Bugu Ya Vhuvhili Ya Dzikhosi 8:1-29
8 Elisha a amba na mufumakadzi we a vusa murwa wawe a ri:+ “Takuwa u ṱuwe na vha muṱa wau, u pfulutshele huṅwe fhethu u vhe mutsinda ngauri Yehova o ḓivhadza uri hu ḓo vha na nḓala shangoni+ ḽino miṅwaha ya sumbe.”
2 Onoyo mufumakadzi a takuwa a ita zwe mushumeli wa Mudzimu wa ngoho a zwi amba. A ṱuwa na muṱa wawe a ya a dzula shangoni ḽa Vhafilisita+ miṅwaha ya sumbe.
3 Nga murahu ha miṅwaha ya sumbe onoyo mufumakadzi a vhuya a tshi bva shangoni ḽa Vhafilisita, a ya kha khosi a humbela uri a dovhe a ṋewe nnḓu yawe na tsimu yawe.
4 Khosi yo vha i tshi khou amba na Gehasi muḓinḓa wa mushumeli wa Mudzimu wa ngoho i tshi ri: “Ndi khou humbela uri u nṱalutshedze zwithu zwoṱhe zwihulu zwe Elisha a zwi ita.”+
5 Musi a tshi kha ḓi ṱalutshedza khosi nga ha nḓila ye Elisha a vusa ngayo mufu,+ uḽa mme a murwa o vuswaho a ḓa kha khosi, a tshi khou humbela nnḓu yawe na tsimu yawe.+ Gehasi a ṱavhanya a ri: “Thovhela muṋe wanga, hoyu ndi ene mufumakadzi we Elisha a vusa murwa wawe.”
6 Khosi ya vhudzisa onoyo mufumakadzi, onoyo mufumakadzi a i vhudza mafhungo oṱhe. Khosi ya vhudza muḓinḓa ya ri: “Ṋea onoyo mufumakadzi thundu yawe yoṱhe na zwibveledzwa zwoṱhe zwa masimuni zwe a vha a tshi ḓo vha o zwi wana u bva tshee a ṱuwa u swika zwino.”
7 Elisha a ḓa Damaseko+ musi Benihadada+ khosi ya Siria a tshi khou lwala. Ngauralo, Benihadada a vhudzwa uri: “Mushumeli wa Mudzimu wa ngoho+ o ḓa fhano.”
8 Khosi ya amba na Hasaele ya ri:+ “Dzhia tshifhiwa u ye u ṱangane na mushumeli wa Mudzimu wa ngoho.+ U mu humbele uri a u vhudzisele ha Yehova uri: ‘Naa uvhu vhulwadze vhune nda vha naho vhu ḓo fhola?’”
9 Hasaele a ya a ṱangana na Elisha o fara tshifhiwa na zwithu zwoṱhe zwavhuḓi zwa Damaseko zwo hwalwa nga gamela dza 40. A swika a ima phanḓa hawe a ri: “Murwa wau Benihadada khosi ya Siria, o nthuma kha iwe uri ndi u vhudzise uri: ‘Naa uvhu vhulwadze vhune nda vha naho vhu ḓo fhola?’”
10 Elisha a mu fhindula a ri: “Tshimbila u mu vhudze uri: ‘U ḓo fhola,’ fhedzi Yehova o ntsumbedza uri u ḓo fa.”+
11 Elisha a lavhelesa Hasaele a vhuya a shona. Mushumeli wa Mudzimu wa ngoho a thoma u lila.
12 Hasaele a vhudzisa a ri: “Ndi ngani muṋe wanga a tshi khou lila?” A mu fhindula a ri: “Ngauri ndi a ḓivha nḓila ine wa ḓo vhaisa ngayo vhathu vha Isiraele.+ Ndi iwe ane a ḓo fhisa fhethu havho ho tsireledzeaho, vhanna vhavho vha maanḓa u ḓo vha vhulaya nga banga, vhana vhavho u ḓo vha vhulaya, vhafumakadzi vhavho vho vhifhaho muvhilini u ḓo vha vula dzithumbu.”+
13 Hasaele a ri: “Naa mushumeli wau ane a tou nga mmbwa a nga ita hani zwithu zwo raloho?” Fhedzi Elisha a ri: “Yehova o ntsumbedza uri u ḓo vha khosi ya Siria.”+
14 A ṱutshela Elisha a vhuyelela ha muṋe wawe, we a amba nae a ri: “Elisha o ri mini kha iwe?” A fhindula a ri: “O mmbudza uri iwe u ḓo fhola.”+
15 Nga ḽa matshelo Hasaele a dzhia labi, a ḽi lovhea maḓini, a mu fukedza* tshifhaṱuwo a si tsha kona u fema u swika a tshi a fa.+ Hasaele a vha khosi vhudzuloni hawe.+
16 Nga ṅwaha wa vhuṱanu hu tshi khou vhusa Yehoramu+ murwa wa Ahaba khosi ya Isiraele, musi Yehoshafati e khosi ya Yuda, Yehoramu+ murwa wa Yehoshafati khosi ya Yuda a vha khosi.
17 O vha e na miṅwaha ya 32 musi a tshi vha khosi, o vhusa miṅwaha ya malo Yerusalema.
18 O tevhedza zwe zwa itwa nga mahosi a Isiraele,+ u fana na zwo itwaho nga vha nnḓu ya Ahaba,+ ngauri o vha o vhinga ṅwananyana wa Ahaba;+ a bvela phanḓa a tshi ita zwi sa takadzi Yehova.+
19 Fhedzi Yehova ho ngo ṱoḓa u fhelisa Yuda a tshi itela mushumeli wawe Davida,+ samusi o vha o fhulufhedzisa uri u ḓo ṋea ene+ na vharwa vhawe luvhone lini na lini.
20 Misini yawe Vhaedomo vha shandukela Yuda,+ vha ḓivhetshela khosi.+
21 Yehoramu a wetshela Tsairi na gariki dzawe dzoṱhe, a vuwa vhukati ha vhusiku a vhulaya Vhaedomo vho tangaho ene na vhalangi vha gariki; maswole a shavha a ya madenndeni ao.
22 Fhedzi Vhaedomo vho bvela phanḓa vha tshi shandukela Yuda u swika na ṋamusi. Na muḓi wa Libina+ wa vha shandukela nga tshenetsho tshifhinga.
23 Mafhungo oṱhe a Yehoramu na zwoṱhe zwe a ita, naa a zwo ngo ṅwaliwa buguni ya mafhungo a zwifhingani zwa kale zwa mahosi a Yuda?
24 Yehoramu a vhulungwa na vhomakhulukuku wawe Muḓini wa Davida.+ Murwa wawe Ahasia+ a vha khosi vhudzuloni hawe.
25 Nga ṅwaha wa vhu 12 wa Yehoramu murwa wa Ahaba khosi ya Isiraele, Ahasia murwa wa Yehoramu khosi ya Yuda a vha khosi.+
26 Ahasia o vha e na miṅwaha ya 22 musi a tshi vha khosi, o vhusa Yerusalema ṅwaha muthihi. Mme awe o vha a tshi pfi Athalia+ muḓuhulu* wa Omiri khosi+ ya Isiraele.
27 O tevhedza zwe zwa itwa nga vha nnḓu ya Ahaba,+ a bvela phanḓa a tshi ita zwi sa takadzi Yehova, u fana na vha nnḓu ya Ahaba, ngauri o vha e shaka ḽa vha nnḓu ya Ahaba.+
28 A ṱuwa na Yehoramu murwa wa Ahaba uri a ye u lwa na Hasaele khosi ya Siria ngei Ramothe-giḽiada,+ fhedzi Vhasiria vha huvhadza Yehoramu.+
29 Khosi Yehoramu a humela Yeseriele+ uri a fhole mbonzhe nge Vhasiria vha vha vho mu huvhadza ngei Rama musi a tshi lwa na Hasaele khosi ya Siria.+ Ahasia murwa wa Yehoramu khosi ya Yuda a ya Yeseriele uri a vhone Yehoramu murwa wa Ahaba ngauri o vha o huvhala.*
Ṱhaluso dzi re magumoni a siaṱari
^ Kana “vhea kha.”
^ Thevhedz., “ṅwananyana.”
^ Kana “o vha a tshi khou lwala.”
