Bugu Ya Vhuvhili Ya Koronika 10:1-19
-
Vhaisiraele vha shandukela Rehabeamu (1-19)
10 Rehabeamu a ya Shikeme,+ ngauri Vhaisiraele vhoṱhe vho vha vho ya Shikeme uri vha mu vhee uri a vhe khosi.+
2 Musi Yerobeamu+ murwa wa Nebatha a tshi tou zwi pfa (o vha a tshi kha ḓi vha Egipita ngauri o vha o shavha Khosi Salomo),+ a vhuya a tshi bva Egipita.
3 Vha ruma muthu a mu vhidza, Yerobeamu na Vhaisiraele vhoṱhe vha ḓa kha Rehabeamu vha ri:
4 “Khotsi au o vha o ri hwesa dzhogo i lemelaho.+ Arali wa ri fhungudzela mushumo wa khotsi au u konḓaho, wa ri leludzela dzhogo i lemelaho* ye khotsi au a ri hwesa yone, ri ḓo vha vhalanda vhau.”
5 A amba navho a ri: “Ni vhuye kha nṋe nga murahu ha maḓuvha mararu.” Ngauralo, vhathu vha ṱuwa.+
6 Khosi Rehabeamu a vhudzisa vhakalaha* vhe vha shumela khotsi awe Salomo musi a tshi kha ḓi tshila, a ri: “Ndi nyeletshedzo ifhio ine na nga nṋea yone uri ndi fhindule avha vhathu?”
7 Vha mu fhindula vha ri: “Arali wa nga fara zwavhuḓi avha vhathu, wa vha takadza, wa vha fhindula zwavhuḓi, vha ḓo dzula vhe vhashumeli vhau.”
8 Naho zwo ralo, a si ṱanganedze nyeletshedzo ye vhakalaha vha mu ṋea yone, a ya a vhudzisa vhaṱhannga vhe a aluwa navho, vho no vhaho vhaḓinḓa vhawe.+
9 A vha vhudzisa a ri: “Ndi nyeletshedzo ifhio ine na nga nṋea yone uri ndi fhindule avha vhathu vhe vha amba na nṋe vha ri, ‘Leludza dzhogo ye khotsi au a ri hwesa yone’?”
10 Vhaṱhannga vhe a aluwa navho vha amba nae vha ri: “Zwine wa fanela u vhudza vhathu vhe vha amba na iwe vha ri: ‘Khotsi au o ri hwesa dzhogo i lemelaho, fhedzi iwe u fanela u ri leludzela yone’; u vha vhudze uri: ‘Munwe wanga muṱuku u ḓo fhira khundu dza khotsi anga nga vhudenya.
11 Khotsi anga o ni hwesa dzhogo i lemelaho, fhedzi nṋe ndi ḓo ni hwesa i lemelesaho. Khotsi anga o vha a tshi ni rwa nga zwimebi, fhedzi nṋe ndi ḓo ni rwa nga zwimebi zwi ṱhavhaho.’”
12 Yerobeamu na vhathu vhoṱhe vha ḓa kha Rehabeamu nga ḓuvha ḽa vhuraru, samusi khosi yo vha yo amba ya ri: “Ni vhuye kha nṋe nga ḓuvha ḽa vhuraru.”+
13 Fhedzi khosi ya vha fhindula nga vhuhali. Khosi Rehabeamu a si ṱanganedze nyeletshedzo ye a ṋewa yone nga vhakalaha.*
14 A vha fhindula a tshi tevhedza nyeletshedzo ya vhaṱhannga, a ri: “Ndi ḓo ita uri dzhogo yaṋu i lemelese, nda dovha nda i engedza. Khotsi anga o vha a tshi ni rwa nga zwimebi, fhedzi nṋe ndi ḓo ni rwa nga zwimebi zwi ṱhavhaho.”
15 Ngauralo, khosi a yo ngo thetshelesa vhathu, ngauri ndi Mudzimu wa ngoho we a ita uri zwithu zwi vhe nga yeneyo nḓila,+ uri hu khunyelele zwe Yehova a zwi vhudza Yerobeamu murwa wa Nebatha a tshi shumisa Ahia+ wa Mushiḽo.
16 Musi Vhaisiraele vhoṱhe vha tshi vhona uri khosi a yo ngo vha thetshelesa, vha fhindula khosi vha ri: “Ri na mukovhe-ḓe na Davida? A ri na ifa kha murwa wa Isai. Hee Isiraele, muṅwe na muṅwe kha ye kha midzimu yawe! Zwino iwe Davida, ṱhogomela nnḓu yau.”+ Nga zwenezwo, Vhaisiraele vha vhuyelela mahayani* avho.+
17 Fhedzi Rehabeamu a bvela phanḓa a tshi vhusa Vhaisiraele vha dzulaho miḓini ya Yuda.+
18 Khosi Rehabeamu a rumela Hadoramu,+ we a vha a tshi langa vhane vha ita mushumo wa khombe-khombe, fhedzi Vhaisiraele vhoṱhe vha mu kanḓa nga matombo u swika a tshi fa. Khosi Rehabeamu a ṱavhanya a ṋamela gariki yawe a shavhela Yerusalema.+
19 Vhaisiraele vha vutshela nnḓu ya Davida u swika na ṋamusi.
Ṱhaluso dzi re magumoni a siaṱari
^ Kana “tsikeledzaho.”
^ Kana “vhahulwane.”
^ Kana “vhahulwane.”
^ Thevhedz., “madenndeni.”
