Bugu Ya Vhuvhili Ya Koronika 11:1-23
11 Musi Rehabeamu a tshi swika Yerusalema, a ṱavhanya a kuvhanganya vha nnḓu yoṱhe ya Yuda na ya Benyamini+ na vhahali vho gudiswaho* vha 180 000, uri a lwe na vha nnḓu ya Isiraele uri a vhuyedzedze muvhuso kha Rehabeamu.+
2 Yehova a amba na Shemaya+ mushumeli wa Mudzimu wa ngoho, a ri:
3 “Amba na Rehabeamu murwa wa Salomo khosi ya Yuda na Vhaisiraele vhoṱhe kha ḽa Yuda na ḽa Benyamini u ri,
4 ‘Zwe Yehova a zwi amba ndi hezwi: “Ni songo ya u lwa na vhahaṋu. Muṅwe na muṅwe nga a vhuyelele nḓuni yawe, ngauri zwo itwa nga nṋe.”’”+ Vha thetshelesa zwe Yehova a zwi amba vha huma, vha si ye vha lwa na Yerobeamu.
5 Rehabeamu a dzula ngei Yerusalema, a fhaṱa miḓi yo tsireledzwaho nga mbondo ngei Yuda.
6 A fhaṱa* ngei Betlehema,+ Etama, Thekoa,+
7 Bethe-tsuri, Soko,+ Adulamu,+
8 Gathi,+ Maresha, Zifi,+
9 Adoraimi, Laxisi,+ Aseka,+
10 Tsora, Ayaloni+ na Heburoni,+ miḓi yo tsireledzwaho nga mbondo kha ḽa Yuda na ḽa Benyamini.
11 A dovha a khwaṱhisa na fhethu ho tsireledzwaho, henefho a vhea vhalangammbi, a vha ṋea zwiḽiwa, mapfura na waini,
12 a isa zwiṱangu zwihulwane na mapfumo miḓini yoṱhe; a i khwaṱhisa vhukuma. A vhusa kha ḽa Yuda na ḽa Benyamini.
13 Vhotshifhe na Vhalevi vha re kha ḽoṱhe ḽa Isiraele vha ima nae, vha tshi bva mashangoni avho oṱhe.
14 Vhalevi vha sia mafulo avho na thundu dzavho+ vha ya Yuda na Yerusalema, ngauri Yerobeamu na vharwa vhawe vho vha vho vha litshisa u shuma sa vhotshifhe vha Yehova.+
15 Yerobeamu a vhea vhotshifhe vhawe fhethu ha vhurabeli+ uri vha shumele madimoni ane a fana na mbudzi+ na ṋamana dze a dzi ita.+
16 Vhoṱhe vhane vha bva kha tshaka dza Isiraele vhe mbilu dzavho dza vha dzo ḓiimisela u ṱoḓa Yehova Mudzimu wa Isiraele vha vha tevhela Yerusalema uri vha ṋekedze Yehova Mudzimu wa vhomakhulukuku wavho zwiṱhavhelo.+
17 Vho khwaṱhisa vhuhosi ha ngei Yuda na u tikedza Rehabeamu murwa wa Salomo miṅwaha miraru, ngauri vho vha vha tshi khou tshimbila nḓilani ya Davida na ya Salomo yeneyo miṅwaha miraru.
18 Rehabeamu a vhinga Mahalathi ṅwananyana wa Yerimothe murwa wa Davida, mme awe o vha e Abihaili ṅwananyana wa Eliaba+ murwa wa Isai.
19 Musi tshifhinga tshi tshi ya a mu bebela vharwa: Yeushi, Shemaria na Sahamu.
20 Nga murahu a vhinga Maaka muḓuhulu wa Abesalomo.+ Musi tshifhinga tshi tshi ya a mu bebela Abia,+ Athai, Ziza na Selomithi.
21 Rehabeamu o vha a tshi funesa Maaka muḓuhulu wa Abesalomo u fhira vhafumakadzi vhawe vhoṱhe na vhafumakadzi vhawe vha vhuimo ha fhasi,*+ sa izwi o vha e na vhafumakadzi vha 18 na vhafumakadzi vha vhuimo ha fhasi* vha 60, o vha e na vharwa vha 28 na vhananyana vha 60.
22 Rehabeamu a vhea Abia murwa wa Maaka uri a vhe ṱhoho na murangaphanḓa kha vhana vhahawe, ngauri o vha a tshi ṱoḓa u mu vhea uri a vhe khosi.
23 Naho zwo ralo, a ita zwithu nga vhuṱali, a balanganyela vharwa vhawe madzinguni oṱhe a Yuda na a Benyamini na miḓini yo tsireledzwaho nga mbondo,+ a vha ṋea zwiḽiwa zwinzhi a vha vhingela vhafumakadzi vhanzhi.
Ṱhaluso dzi re magumoni a siaṱari
^ Thevhedz., “nangwaho.”
^ Kana “khwaṱhisa.”
^ Sedzani Mutevhe Wa Ṱhalutshedzo Ya Maipfi.
^ Sedzani Mutevhe Wa Ṱhalutshedzo Ya Maipfi.
