Bugu Ya Vhuvhili Ya Koronika 1:1-17
1 Vhuhosi ha Salomo murwa wa Davida ha khwaṱha vhu tshi ya, Yehova Mudzimu wawe o vha e nae, a mu hulisa zwihulu.+
2 Salomo a amba na Vhaisiraele vhoṱhe, vhane vha ranga phanḓa vha zwigidi na vha maḓana, vhahaṱuli na vharangaphanḓa vhoṱhe vha Isiraele na vharangaphanḓa vha miṱa ya vhokhotsi avho.
3 Ngauralo, Salomo na tshivhidzo tshoṱhe vha gonya fhethu ha vhurabeli ngei Gibeoni,+ ngauri henefho ho vha hu na dennde ḽa muṱangano wa Mudzimu wa ngoho, ḽeneḽo ndi dennde ḽe Mushe mushumeli wa Yehova a ḽi ita ngei sogani.
4 Naho zwo ralo, Davida o vha o dzhia Mbulungelo ya Mudzimu wa ngoho ngei Kiriate-yearimi+ a i isa fhethu he a vha o i lugiselela hone; o vha o i athela dennde ngei Yerusalema.+
5 Aḽeṱare ya koporo+ yo itwaho nga Betsaliele+ murwa wa Uri murwa wa Huri yo vha yo vhewa phanḓa ha dennde ḽikhethwa* ḽa Yehova; Salomo na tshivhidzo vho vha vha tshi rabela phanḓa hayo.*
6 Salomo a ṋekedza zwifhiwa henefho phanḓa ha Yehova, a ṋekedza zwifhiwa zwa u fhiswa zwa 1 000 kha aḽeṱare ya koporo+ denndeni ḽa muṱangano.
7 Nga honoho vhusiku Mudzimu a ḓivhonadza kha Salomo, a amba nae a ri: “Nkhumbele tshine wa ṱoḓa ndi tshi u ṋea tshone.”+
8 Salomo a amba na Mudzimu a ri: “Wo sumbedza Davida khotsi anga lufuno luhulu lu sa shanduki,+ wo ita uri ndi vhe khosi vhudzuloni hawe.+
9 Iwe Yehova Mudzimu, ita zwe wa fhulufhedzisa Davida khotsi anga,+ ngauri wo mmbea uri ndi vhe khosi ya vhathu vho ḓalaho sa buse ḽa kha ḽifhasi.+
10 Zwino nṋee vhuṱali na nḓivho+ uri ndi kone u ranga phanḓa havha vhathu, ngauri ndi nnyi ane a nga kona u haṱula vhenevha vhathu vhau vhanzhi-vhanzhi?”+
11 Mudzimu a amba na Salomo a ri: “Ngauri lwonolwu ndi lutamo lwa mbilu yau, a wo ngo humbela lupfumo na uri u huliswe kana uri maswina au a fe, a wo ngo humbela u lalama,* fhedzi wo humbela vhuṱali na nḓivho uri u kone u haṱula vhathu vhanga vhe nda u ita khosi yavho,+
12 ndi ḓo u ṋea vhuṱali na nḓivho, fhedzi ndi ḓo dovha nda u ṋea lupfumo na u huliswa u fhira khosi naho i ifhio ye ya vhuya ya vha hone phanḓa hau kana ine ya ḓo vha hone nga murahu hau.”+
13 Salomo a ṱuwa fhethu ha vhurabeli ngei Gibeoni,+ phanḓa ha dennde ḽa muṱangano, a ya Yerusalema; a vhusa Isiraele.
14 Salomo a bvela phanḓa a tshi kuvhanganya gariki nnzhi na bere;* o vha e na gariki dza 1 400 na bere* dza 12 000,+ a dzi vhea miḓini ya gariki,+ dziṅwe a dzi vhea tsini na khosi ngei Yerusalema.+
15 Khosi ya ita uri hu vhe na siḽiva nnzhi na musuku munzhi ngei Yerusalema zwa ḓala sa matombo,+ miṱaululo ya ḓala sa miri ya mihuyu ya ngei Shefela.+
16 Bere dza Salomo dzo vha dzi tshi bva Egipita,+ vha rengelaho khosi thundu vho vha vha tshi renga dzenedzo bere nga masambi* nga mutengo u fanaho.+
17 Mutengo wa gariki ine ya bva Egipita wo vha u shekele* dza siḽiva dza 600, bere i tshi rengwa nga dza 150; vha tshi dzi rumela na kha mahosi oṱhe a Vhahethe na a Siria.
Ṱhaluso dzi re magumoni a siaṱari
^ “Ndi dennde ḽa vhurabeli ḽine ḽa hwalea ḽe ḽa vha ḽi tshi shumiswa nga Vhaisiraele; nga zwiṅwe zwifhinga ḽo vha ḽi tshi vhidzwa ‘dennde ḽa muṱangano.’”
^ Kana “vho vha vha tshi vhudzisa nga Hae henefho.”
^ Thevhedz., “maḓuvha manzhi.”
^ Kana “vhaṋameli vha bere.”
^ Kana “vhaṋameli vha bere.”
^ Kana khamusi, “dzi tshi bva Egipita na Kue; vha rengelaho khosi thundu vho vha vha tshi dzi renga Kue,” khamusi hu khou ambiwa ngei Kilikia.
^ Shekele nthihi i lemela gramu dza 11,4. Sedzani Ṱhume. B14.
