Bugu Ya Vhuvhili Ya Koronika 17:1-19
17 Murwa wawe Yehoshafati+ a vha khosi vhudzuloni hawe, a khwaṱhisa vhuimo hawe kha ḽa Isiraele.
2 A vhea mmbi miḓini yoṱhe ya Yuda yo tsireledzwaho nga mbondo na tshigwada tsha maswole shangoni ḽa Yuda na miḓini yo thubiwaho nga khotsi awe Asa shangoni ḽa Efuraimi.+
3 Yehova a bvela phanḓa e na Yehoshafati ngauri o tshimbila nḓilani dza kale dza Davida+ makhulukuku wawe, ho ngo ṱoḓa Vhobaali.
4 Ngauri o ṱoḓa Mudzimu wa khotsi awe+ na u tevhedza ndaela yawe, a si tevhedze maitele a Vhaisiraele.+
5 Yehova a khwaṱhisa muvhuso wawe zwanḓani zwawe;+ Vhayuda vhoṱhe vha bvela phanḓa vha tshi ṋea Yehoshafati zwifhiwa, a vha na lupfumo luhulu a huliswa.+
6 A vha na tshivhindi musi a tshi tevhedza nḓila dza Yehova, a thutha fhethu ha vhurabeli+ na thanda khethwa*+ kha ḽa Yuda.
7 Nga ṅwaha wa vhuraru wa vhuhosi hawe a vhidza vhakololo vhawe, Benihaili, Obadia, Sakaria, Nethaniele na Mikaya a vha ruma uri vha funze miḓini ya Yuda.
8 Vho vha vhe na Vhalevi: Shemaya, Nethania, Sebadiya, Asahele, Shemiramothe, Yehonathani, Adonia, Tobia na Thobo-adonia khathihi na vhotshifhe Elishama na Yehoramu.+
9 Vha thoma u funza ngei Yuda, vho fara bugu ya Mulayo wa Yehova,+ vha mona na miḓi yoṱhe ya Yuda vha tshi funza vhathu.
10 Yehova a ita uri mivhuso yoṱhe ya mashango o tangaho Yuda i dzhenwe nga nyofho, ya si tsha lwa na Yehoshafati.
11 Vhafilisita vha ḓisela Yehoshafati zwifhiwa na tshelede zwa u luvha. Vhaarabu vha mu ḓisela thutha dza 7 700 na zwibokoṱo zwa 7 700 zwi bvaho kha masambi avho.
12 Yehoshafati a vha na maanḓa mahulu,+ a bvela phanḓa a tshi fhaṱa fhethu ho tsireledzeaho+ na miḓi ya u vhulungela+ zwithu ngei Yuda.
13 A shuma mishumo minzhi miḓini ya Yuda, o vha e na maswole a vhahali ngei Yerusalema.
14 Vhenevha vho vha vho kuvhanganywa u ya nga miṱa ya vhokhotsi avho: kha lushaka lwa Yuda, vhalangammbi vha vha zwigidi, vho vha vhe na mulangammbi Adana we a vha e na vhahali vha 300 000.+
15 A tevhelwa nga mulangammbi Yehohanani we a vha e na vha 280 000.
16 A dovha a tevhelwa nga mulangammbi Amasia murwa wa Sikiri, we a shumela Yehova nga u ḓifunela, o vha e na vhahali vha 200 000.
17 Kha lwa Benyamini+ o vha e Eliada, muhali we a vha e na vhanna vha 200 000 vho ḓiṱamaho nga vhura na zwiṱangu.+
18 A tevhelwa nga mulangammbi Yehosabada, we a vha e na vhanna vha 180 000 vho ḓiṱamelaho u lwa.
19 Ndi vhone vhe vha shumela khosi hu sa vhalwi vhe khosi ya vha vhea miḓini yo tsireledzwaho nga mbondo kha ḽoṱhe ḽa Yuda.+
Ṱhaluso dzi re magumoni a siaṱari
^ Sedzani Mutevhe Wa Ṱhalutshedzo Ya Maipfi.