Bugu Ya Vhuvhili Ya Koronika 14:1-15
14 Abia a vhulungwa na vhomakhulukuku wawe Muḓini wa Davida;+ murwa wawe Asa a vha khosi vhudzuloni hawe. Misini yawe shango ḽa lala lwa miṅwaha ya fumi.
2 Asa o ita zwithu zwavhuḓi na zwo lugaho phanḓa ha Yehova Mudzimu wawe.
3 O thutha aḽeṱare+ dzi sili na fhethu ha vhurabeli, a kwasha phuphu khethwa,+ a rema thanda khethwa.*+
4 Zwiṅwe hafhu, a vhudza Vhayuda uri vha ṱoḓe Yehova Mudzimu wa vhomakhulukuku wavho na uri vha tevhedze Mulayo na ndaela.
5 Nga fhasi ha muvhuso wawe a thutha fhethu ha vhurabeli na hune ha ṱomiwa hone zwioro+ miḓini yoṱhe ya Yuda, muvhusoni wawe ḽa dzula ḽo lala.
6 A fhaṱa miḓi yo tsireledzwaho nga mbondo ngei Yuda,+ samusi shango ḽo vha ḽo lala hu si na we a lwa nae nga yeneyo miṅwaha, ngauri Yehova o vha o ladza shango ḽawe.+
7 A amba na Vhayuda a ri: “Kha ri fhaṱe heyi miḓi ri i tange nga mbondo na mitsheṱo,+ nga dzikhoro* na nga dzitsimbi. Shango ḽi kha ḓi vha ḽashu ngauri ro ṱoḓa Yehova Mudzimu washu. Ro mu ṱoḓa, o ri ladzela shango thungo dzoṱhe.” Ngauralo, vha fhedza zwe vha vha vha tshi khou fhaṱa.+
8 Asa o vha e na mmbi ya vhanna vha 300 000 vha bvaho Yuda, vho ḓiṱamaho nga zwiṱangu zwihulwane na mapfumo. Kha lushaka lwa Benyamini, hu na vhahali vha 280 000 vhane vha hwala zwiṱangu zwiṱuku,* vho ḓiṱama nga vhura.+
9 Nga murahu Zera wa Muetopia a ḓa a lwa navho e na mmbi ya vhanna vha 1 000 000 na gariki dza 300.+ Musi a tshi swika Maresha,+
10 Asa a bva uri a ḓilugiselele u lwa nae Govhani ḽa Tsefatha ngei Maresha.
11 Asa a vhidzelela Yehova Mudzimu wawe+ a ri: “Iwe Yehova, a u na ndavha na uri vhane wa khou vha thusa ndi vhanzhi kana a vha na maanḓa.+ Ri thuse Iwe Yehova Mudzimu washu, ngauri ro fhulufhela* iwe,+ ro ḓa u lwa na heḽi gogo+ nga dzina ḽau. Iwe Yehova, u Mudzimu washu. U songo tenda u kundwa nga muthu.”+
12 Yehova a kunda Vhaetopia phanḓa ha Asa na phanḓa ha Vhayuda, Vhaetopia vha shavha.+
13 Asa na vhathu vhe a vha e navho vha vha pandamedza vha vha swikisa Gerara,+ Vhaetopia vhoṱhe vha vhulawa hu si sale na muthihi wavho a tshi khou tshila, ngauri vho vha vho kundwa nga Yehova na mmbi yawe. Nga murahu, vha thuba thundu nnzhi vhukuma.
14 Vha dovha vha kunda miḓi yoṱhe u mona na Gerara, ngauri Yehova o ita uri vha ofhe; vha dzhia thundu miḓini yoṱhe, ngauri ho vha hu na thundu nnzhi ye vha vha vha tshi nga i dzhia henefho.
15 Vha dovha vha vutshela madennde a vhane vha vha na zwifuwo, vha thuba zwifuwo zwinzhi-zwinzhi na gamela, nga murahu vha humela Yerusalema.
Ṱhaluso dzi re magumoni a siaṱari
^ Sedzani Mutevhe Wa Ṱhalutshedzo Ya Maipfi.
^ Thevhedz., “mavothi.”
^ Kanzhi zwi farwa nga vhapfuli vha misevhe.
^ Thevhedz., “ḓitika nga.”
