Bugu Ya Vhuvhili Ya Koronika 2:1-18
-
Hu lugiselelwa u fhaṱa thembele (1-18)
2 Salomo a ṋea ndaela ya uri hu fhaṱwe nnḓu ya dzina ḽa Yehova+ na nnḓu* ya muvhuso wawe.+
2 Salomo a nanga vhanna vha 70 000 sa vhashumi zwavho* na vha 80 000 uri vha vhe vhavhaḓi vha matombo dzithavhani+ na vha 3 600 uri vha vhe vhalangi vhavho.+
3 Zwiṅwe hafhu, Salomo a rumela mulaedza kha Hiramu+ khosi ya Tiro a ri: “Nthumele thanda dza muṱaululo sa zwe wa itela Davida khotsi anga musi u tshi mu rumela thanda dza muṱaululo uri a fhaṱe nnḓu* ya u dzula khayo.+
4 Zwino nṋe ndi ḓo fhaṱela dzina ḽa Yehova Mudzimu wanga nnḓu, nda i ita uri i vhe khethwa khae, na uri ndi fhise zwioro zwi nukhelelaho+ phanḓa hawe, ndi dovhe ndi ṋekedze vhurotho ha ṱano+ na zwifhiwa zwa u fhiswa, nga matsheloni na nga madekwana,+ nga Dzisavhatha,+ nga ṅwedzi muswa+ na nga zwifhinga zwa vhuṱambo+ ha Yehova Mudzimu washu. Ndi yone ndaela ya Vhaisiraele ya lini na lini.
5 Nnḓu ine nda ḓo i fhaṱa i ḓo vha khulu, ngauri Mudzimu washu ndi muhulwane u fhira miṅwe midzimu yoṱhe.
6 Hone ndi nnyi ane a nga kona u mu fhaṱela nnḓu? Ngauri ha fheleli kha ḽiṱaḓulu ḽa maṱaḓulu,+ zwino nṋe ndi tou vha nnyi ane a nga mu fhaṱela nnḓu? Zwine nda nga zwi ita ndi u mu fhaṱela fhethu ha u dubisela zwiṱhavhelo phanḓa hawe.
7 Zwino nthumele mutsila a re na vhukoni ha u shuma nga musuku, siḽiva, koporo,+ tsimbi, wuḽu ya phephulu, harane tswuku na harane ya muvhala wa lutombo na ane a kona u kora mikhavhiso. U ḓo shuma ngei Yuda na ngei Yerusalema na vhatsila vhanga vha re na vhukoni, vhe Davida khotsi anga a vha nanga.+
8 U nthumele na matanda a muṱaululo, a mudzhunipa+ na a muaḽigamu+ wa Libanoni, ngauri ndi a zwi ḓivha zwavhuḓi uri vhashumeli vhau vha na vhukoni ha u rema miri ya Libanoni.+ Vhashumeli vhanga vha ḓo shuma na vhashumeli vhau+
9 uri vha nndugisele mabulannga manzhi, ngauri nnḓu ine nda ḓo i fhaṱa i ḓo vha khulu nga nḓila i mangadzaho.
10 Ndi ḓo ṋea vhashumi vhau+ na vharemi vha miri zwiḽiwa: koro* dza 20 000 dza goroi, koro dza 20 000 dza baḽi, nkho* dza 20 000 dza waini na nkho dza 20 000 dza mapfura.”
11 Hiramu khosi ya Tiro a ṅwalela Salomo mulaedza une wa ri: “Ngauri Yehova u funa vhathu vhawe, o u vhea uri u vhe khosi yavho.”
12 Hiramu a ri: “Nga hu rendwe Yehova Mudzimu wa Isiraele, we a sika ḽiṱaḓulu na ḽifhasi, ngauri o ṋea Khosi Davida murwa o ṱalifhaho,+ a re na nḓivho na ṱhalukanyo,+ ane a ḓo fhaṱa nnḓu ya Yehova na nnḓu ya muvhuso wawe.
13 Zwino ndi khou u rumela Hiramu-abi+ mutsila a re na vhukoni, a re na ṱhalukanyo,
14 ndi murwa wa mufumakadzi wa Mudani, fhedzi khotsi awe o vha e munna wa ngei Tiro; u na vhukoni ha u shuma nga musuku, siḽiva, koporo, tsimbi, matombo, matanda, wuḽu ya phephulu, harane ya muvhala wa lutombo, malabi avhuḓi na harane tswuku.+ A nga kona u kora tshiṅwe na tshiṅwe na u ita tshiṅwe na tshiṅwe tshine a ṋewa uri a tshi ite.+ U ḓo shuma na vhatsila vhau vha re na vhukoni na vhatsila vha re na vhukoni vha muṋe wanga Davida khotsi au.
15 Zwino muṋe wanga nga a rumele goroi, baḽi, mapfura na waini zwe a fhulufhedzisa vhashumeli vhawe.+
16 Ri ḓo rema miri minzhi ya Libanoni+ u ya nga hune wa i ṱoḓa ngaho, ra u ḓisela yone nga madzanda nga lwanzheni ra i swikisa Yope;+ iwe u ḓo i dzhia wa i gonyisa Yerusalema.”+
17 Salomo a vhala vhanna vhoṱhe vha re vhatsinda shangoni ḽa Isiraele,+ nga murahu ha u vhaliwa ha vhathu he ha itwa nga Davida khotsi awe,+ ha waniwa vhe 153 600.
18 Vha 70 000 vha vha vhashumi zwavho,* vha 80 000 vha vha vhavhaḓi vha matombo+ dzithavhani, vha 3 600 vha vha vhalangi vhavho.+
Ṱhaluso dzi re magumoni a siaṱari
^ Kana “pfamo.”
^ Kana “sa vhahwali vha mihwalo.”
^ Kana “pfamo.”
^ Koro nthihi i lingana na ḽithara dza 220. Sedzani Ṱhume. B14.
^ Nga Tshihevheru ndi “bathi,” ine ya lingana na ḽithara dza 22. Sedzani Ṱhume. B14.
^ Kana “vhahwali vha mihwalo.”
