Bugu Ya Vhuvhili Ya Dzikhosi 7:1-20
7 Elisha a ri: “Thetshelesani zwine Yehova a amba. Yehova u ri: ‘Matshelo nga tshenetshi tshifhinga khoroni* ya Samaria, muelo wa tshikalo tsha siha* wa fuḽauru tsekene u ḓo rengwa nga shekele,* mielo mivhili ya siha ya baḽi i ḓo rengwa nga shekele.’”+
2 Mulangammbi ane a fhulufhelwa nga khosi a amba na mushumeli wa Mudzimu wa ngoho a ri: “Naho arali Yehova a vula khoro dza ṱaḓulu, naa zwenezwi zwi nga itea?”+ Elisha a ri: “U ḓo zwi vhona zwi tshi itea,+ fhedzi a u nga ḓo zwi ḽa.”+
3 Ho vha hu na vhanna vhaṋa vha re na mapele vho dzulaho khoroni ya muḓi,+ vha amba nga tshavho vha ri: “Ro dzulela mini afha ri sa ḓo vhuya ra fa?
4 Arali ra ri: ‘Kha ri dzhene muḓini,’ hu tshi kha ḓi vha na nḓala muḓini,+ ri ḓo fela henefho. Arali ra dzula henefha, ri ḓo ḓi fa. Ngauralo, kha ri ye madenndeni a Vhasiria. Arali vha sa ri vhulaya ri ḓo tshila, fhedzi arali vha ri vhulaya, ri ḓo ḓi vha ro fa.”
5 Vha takuwa nga honoho vhusiku vha ya vha dzhena madenndeni a Vhasiria. Musi vha tshi swika fhethu he madennde a Vhasiria a fhelela hone, vha wana henefho hu si na muthu.
6 Ndi ngauri Yehova o vha o ita uri Vhasiria vha pfe mubvumo wa gariki dza nndwa na bere na mmbi khulu.+ Vha amba nga tshavho vha ri: “Khosi ya Isiraele yo renga mahosi a Vhahethe na mahosi a Egipita uri a ḓe a ri vutshele!”
7 Vha ṱavhanya vha takuwa vha shavha honoho vhusiku, vha sia madennde avho, bere dzavho, donngi dzavho, vha sia madennde oṱhe o ralo, vha shavha uri vha si vhulawe.
8 Musi vhenevho vhanna vha re na mapele vha tshi swika he madennde a fhelela hone vha dzhena kha ḽiṅwe dennde vha thoma u ḽa na u nwa. Vha hwala siḽiva, musuku na zwiambaro, vha ya vha zwi dzumba. Vha vhuya, vha dzhena kha ḽiṅwe dennde vha hwala zwithu, vha ṱuwa vha ya vha zwi dzumba.
9 Mafheleloni vha amba nga tshavho vha ri: “Zwine ra khou ita zwo khakhea. Ri fanela u vhudza vhaṅwe enea mafhungo avhuḓi! Arali ra mona-mona ra lindela ḽa vhuya ḽa tsha, ri ḓo pfiswa vhuṱungu. Kha ri ṱuwe zwino ri ye ri vhige enea mafhungo nḓuni ya khosi.”
10 Vha ṱuwa vha ya vha vhidza vhalindakhoro vha muḓi vha vha vhudza u ri: “Ro ya madenndeni a Vhasiria, fhedzi ho vha hu si na muthu henefho, a ro ngo vhuya ra pfa muthu na muthihi a tshi khou amba. Ho vha hu na bere na donngi fhedzi dzo vhofhiwa, madennde o sala o ralo.”
11 Vhalindakhoro vha ṱavhanya vha vhidzelela, ha ḓivhadzwa vha nḓuni ya khosi eneo mafhungo.
12 Khosi ya ṱavhanya ya vuwa vhusiku ya amba na vhashumeli vhayo ya ri: “Ndi ḓo ni vhudza zwine Vhasiria vha ṱoḓa u ri ita zwone. Vha a zwi ḓivha uri ro farwa nga nḓala,+ vho bva madenndeni vha ya u dzumbama ḓakani, vha tshi ri, ‘Vha ḓo bva muḓini, ri ḓo vha fara vha tshi khou tshila ra dzhena muḓini.’”+
13 Muṅwe wa vhashumeli vhawe a ri: “Hu na bere ṱhanu dzo salaho dzi re muḓini. Nangani vhanna ni vha rume vha ye u vhona zwe zwa itea. Arali vha vhulawa zwi ḓo vha khwine u fhira u dzula fhano vha fa na vhaṅwe Vhaisiraele.”
14 Vha dzhia gariki mbili dzi re na bere, khosi ya vha ruma madenndeni a Vhasiria, ya ri: “Iyani ni vhone.”
15 Vha vha tevhela u vhuya u swika Yorodane, nḓila yoṱhe yo ḓala zwiambaro na thundu zwe Vhasiria vha zwi laṱa musi vha tshi khou shavha. Vhaḓinḓa vha huma, vha vhudza khosi eneo mafhungo.
16 Vhathu vha ya vha dzhia zwe zwa vha zwi madenndeni a Vhasiria, muelo wa tshikalo tsha siha* wa fuḽauru tsekene wa rengwa nga shekele,* mielo mivhili ya siha ya baḽi ya rengwa nga shekele, sa zwe Yehova a amba.+
17 Khosi yo vha yo nanga mulangammbi ane ya mu fhulufhela uri a linde khoro, fhedzi vha mu kandekanya a fela henefho khoroni, sa zwe mushumeli wa Mudzimu wa ngoho a vhudza khosi musi yo ya khae.
18 Ho itea zwe mushumeli wa Mudzimu wa ngoho a vhudza khosi a tshi ri: “Mielo mivhili ya tshikalo tsha siha* ya baḽi i ḓo rengwa nga shekele,* muelo wa siha wa fuḽauru tsekene u ḓo rengwa nga shekele matshelo nga tshenetshi tshifhinga khoroni ya Samaria.”+
19 Fhedzi mulangammbi o vha o amba na mushumeli wa Mudzimu wa ngoho a ri: “Naho arali Yehova a vula khoro dza ṱaḓulu, naa zwenezwi zwi nga itea?” Elisha a ri: “U ḓo zwi vhona zwi tshi itea, fhedzi a u nga ḓo zwi ḽa.”
20 Ndi zwenezwo zwe zwa itea khae, ngauri vhathu vho mu kandekanya a fela henefho khoroni.
Ṱhaluso dzi re magumoni a siaṱari
^ Kana “mimaketeni.”
^ Siha nthihi i lingana na ḽithara dza 7,33. Sedzani Ṱhume. B14.
^ Shekele nthihi i lemela gramu dza 11,4. Sedzani Ṱhume. B14.
^ Ndi mielo ya siha i ṱoḓaho u vha khilogramu dza fumi.
^ Shekele nthihi i lemela gramu dza 11,4. Sedzani Ṱhume. B14.
^ Ndi mielo ya siha i ṱoḓaho u vha khilogramu dza fumi.
^ Shekele nthihi i lemela gramu dza 11,4. Sedzani Ṱhume. B14.
