Bugu Ya Vhuvhili Ya Dzikhosi 25:1-30
25 Nga ṅwaha wa vhuṱahe musi hu tshi khou vhusa Tsedekia, nga ṅwedzi wa vhufumi, nga ḓuvha ḽa vhufumi ḽa ṅwedzi, Nebukadanetsara khosi+ ya Babele a ḓa na mmbi yawe yoṱhe a tshi ṱoḓa u lwa na muḓi wa Yerusalema.+ A atha madennde u mona nawo na u fhaṱa luvhondo u mona nawo woṱhe.+
2 Wonoyo muḓi wo tangiwa u swika nga ṅwaha wa vhu 11 musi hu tshi khou vhusa Khosi Tsedekia.
3 Nga ḓuvha ḽa vhuṱahe ḽa ṅwedzi wa vhuṋa, nḓala ya vha khulu+ kha wonoyo muḓi, vhathu vho vha vhe si na zwiḽiwa kha ḽeneḽo shango.+
4 Vha kwasha luvhondo lwa wonoyo muḓi,+ maswole oṱhe a shavha vhusiku, a bva nga khoro i re vhukati ha mbondo mbili dzi re tsini na tsimu ya khosi, ngeno Vhakaladea vho tanga muḓi; khosi ya shavha nga nḓila i yaho Araba.+
5 Fhedzi mmbi ya Vhakaladea ya pandamedza khosi, ya i fara ngei midavhini ya soga ḽa Yeriko, maswole ayo oṱhe o vha o i shavha.
6 Ya fara Khosi Tsedekia+ ya mu isa kha khosi ya Babele ngei Ribila, vha mu haṱula.
7 Vha vhulaya vharwa vha Tsedekia a tshi zwi vhona; Nebukadanetsara a swingisa Tsedekia, a mu vhofha nga ngeḓane dza koporo, a mu isa Babele.+
8 Nga ṅwedzi wa vhuṱanu, nga ḓuvha ḽa vhusumbe ḽa wonoyo ṅwedzi, we wa vha u ṅwaha wa vhu 19 musi hu tshi khou vhusa Nebukadanetsara khosi ya Babele, Nebusaradani+ muhulwane wa vhalindi, mushumeli wa khosi ya Babele, a ḓa Yerusalema.+
9 A fhisa nnḓu ya Yehova,+ nnḓu* ya khosi,+ na nnḓu dzoṱhe dza Yerusalema;+ a fhisa na nnḓu dzoṱhe dza vhaḓivhalea.+
10 Mbondo dzo tangaho muḓi wa Yerusalema dza wiswa nga mmbi yoṱhe ya Vhakaladea i re na muhulwane wa vhalindi.+
11 Nebusaradani muhulwane wa vhalindi a dzhia vhathu vhoṱhe vho salaho muḓini, vhathu vho shavhelaho kha khosi ya Babele na vhaṅwe vhathu vhoṱhe, a vha isa vhuthubwani.+
12 Fhedzi muhulwane wa vhalindi a sia vhaṅwe vhathu vha shayaho vhukuma vha ḽeneḽo shango uri vha shume tsimuni dza minḓirivhe nga u tou kombetshedzwa.+
13 Vhakaladea vha kwashekanya phuphu dza koporo+ dza nnḓu ya Yehova na zwigoloi+ na sambelo ḽihulu ḽo itwaho nga koporo ḽi vhidzwaho Lwanzhe,+ zwe zwa vha zwi nḓuni ya Yehova, vha dzhia koporo vha i isa Babele.+
14 Vha dzhia na zwa u kumbela miḽora, fosholo, zwa u dzima mulilo, zwinwelo na thundu dzoṱhe dza koporo dzine dza shumiswa thembeleni.
15 Muhulwane wa vhalindi a dzhia zwa u oka mulilo na zwigoḓelo zwo itwaho nga musuku vhukuma+ na siḽiva vhukuma.+
16 Phuphu mbili, sambelo ḽihulu ḽi vhidzwaho Lwanzhe na zwigoloi zwe Salomo a zwi itela nnḓu ya Yehova, koporo ya zwenezwo zwithu zwoṱhe yo vha i nnzhi vhukuma i sa kalei.+
17 Phuphu iṅwe na iṅwe yo vha i vhulapfu ha khubithi* dza 18,+ ṱhoho ya phuphu yo itwa nga koporo; yeneyo ṱhoho i vhulapfu ha khubithi tharu, i na maphomagraneithi o itwaho nga koporo o ṱumanaho u mona nayo.+ Phuphu ya vhuvhili yo vha i tshi fana na iḽa iṅwe.
18 Muhulwane wa vhalindi a dzhia na Seraya+ muhulwane wa vhotshifhe, Tsefanya+ ane a vha tshifhe a tevhelaho Seraya na vhalindi vha miṋango vhararu.+
19 Henefho muḓini, a dzhia muḓinḓa muthihi we a vha a tshi langa maswole na khonani ṱhanu dza khosi dze dza wanala muḓini, a dzhia na muṅwaleli wa mulangammbi, we a vha a tshi kuvhanganya vhathu vha ḽeneḽo shango, a dzhia na vhanna vha 60 kha vhathu zwavho vha ḽeneḽo shango vhe vha wanala muḓini.
20 Nebusaradani+ muhulwane wa vhalindi a vha dzhia a vha isa kha khosi ya Babele ngei Ribila.+
21 Khosi ya Babele ya vha vhulayela ngei Ribila shangoni ḽa Hamathi.+ Vhayuda vha dzhiiwa shangoni ḽavho vha iswa vhuthubwani.+
22 Nebukadanetsara khosi ya Babele a vhea Gedalia+ murwa wa Ahikamu+ murwa wa Shafani+ uri a lange vhathu vhe a vha sia shangoni ḽa Yuda.+
23 Musi vhalangammbi vhoṱhe na mmbi dzavho vha tshi pfa uri khosi ya Babele yo vhea Gedalia, vha ṱavhanya vha ya kha Gedalia ngei Mitsipa. Ho vha hu: Ishimaele murwa wa Nethania, Yohanani murwa wa Karea, Seraya murwa wa Thanumethe wa Munetofa na Yaasanya murwa wa Mumaakate na vhanna vha re navho.+
24 Gedalia a vha anela na vhanna vha re navho, a ri: “Ni songo ofha u vha vhashumeli vha Vhakaladea. Dzulani kha ḽeneḽi shango ni shumele khosi ya Babele, zwi ḓo ni tshimbilela.”+
25 Nga ṅwedzi wa vhusumbe, Ishimaele+ murwa wa Nethania murwa wa Elishama, wa muṱa wa vhuhosini,* a ḓa na vhaṅwe vhanna vha fumi, vha vhulaya Gedalia khathihi na vhaṅwe Vhayuda na Vhakaladea vha re nae ngei Mitsipa.+
26 Nga murahu ha zwenezwo, vhathu vhoṱhe u bva kha muṱuku u swika kha muhulwane, u katela na vhalangammbi, vha takuwa vha ya Egipita,+ ngauri vho vha vha tshi khou ofha Vhakaladea.+
27 Nga ṅwaha wa vhu 37 musi Yehoyakini khosi+ ya Yuda e vhuthubwani, nga ṅwedzi wa vhu 12, nga ḓuvha ḽa vhu 27 ḽa wonoyo ṅwedzi, wonoyo ndi ṅwaha we Evili-merodaka khosi ya Babele a vha khosi ngawo, o vhofholola dzhele Yehoyakini khosi ya Yuda.+
28 A amba na Yehoyakini zwavhuḓi, a ita uri khuluṋoni yawe i fhire ya maṅwe mahosi e a vha e nae Babele.
29 Yehoyakini a bvula zwiambaro zwawe zwa dzhele, a thoma u ḽa na khosi tshifhinga tshoṱhe maḓuvha oṱhe a vhutshilo hawe.
30 Khosi yo mu ṋea zwiḽiwa tshifhinga tshoṱhe, i tshi mu ṋea zwone ḓuvha ḽiṅwe na ḽiṅwe, maḓuvha oṱhe a vhutshilo hawe.
Ṱhaluso dzi re magumoni a siaṱari
^ Kana “pfamo.”
^ Khubithi nthihi i lingana na senthimithara dza 44,5. Sedzani Ṱhume. B14.
^ Thevhedz., “mbeu ya muvhuso.”
