vha ita zwithu nga tsimbi,*+ vhenevho vhoṱhe vho vha vhe 10 000. A hu na we a sala nga nnḓa ha vhathu vha vhashayi vhukuma vha ḽeneḽo shango.+
15 A isa Yehoyakini+ vhuthubwani ngei Babele;+ a dzhia na mme a khosi, vhafumakadzi vha khosi, vhaḓinḓa vhawe na vhanna vha re na vhuimo vha ḽeneḽo shango, a vha thuba Yerusalema a vha isa Babele.
16 Khosi ya Babele ya isa na vhahali vhoṱhe vhuthubwani ngei Babele, vhane vha vha 7 000 u katela na vhanna vha re na vhutsila na vhane vha ita zwithu nga tsimbi* vha 1 000, vhoṱhe vho vha vhe vhahali, vho gudiswa u lwa.
17 Khosi ya Babele ya dzhia Mathanya, khotsimunene wa Yehoyakini+ ya mu vhea uri a vhe khosi vhudzuloni hawe, ya shandula dzina ḽawe ḽa pfi Tsedekia.+
18 Tsedekia o vha e na miṅwaha ya 21 musi a tshi vha khosi, o vhusa miṅwaha ya 11 e Yerusalema. Mme awe o vha a tshi pfi Hamutali+ ṅwananyana wa Yeremia wa ngei Libina.
19 O bvela phanḓa a tshi ita zwi sa takadzi Yehova, o ita zwoṱhe zwe zwa itwa nga Yehoyakimi.+
20 Hezwi zwithu zwo itea ngei Yerusalema na ngei Yuda nga nṱhani ha uri Yehova o vha o sinyuwa, a vha bvisa phanḓa hawe.+ Tsedekia o shandukela khosi ya Babele.+
Ṱhaluso dzi re magumoni a siaṱari
^ Kana “vhakololo.”
^ Kana “pfamoni.”
^ Kana “vhafuli vha tsimbi.” Kana khamusi, “vhafhaṱi vha mitsheṱo.”
^ Kana “vhakololo.”
^ Kana “vhafuli vha tsimbi.” Kana khamusi, “vhafhaṱi vha mitsheṱo.”