Bugu Ya Vhuvhili Ya Koronika 24:1-27
24 Yehoashi o vha e na miṅwaha ya sumbe musi a tshi vha khosi,+ o vhusa miṅwaha ya 40 Yerusalema. Mme awe o vha a tshi pfi Tsibiya a tshi bva Beresaba.+
2 Yehoashi o bvela phanḓa a tshi ita zwo lugaho phanḓa ha Yehova misini yoṱhe ya tshifhe Yehoyada.+
3 Yehoyada a mu vhingela vhafumakadzi vhavhili, a beba vharwa na vhananyana.
4 Lwo vha lu lutamo lwa Yehoashi lwa uri a vusuluse nnḓu ya Yehova.+
5 A kuvhanganya vhotshifhe na Vhalevi a amba navho a ri: “Iyani miḓini ya Yuda ni kuvhanganye tshelede kha Vhaisiraele vhoṱhe ya u lugisa nnḓu ya Mudzimu+ waṋu ṅwaha muṅwe na muṅwe; ni zwi ite nga u ṱavhanya.” Fhedzi Vhalevi vha si zwi ite nga u ṱavhanya.+
6 Ngauralo, khosi ya vhidza murangaphanḓa Yehoyada ya amba nae ya ri:+ “Ndi ngani u songo ita uri Vhalevi vha ḓise muthelo mukhethwa wa vhathu vha Yuda na vha Yerusalema we wa laedzwa nga Mushe+ mushumeli wa Yehova, muthelo mukhethwa wa tshivhidzo tsha Isiraele, wa dennde ḽikhethwa ḽi re na mbulungelo ya mulanga?+
7 Ngauri vharwa vha Athalia,+ uḽa mufumakadzi muvhi, vho kwasha nnḓu ya Mudzimu wa ngoho,+ vho shumisa zwithu zwoṱhe zwikhethwa zwa nḓuni ya Yehova vha tshi itela Vhobaali.”
8 Khosi ya laedza uri hu itwe bogisi,+ ḽi vhewe nnḓa khoroni ya nnḓu ya Yehova.+
9 Nga murahu ha zwenezwo, ha itwa nḓivhadzo kha ḽoṱhe ḽa Yuda na ḽa Yerusalema uri hu ḓiselwe Yehova muthelo mukhethwa+ we Mushe mushumeli wa Mudzimu wa ngoho a u bvisisa Vhaisiraele sogani.
10 Vhakololo vhoṱhe na vhathu vhoṱhe vha takala,+ vha ḓisa miṋeelo vha i dzhenisa bogisini u swika ḽi tshi ḓala.
11 Musi Vhalevi vha tshi isa bogisi kha khosi, vha tshi vhona uri ḽi na tshelede nnzhi, muṅwaleli wa khosi na muthusi wa muhulwane wa vhotshifhe, vho vha vha tshi ḓa vha shulula bogisi,+ nga murahu vha ḽi humisela vhudzuloni haḽo. Vho vha vha tshi ita zwenezwo ḓuvha ḽiṅwe na ḽiṅwe, vha kuvhanganya tshelede nnzhi.
12 Nga murahu khosi na Yehoyada vho vha vha tshi ṋea tshelede vhane vha langa mishumo ya nḓuni ya Yehova, vha tshi thola vhavhaḓi vha matombo na vhanna vha re na vhutsila uri vha vusuluse nnḓu ya Yehova,+ khathihi na vhane vha shuma nga tsimbi na koporo uri vha lugise nnḓu ya Yehova.
13 Vha langaho wonoyo mushumo wa u lugisa vha ita uri u thome, wa bvela phanḓa u tshi livhiswa ngavho, vha vusulusa nnḓu ya Mudzimu wa ngoho ya vha kha vhuimo ho teaho, vha dovha vha i khwaṱhisa.
14 Musi vha tshi tou fhedza, vha dzhia tshelede yo salaho vha i ḓisa ha khosi na ha Yehoyada, vha i shumisela u ita thundu ya nḓuni ya Yehova, thundu ya u shuma na ya u ṋekedza zwifhiwa na zwinwelo zwa musuku na zwa siḽiva.+ Vho vha vha tshi ṋekedza zwiṱhavhelo zwa u fhiswa+ nḓuni ya Yehova tshifhinga tshoṱhe misini ya Yehoyada.
15 Musi Yehoyada o no kalaha, o no lalama, a fa; o vha e na miṅwaha ya 130 musi a tshi fa.
16 Vha mu vhulunga Muḓini wa Davida hune ha vha na maṅwe mahosi,+ ngauri o ita zwithu zwavhuḓi ngei Isiraele+ a tshi itela Mudzimu wa ngoho na nnḓu ya Mudzimu.
17 Musi Yehoyada o no fa, vhakololo vha Yuda vha ḓa vha luvha khosi, khosi ya vha thetshelesa.
18 Vha ṱutshela nnḓu ya Yehova Mudzimu wa vhomakhulukuku wavho vha thoma u shumela thanda khethwa* na midzimu ya zwifanyiso, Mudzimu a sinyutshela Yuda na Yerusalema nga mulandu wavho.
19 Yehova a ruma vhaporofita khavho uri vha vhuyelele khae, vha ḓi vha tsivhudza, fhedzi vha si thetshelese.+
20 Muya wa Mudzimu wa ḓa kha Sakaria murwa wa tshifhe Yehoyada,+ a ima phanḓa ha vhathu a amba navho a ri: “Zwe Mudzimu wa ngoho a amba ndi hezwi: ‘Ndi ngani ni tshi khou pfuka ndaela dza Yehova? Zwi nga si ni nakele! Ngauri no laṱa Yehova, na inwi u ḓo ni laṱa.’”+
21 Fhedzi vha mu itela tshimbevha,+ vha mu kanḓa nga matombo muṱani wa nnḓu ya Yehova+ vho laedzwa nga khosi.
22 Nga zwenezwo, Khosi Yehoashi ho ngo tsha humbula lufuno lu sa shanduki lwe khotsi* awe Yehoyada a mu sumbedza lwone, a vhulaya murwa wawe, musi a tshi khou fa a ri: “Ngavhe Yehova a tshi lifhedza zwiito zwau.”+
23 Mathomoni a ṅwaha Vhasiria vha ḓa vha lwa na Yehoashi, vha vutshela Yuda na Yerusalema.+ Vha vhulaya vhakololo vhoṱhe+ vha vhathu, vha rumela zwoṱhe zwe vha thuba ha khosi ya Damaseko.
24 Naho mmbi ya Vhasiria ye ya vha vutshela yo vha i na vhanna vha si gathi, Yehova o kumedzela mmbi khulu khayo,+ ngauri vho vha vho laṱa Yehova Mudzimu wa vhomakhulukuku wavho; vha* pfisa Yehoashi vhuṱungu.
25 Musi vha tshi mu litsha (ngauri vho mu sia o huvhala nga maanḓa*), vhashumeli vhawe vha mu itela tshimbevha nge a shulula malofha a vharwa* vha tshifhe Yehoyada.+ Vha mu vhulaya e mmbeteni wawe.+ A fa, vha mu vhulunga Muḓini wa Davida,+ fhedzi a vho ngo mu vhulunga mavhiḓani a mahosi.+
26 Vhe vha mu itela tshimbevha+ ndi havha: Sabada murwa wa Simeathi wa Muamoni na Yehosabada murwa wa Simirithi mufumakadzi wa Mumoaba.
27 Mafhungo a vharwa vhawe na a u haṱulwa hawe+ na a u vusuluswa ha nnḓu ya Mudzimu wa ngoho,+ zwo ṅwaliwa kha maṅwalo a Bugu ya Mahosi. Murwa wawe Amatsia a vha khosi vhudzuloni hawe.
Ṱhaluso dzi re magumoni a siaṱari
^ Sedzani Mutevhe Wa Ṱhalutshedzo Ya Maipfi.
^ Ndi khotsi a Sakaria.
^ Ndi Vhasiria.
^ Kana “a na malwadze manzhi.”
^ Kana “murwa.” Khamusi ḽi kha vhunzhi ḽi sumbedza vhuhulwane.
