Bugu Ya Vhuvhili Ya Dzikhosi 4:1-44
-
Elisha u ita uri tshilikadzi i vhe na mapfura manzhi (1-7)
-
Mufumakadzi wa Musunema u ṱanganedza Elisha (8-16)
-
Mufumakadzi u wana ṅwana wa mutukana; onoyo ṅwana a fa (17-31)
-
Elisha u vusa ṅwana o faho (32-37)
-
Elisha u ita uri tshitshuu tshi ḓifhe (38-41)
-
Elisha u ita uri hu vhe na vhurotho vhunzhi (42-44)
4 Muṅwe wa vhafumakadzi vha vharwa vha vhaporofita+ a lilela Elisha a ri: “Munna wanga we a vha e mushumeli wau o fa, iwe u a zwi ḓivha zwavhuḓi uri mushumeli wau o vha a tshi ofha Yehova tshifhinga tshoṱhe.+ Mukolodisi o ḓa u dzhia vhananga vhavhili uri vha vhe vhalanda vhawe.”
2 Elisha a amba nae a ri: “Ndi nga u itela mini? Mmbudze, ndi mini tshine wa vha natsho nḓuni?” Mufumakadzi a fhindula a ri: “Mushumeli wau ha na tshithu na tshithihi nḓuni nga nnḓa ha mvuvhelo ya mapfura.”+
3 A ri: “Tshimbila u ye u humbele midzio i si na tshithu kha vhahura vhau vhoṱhe. U i kuvhanganye i vhe minzhi nga hune wa nga kona ngaho.
4 U dzhene nḓuni na vharwa vhau u ḓivalele. U shele mapfura kha yeneyo midzio yoṱhe, yo ḓalaho u i vhetshele thungo.”
5 A ṱuwa.
A ḓivalela nḓuni na vharwa vhawe, vha mu ṋekedza midzio, a shela eneo mapfura.+
6 Musi midzio yo no ḓala, a amba na muṅwe wa vharwa vhawe a ri: “Nḓisele muṅwe mudzio.”+ Fhedzi murwa wawe a ri: “A hu tshee na midzio.” Mapfura a si tsha bva.+
7 A ḓa a vhudza mushumeli wa Mudzimu wa ngoho, onoyo munna a ri: “Tshimbila u ye u rengise eneo mapfura u lifhe zwikolodo zwau, iwe na vharwa vhau ni ḓo tshila nga o salaho.”
8 Ḽiṅwe ḓuvha Elisha a ya Sunema,+ henefho ho vha hu na muṅwe mufumakadzi a ḓivheaho, a kombetshedza Elisha uri a ḽe zwiḽiwa henefho.+ Tshifhinga tshoṱhe a tshi fhira nga henefho, o vha a tshi dzhena henefho a ḽa.
9 A amba na munna wawe a ri: “Ndi a zwi ḓivha uri munna ane a fhira nga henefha tshifhinga tshoṱhe ndi mushumeli mukhethwa wa Mudzimu.
10 Ndi khou humbela uri ri fhaṱe kamara ṱhukhu nṱha ha ṱhanga+ ri mu vhetshele mmbete, ṱafula, tshidulo na tshiṱomambone. Musi a tshi ḓa u ri dalela u ḓo dzula henefho.”+
11 Ḽiṅwe ḓuvha a ḓa henefho, a gonya kamarani ya nṱha a eḓela hone.
12 A amba na Gehasi+ muḓinḓa wawe a ri: “Vhidza uyu mufumakadzi wa Musunema.”+ A mu vhidza a ḓa a ima phanḓa hawe.
13 Elisha a amba na Gehasi a ri: “Ndi khou humbela u mu vhudze uri: ‘Wo ḓidina vhukuma u tshi itela riṋe.+ U ṱoḓa u itelwa mini?+ Naa ndi u ambele na khosi+ kana na mulangammbi?’” Fhedzi a fhindula a ri: “A hu na tshine tsha ndina samusi ndi tshi khou dzula vhukati ha vhathu vha hashu.”
14 Elisha a vhudzisa a ri: “Ri nga mu itela mini?” Gehasi a fhindula a ri: “Ha na murwa,+ munna wawe o no kalaha.”
15 A ṱavhanya a ri: “Mu vhidze.” A mu vhidza a ḓa a ima muṋangoni.
16 Elisha a ri: “Ṅwaha u ḓaho nga tshenetshi tshifhinga, u ḓo beba ṅwana wa mutukana.”+ Fhedzi a ri: “Aiwa muṋe wanga, mushumeli wa Mudzimu wa ngoho! U songo zwifhela mushumeli wau.”
17 Naho zwo ralo, onoyo mufumakadzi a vhifha muvhilini, a beba ṅwana wa mutukana nga tshenetsho tshifhinga nga ṅwaha u tevhelaho, samusi Elisha o vha o mu vhudza.
18 Onoyo mutukana a aluwa, ḽiṅwe ḓuvha a tevhela khotsi awe, we a vha e na vhakaṋi.
19 A amba na khotsi awe a ri: “Ṱhoho yanga i khou rema, yowee ṱhoho yanga i khou rema!” Nga zwenezwo, khotsi awe a amba na muḓinḓa a ri: “Mu hwale u mu ise ha mme awe.”
20 A mu hwala a mu humisela kha mme awe, a dzula kha zwirumbi zwa mme awe u swika nga masiari, a fa.+
21 Mme awe a gonya a mu ladza mmbeteni wa mushumeli wa Mudzimu wa ngoho,+ a vala muṋango a ṱuwa.
22 A vhidza munna wawe a ri: “Ndi khou humbela uri u nthumele muṅwe wa vhaḓinḓa na donngi, uri ndi ṱavhanye ndi ye kha mushumeli wa Mudzimu wa ngoho, ndi dovhe ndi vhuye.”
23 Fhedzi a ri: “Ndi ngani u tshi khou ya u mu vhona ṋamusi? A si ṅwedzi muswa+ kana savhatha.” Naho zwo ralo, a fhindula a ri: “A hu na mulandu.”
24 A vhofhelela sale kha donngi, a amba na muḓinḓa wawe a ri: “Ṱavhanya. U songo i imisa arali ndi songo u vhudza.”
25 A ya kha mushumeli wa Mudzimu wa ngoho ngei Thavhani ya Karamele. Musi mushumeli wa Mudzimu wa ngoho a tshi tou mu vhona e kule, a amba na muḓinḓa wawe Gehasi a ri: “Vhona mufumakadzi wa Musunema khouḽa.
26 Ndi khou humbela uri u gidime u ye u mu ṱanganedze u mu vhudzise uri: ‘Naa iwe na munna wau na ṅwana wau ni tshee no takala?’” Ene a fhindula a ri: “Ri tshee ro takala.”
27 Musi a tshi swika kha mushumeli wa Mudzimu wa ngoho ngei thavhani, a mu fara milenzhe.+ Gehasi a sendela uri a mu sukumedzele kule, fhedzi mushumeli wa Mudzimu wa ngoho a ri: “Mu litshe, ngauri u khou pfa vhuṱungu, Yehova o ndzumbela zwenezwo, ho ngo mmbudza.”
28 Onoyo mufumakadzi a ri: “Naa ndo humbela iwe muṋe wanga uri u nṋee ṅwana? Naa a tho ngo u vhudza nda ri: ‘U songo mpfulufhedzisa zwithu zwi siho’?”+
29 Elisha a ṱavhanya a amba na Gehasi a ri: “Ḓivhofhe khundu+ u dzhie lubaḓa lwanga u tshimbile. Arali wa ṱangana na muthu u songo mu lumelisa; arali muṅwe muthu a u lumelisa, u songo mu fhindula. U swike u vhee lubaḓa lwanga kha tshifhaṱuwo tsha onoyo mutukana.”
30 Mme a mutukana a ri: “Ndi ana nga Yehova a tshilaho na nga vhutshilo hau, ndi nga si u sie.”+ Ngauralo, Elisha a takuwa a ṱuwa nae.
31 Gehasi a vha ranga phanḓa a swika a vhea lubaḓa kha tshifhaṱuwo tsha mutukana, fhedzi ha si vhonale zwine zwa sumbedza uri u khou tshila.+ A huma a ṱangana na Elisha a mu vhudza u ri: “Mutukana uḽa ho ngo vuwa.”
32 Musi Elisha a tshi swika nḓuni, a wana mutukana o eḓela kha mmbete wawe o fa.+
33 A dzhena, a vala vothi avho vhavhili vhe nnḓa, a thoma u rabela Yehova.+
34 A gonya mmbete a shuvhama kha mutukana o vhea mulomo wawe kha mulomo wa mutukana, maṱo awe kha maṱo a mutukana, zwanḓa zwawe kha zwanḓa zwa mutukana, musi o shuvhama khae muvhili wa onoyo mutukana wa thoma u dudela.+
35 A tshimbila a tshi ya ngeno na ngei henefho nḓuni, a dovha a gonya nṱha ha mmbete a shuvhama khae. Mutukana a atsamula lwa sumbe, nga murahu maṱo awe a bonyolowa.+
36 Elisha a vhidza Gehasi a ri: “Vhidza mufumakadzi wa Musunema.” A mu vhidza, onoyo mufumakadzi a ḓa khae. A amba nae a ri: “Takula ṅwana wau.”+
37 A ḓa a gwadama tsini na milenzhe ya Elisha, a takula ṅwana wawe a ṱuwa.
38 Musi Elisha a tshi vhuyelela Giligala, a wana hu na nḓala shangoni ḽeneḽo.+ Vharwa vha vhaporofita+ vho vha vho dzula phanḓa hawe, a amba na muḓinḓa wawe a ri:+ “Vhea bodo khulu, u bikele vharwa vha vhaporofita tshitshuu.”
39 Muṅwe wavho a ya tsimuni u ka muroho, a wana muri wa ḓaka a fula zwine zwa nga maranga khawo a ḓadza tshiambaro tshawe. A huma a swika a zwi tshetshelela bodoni ya tshitshuu, a sa ḓivhi uri ndi mini.
40 Nga murahu a shululela vhenevho vhanna uri vha ḽe, musi vha tshi tou ḽa tshenetsho tshitshuu, vha ṱavha mukosi vha ri: “Yowee mushumeli wa Mudzimu wa ngoho, hu na mulimo bodoni.” Vha litsha u ḽa.
41 A ri: “Nḓiseleni fuḽauru.” A i shela bodoni a ri: “Shululelani vhathu.” Hu si tsha vha na mulimo bodoni.+
42 Ha ḓa muṅwe munna a bvaho Baali-shalisha,+ a ḓisela mushumeli wa Mudzimu wa ngoho ḽofo dza vhurotho+ ha baḽi dza 20 dzo itwaho nga zwiranzhe u katela na mukhwama u re na thoro ntswa.+ Elisha a ri: “Zwi ṋee vhathu uri vha ḽe.”
43 Naho zwo ralo, muḓinḓa wawe a ri: “Ndi nga zwi vhea hani phanḓa ha vhanna vha 100?”+ Elisha a ri: “Zwi ṋee vhathu uri vha ḽe, ngauri Yehova u ri: ‘Vha ḓo ḽa vha sia zwiṅwe.’”+
44 A zwi vhea phanḓa havho, vha ḽa vha sia,+ sa zwe Yehova a amba.
