Bugu Ya Vhuvhili Ya Koronika 13:1-22
13 Nga ṅwaha wa vhu 18 hu tshi khou vhusa Khosi Yerobeamu, Abia a vha khosi kha ḽa Yuda.+
2 O vhusa miṅwaha miraru Yerusalema. Mme awe o vha a tshi pfi Mikaya+ ṅwananyana wa Uriele wa Gibia.+ Ha vha na nndwa vhukati ha Yerobeamu+ na Abia.
3 Ngauralo, Abia a ya nndwani e na mmbi i re na vhahali vho gudiswaho*+ vha 400 000. Na Yerobeamu a ḓilugiselela u lwa nae e na vhahali vho gudiswaho* vha 800 000.
4 Abia a ima kha Thavha ya Tsemaraimi, ine ya vha ngei dzinguni ḽa thavhani dza Efuraimi, a ri: “Thetshelesa, iwe Yerobeamu na Vhaisiraele vhoṱhe.
5 Naa a ni zwi ḓivhi uri Yehova Mudzimu wa Isiraele o vhea Davida uri a vhuse Isiraele lini na lini,+ ene na vharwa vhawe,+ nga mulanga wa muṋo?*+
6 Fhedzi Yerobeamu+ murwa wa Nebatha, mushumeli wa Salomo murwa wa Davida, o shandukela muṋe wawe.+
7 Vhanna vhavhi vha si na mushumo vha ima nae. Vha vha na maanḓa u fhira Rehabeamu murwa wa Salomo musi Rehabeamu a tshi kha ḓi vha muṱuku a sa ḓifhulufheli, a sa koni u lwa navho.
8 “Zwino iwe u humbula uri u nga kona u lwa na muvhuso wa Yehova u re zwanḓani zwa vharwa vha Davida, ngauri iwe u gogo ḽihulu, u na ṋamana dza musuku dze Yerobeamu a dzi vhumba uri dzi vhe midzimu yau.+
9 Naa a si iwe we wa pandela vhotshifhe vha Yehova,+ vhana vha Aroni na Vhalevi, wa ḓinangela vhotshifhe vhau u fana na vhathu vha maṅwe mashango?+ Muṅwe na muṅwe we a vha a tshi ḓa na mbohwana na thutha dza sumbe o vha a tshi vha tshifhe kha zwine zwi si vhe midzimu.
10 Riṋe Mudzimu washu ndi Yehova,+ riṋe a ro ngo mu laṱa; vhotshifhe vhashu, vhana vha Aroni, vha khou shumela Yehova, vha khou thuswa nga Vhalevi kha wonoyu mushumo.
11 Vha dubisela Yehova zwifhiwa zwa u fhiswa nga matsheloni maṅwe na maṅwe na nga madekwana+ maṅwe na maṅwe khathihi na zwioro zwi nukhelelaho;+ vha vhea vhurotho ha ṱano+ nṱha ha ṱafula ya musuku vhukuma, vha funga tshiṱomambone tsha musuku+ na mbone dzatsho madekwana maṅwe na maṅwe,+ ngauri ri khou ita zwe Yehova Mudzimu washu a ri vhudza; fhedzi inwi no mu laṱa.
12 Mudzimu wa ngoho u na riṋe, u khou ri ranga phanḓa, e na vhotshifhe vhawe, vha lidza phalaphala dza nndwa uri ri lwe na inwi. Inwi vhanna vha Isiraele, ni songo lwa na Yehova Mudzimu wa vhomakhulukuku waṋu, ngauri a ni nga kundi.”+
13 Fhedzi Yerobeamu a ruma mmbi uri i vha lalele nga murahu, ene a sala o livhana na Vhayuda, mmbi yo vha lalela nga murahu.
14 Musi Vhayuda vha tshi rembuluwa, vha vhona uri vha fanela u lwa na mmbi i re nga phanḓa havho na nga murahu havho. Vha vhidzelela Yehova,+ ngeno vhotshifhe vha tshi khou lidzela nṱha phalaphala.
15 Vhanna vha Yuda vha ṱavha mukosi muhulu wa nndwa, musi vhenevho vhanna vha Yuda vha tshi khou ṱavha mukosi wa nndwa, Mudzimu wa ngoho a kunda Yerobeamu na Vhaisiraele vhoṱhe phanḓa ha Abia na Vhayuda.
16 Vhaisiraele vha shavha Vhayuda, Mudzimu a vha kumedzela zwanḓani zwavho.
17 Abia na vhathu vhawe vha vhulaya vhathu vhanzhi, ha vhulawa vhanna vha Isiraele vha 500 000 vho gudiswaho.*
18 Nga zwenezwo, vhanna vha Isiraele vha kundwa nga tshenetsho tshifhinga, fhedzi vhanna vha Yuda vha kunda ngauri vho vha vha tshi fhulufhela* Yehova Mudzimu wa vhomakhulukuku wavho.+
19 Abia a pandamedza Yerobeamu, a thuba miḓi yawe, Bethele+ na miḓana ya nga tsini,* Yeshana na miḓana ya nga tsini na Efuraini+ na miḓana ya nga tsini.
20 Yerobeamu a si tsha dovha a vha na maanḓa tshifhingani tsha Abia; Yehova a mu rwa, a fa.+
21 Fhedzi Abia a vha na maanḓa. Musi tshifhinga tshi tshi ya a vhinga vhafumakadzi vha 14,+ a beba vharwa vha 22 na vhananyana vha 16.
22 Mafhungo oṱhe a Abia, zwe a ita na zwe a amba, zwo ṅwaliwa maṅwaloni a* muporofita Ido.+
Ṱhaluso dzi re magumoni a siaṱari
^ Thevhedz., “nangwaho.”
^ Thevhedz., “nangwaho.”
^ Ndi mulanga wa lini na lini na u sa shanduki.
^ Thevhedz., “nangwaho.”
^ Thevhedz., “ḓitika nga.”
^ Kana “yo u tangaho.”
^ Kana “zwo ṅwaliwa nga vhuḓalo nga; zwo ṱalutshedzwa nga.”
