Bugu Ya Vhuvhili Ya Koronika 23:1-21
23 Nga ṅwaha wa vhusumbe, Yehoyada a vha na tshivhindi, a vhofha mulanga na vhane vha ranga phanḓa vha maḓana,+ vhenevho vho vha vhe Asaria murwa wa Yerohamu, Ishimaele murwa wa Yehohanani, Asaria murwa wa Obede, Maaseya murwa wa Adaya na Elishafati murwa wa Sikiri.
2 Vha tshimbila na ḽoṱhe ḽa Yuda vha kuvhanganya Vhalevi+ vha bvaho miḓini yoṱhe ya Yuda na vharangaphanḓa vha miṱa ya vhokhotsi vha Isiraele. Musi vha tshi swika Yerusalema,
3 tshivhidzo tshoṱhe tsha vhofha mulanga+ na khosi nḓuni ya Mudzimu wa ngoho, nga murahu Yehoyada a amba navho a ri:
“Murwa wa khosi u ḓo vhusa, sa zwe Yehova a zwi fhulufhedzisa nga ha vharwa vha Davida.+
4 Zwine na fanela u zwi ita ndi hezwi: Tshigwada tshithihi kha zwiraru tsha vhotshifhe na Vhalevi tshine tsha ḓo shuma+ nga Savhatha, tshi ḓo linda miṋango;+
5 tshiṅwe tshigwada tshi ḓo vha tshi nḓuni* ya khosi,+ tshiṅwe tshigwada tshi ḓo vha tshi Khoroni ya Mutheo, vhaṅwe vhathu vhoṱhe vha ḓo vha vhe miṱani ya nnḓu ya Yehova.+
6 Ni songo tendela muthu na muthihi a tshi dzhena nḓuni ya Yehova, fhedzi hu dzhene vhotshifhe na Vhalevi vhane vha shuma henefho.+ Vhenevho vha nga dzhena ngauri ndi tshigwada tshikhethwa, vhathu vhoṱhe vha tevhedze zwe Yehova a vha laya.
7 Vhalevi vha tange khosi thungo dzoṱhe, muṅwe na muṅwe a fare zwiṱhavhane zwawe. Ane a dzhena nḓuni u ḓo vhulawa. Ni dzule ni na khosi hune ya ya.”*
8 Vhalevi na Vhayuda vhoṱhe vha ita zwe tshifhe Yehoyada a vha laedza zwone. Muṅwe na muṅwe a dzhia vhanna vhawe vha shumaho nga Savhatha na vha sa shumi nga Savhatha,+ ngauri tshifhe Yehoyada o vha a sa athu u vhofholola zwiṅwe zwigwada+ mishumoni yazwo.
9 Tshifhe Yehoyada a ṋea vhane vha ranga phanḓa vha maḓana+ mapfumo na zwiṱangu zwiṱuku* na zwiṱangu zwa Khosi Davida,+ zwe zwa vha zwi nḓuni ya Mudzimu wa ngoho.+
10 A imisa vhathu vhoṱhe, vho fara zwiṱhavhane, vho ima thungo ya tsha u ḽa tsha nnḓu na thungo ya tsha monde tsha nnḓu, tsini na aḽeṱare na nnḓu, vhoṱhe vho tanga khosi.
11 Vha bvisela murwa wa khosi+ nnḓa, vha mu ambadza khare, vha mu ṋea Vhuṱanzi,*+ vha mu vhea uri a vhe khosi, Yehoyada na vharwa vhawe vha mu ḓodza. Ngauralo, vha ri: “Khosi nga i lalame!”+
12 Musi Athalia a tshi pfa phosho ya vhathu vha tshi khou gidima na u luvha khosi, a ṱavhanya a ḓa kha vhathu vha re nḓuni ya Yehova.+
13 A vhona khosi yo ima henefho tsini na phuphu muṋangoni. Vhakololo+ na vhalidzi vha phalaphala vho vha vhe na khosi, vhathu vhoṱhe shangoni vho vha vho takala+ vha tshi khou lidza phalaphala, vhaimbi vhane vha khou lidza zwilidzo vho vha vho ranga phanḓa musi hu tshi khou rendiwa. Nga zwenezwo, Athalia a kherukanya zwiambaro zwawe a vhidzelela a ri: “Ndi tshimbevha! Ndi tshimbevha!”
14 Fhedzi tshifhe Yehoyada a bvisa vhane vha ranga phanḓa vha maḓana, vho vhewaho uri vha lange mmbi, a ri: “Mu bviseni vhukati ha vhathu, ane a mu tevhela, a vhulawe nga banga!” Ngauri tshifhe o vha o ri: “A songo vhulawa nḓuni ya Yehova.”
15 Vha mu fara, musi a tshi swika muṋangoni wa Khoro ya Bere wa nnḓu* ya khosi, vha mu vhulayela henefho.
16 Yehoyada a vhofha mulanga na vhathu vhoṱhe na khosi, uri vha ḓo bvela phanḓa vhe vhathu vha Yehova.+
17 Nga murahu ha zwenezwo vhathu vhoṱhe vha ḓa nḓuni* ya Baali vha i thutha,+ vha kwashekanya aḽeṱare dzawe na zwifanyiso zwawe,+ vha vhulaya Matani tshifhe wa Baali+ phanḓa ha dziaḽeṱare.
18 Yehoyada a vhea vhotshifhe na Vhalevi uri vha ṱhogomele nnḓu ya Yehova, ndi vhe Davida a vha o vha vhea nga zwigwada uri vha ṱhogomele nnḓu ya Yehova uri vha ṋekedze Yehova zwiṱhavhelo zwa u fhiswa+ sa zwe zwa ṅwaliwa kha Mulayo wa Mushe,+ vho takala vha tshi khou imba, sa zwe Davida a vha laya.
19 O dovha a vhea na vhalindakhoro+ khoroni dza nnḓu ya Yehova uri hu si vhe na muthu na muthihi a re na tshika ane a dzhena.
20 A dzhia vhane vha ranga phanḓa vha maḓana,+ vharangaphanḓa, vhavhusi vha vhathu na vhathu vhoṱhe vha shango, vha fhelekedza khosi i tshi bva nḓuni ya Yehova. Vha fhira nga khoro ya nṱha vha dzhena nḓuni* ya khosi vha dzudza khosi kha khuluṋoni+ ya muvhuso.+
21 Vhathu vhoṱhe vha ḽeneḽo shango vha takala, muḓini ha dzika, ngauri vho vhulaya Athalia nga banga.
Ṱhaluso dzi re magumoni a siaṱari
^ Kana “pfamoni.”
^ Thevhedz., “musi i tshi bva na musi i tshi dzhena.”
^ Kanzhi zwi farwa nga vhapfuli vha misevhe.
^ Khamusi ndi mupombo u re na Mulayo wa Mudzimu.
^ Kana “pfamo.”
^ Kana “thembeleni.”
^ Kana “pfamoni.”
