Bugu Ya Vhuvhili Ya Koronika 21:1-20
21 Yehoshafati a vhulungwa na vhomakhulukuku wawe Muḓini wa Davida; murwa wawe Yehoramu a vha khosi vhudzuloni hawe.+
2 Vharathu vhawe, vharwa vha Yehoshafati vho vha vhe Asaria, Yehiele, Sakaria, Asaria, Mikaele na Shefatia; vhenevha vhoṱhe vho vha vhe vharwa vha Khosi Yehoshafati wa Isiraele.
3 Vho vha vho ṋewa zwifhiwa zwinzhi zwa siḽiva na musuku na zwithu zwa mutengo muhulu nga khotsi avho, khathihi na miḓi yo tsireledzwaho nga mbondo ngei Yuda;+ fhedzi a ṋea Yehoramu+ tanzhe ḽawe muvhuso.
4 Musi Yehoramu a tshi vho vhusa muvhusoni wa khotsi awe, a khwaṱhisa vhuimo hawe nga u vhulaya vharathu vhawe vhoṱhe+ nga banga, khathihi na vhaṅwe vhakololo vha Isiraele.
5 Yehoramu o vha e na miṅwaha ya 32 musi a tshi vha khosi, o vhusa miṅwaha ya malo Yerusalema.+
6 O tevhedza zwe zwa itwa nga mahosi a Isiraele,+ u fana na zwo itwaho nga vha nnḓu ya Ahaba, ngauri o vha o vhinga ṅwananyana wa Ahaba;+ a bvela phanḓa a tshi ita zwi sa takadzi Yehova.
7 Fhedzi Yehova ho ngo ṱoḓa u fhelisa nnḓu ya Davida a tshi itela mulanga we a u vhofha na Davida,+ samusi o vha o fhulufhedzisa uri u ḓo ṋea ene na vharwa vhawe luvhone lini na lini.+
8 Misini yawe Vhaedomo vha shandukela Yuda,+ vha ḓivhetshela khosi.+
9 Yehoramu na vhalangammbi vhawe vha wetshela seli na gariki dzawe dzoṱhe, a vuwa vhukati ha vhusiku a vhulaya Vhaedomo vho tangaho ene na vhalangi vha gariki.
10 Fhedzi Vhaedomo vho bvela phanḓa vha tshi shandukela Yuda u swika na ṋamusi. Na muḓi wa Libina+ wa mu shandukela nga tshenetsho tshifhinga, ngauri o vha o laṱa Yehova Mudzimu wa vhomakhulukuku wawe.+
11 O dovha a ita na fhethu ha vhurabeli+ thavhani dza Yuda uri vhadzulapo vha Yerusalema vha si fhulufhedzee kha Mudzimu,* a xedza Vhayuda.
12 Mafheleloni muporofita Elia+ a mu ṅwalela luṅwalo lune lwa ri: “Yehova Mudzimu wa Davida makhulukuku wau u ri: ‘A wo ngo tshimbila nḓilani dza khotsi au Yehoshafati+ kana nḓilani dza Khosi Asa+ wa Yuda.
13 Fhedzi wo tshimbila nḓilani ya mahosi a Isiraele,+ wa ita uri Vhayuda na vhadzulapo vha Yerusalema vha si fhulufhedzee kha Mudzimu*+ u fana na zwe zwa itwa nga vha nnḓu ya Ahaba,+ wo ita na u vhulaya vharathu vhau,+ vha muṱani wa khotsi au, vha re khwine u u fhira.
14 Yehova u ḓo pfisa vhuṱungu vhuhulu vhathu vhau, vharwa vhau, vhafumakadzi vhau na zwoṱhe zwine zwa vha zwau.
15 Iwe u ḓo farwa nga malwadze manzhi, u katela na vhulwadze ha mala, u swika mala au a tshi bvela nnḓa zwi tshi itiswa nga u lwala ḓuvha ḽiṅwe na ḽiṅwe.’”
16 Yehova a ṱuṱuwedza+ Vhafilisita*+ na Vhaarabu+ vha dzulaho tsini na Vhaetopia uri vha lwe na Yehoramu.
17 Vha vutshela Vhayuda, vha dzhia thundu yoṱhe ye vha i wana nḓuni* ya khosi,+ u katela na vharwa vhawe na vhafumakadzi vhawe; a salelwa nga murwa wawe ane a pfi Yoahasi*+ murwa wawe wa lupedzi.
18 Nga murahu, Yehova a mu ḓisela vhulwadze ha mala vhu sa fholi.+
19 Musi ho no fhela tshifhinga, ho no fhela miṅwaha mivhili, mala awe a bvela nnḓa nga nṱhani ha vhulwadze hawe, a fa a tshi khou tambudzwa vhukuma nga honoho vhulwadze; vhathu vhawe a vho ngo mu vhasela mulilo sa zwe vha vhasela vhomakhulukuku wawe.+
20 O vha e na miṅwaha ya 32 musi a tshi vha khosi, o vhusa miṅwaha ya malo e Yerusalema. A hu na na muthihi we a pfa vhuṱungu musi a tshi fa. Vha mu vhulunga Muḓini wa Davida,+ fhedzi ho ngo vhulungwa mavhiḓani a mahosi.+
Ṱhaluso dzi re magumoni a siaṱari
^ Kana “vha ite vhupombwe ha lwa muya.”
^ Kana “vha ita vhupombwe ha lwa muya.”
^ Thevhedz., “muya wa Vhafilisita.”
^ Kana “pfamoni.”
^ U dovha a pfi Ahasia.
