Bugu Ya Vhuvhili Ya Koronika 25:1-28
25 Amatsia o vha e na miṅwaha ya 25 musi a tshi vha khosi, o vhusa miṅwaha ya 29 Yerusalema. Mme awe o vha a tshi pfi Yehoadani wa Yerusalema.+
2 O bvela phanḓa a tshi ita zwo lugaho phanḓa ha Yehova, fhedzi ho ngo zwi ita nga mbilu yoṱhe.
3 Musi muvhuso wawe u tshi tou khwaṱha, a vhulaya vhashumeli vhawe vhe vha vhulaya khotsi awe we a vha e khosi.+
4 Fhedzi ho ngo vhulaya vharwa vhavho, ngauri o tevhedza zwe zwa ṅwaliwa kha Mulayo, buguni ya Mushe, he Yehova a laya a ri: “Vhokhotsi a vho ngo tea u fela zwivhi zwa vhana vhavho na vhana a vho ngo tea u fela zwivhi zwa vhokhotsi avho; muṅwe na muṅwe u fanela u fela zwivhi zwawe.”+
5 Amatsia a kuvhanganya Vhayuda a vha imisa u ya nga miṱa ya vhokhotsi avho, u ya nga vhane vha ranga phanḓa vha zwigidi na vha maḓana vha ḽoṱhe ḽa Yuda na ḽa Benyamini.+ A vha ṅwalisa u bva kha vha miṅwaha ya 20 u ya nṱha,+ a wana hu na vhahali vho gudiswaho* vha 300 000 vhane vha nga vha kha mmbi, vhane vha nga kona u fara mapfumo na zwiṱangu zwihulu.
6 A dovha a bvisa talente* dza 100 dza siḽiva, a thola vhahali vha 100 000 vha bvaho Isiraele.
7 Fhedzi mushumeli wa Mudzimu wa ngoho a ḓa khae a ri: “Yowee thovhela, u songo bva na mmbi ya Isiraele, ngauri Yehova ha imi na Vhaisiraele,+ ha imi na muthu na muthihi wa Vhaefuraimi.
8 Fhedzi iwe tshimbila u woṱhe, u dzhie vhukando, u vhe na tshivhindi nndwani. Wa sa ita nga u ralo, Mudzimu wa ngoho u ḓo ita uri u khukhulwe phanḓa ha maswina au, ngauri Mudzimu u na maanḓa a u u thusa+ na a u u khukhulisa.”
9 Amatsia a amba na Mudzimu wa ngoho a ri: “Fhedzi hu pfi mini nga ha dziḽa talente dza 100 dze nda dzi ṋea maswole a Isiraele?” Mushumeli wa Mudzimu wa ngoho a mu fhindula a ri: “Yehova a nga kona u u ṋea talente dzi fhiraho dzenedzo.”+
10 Amatsia a humisa maswole e a vha o ḓa khae a tshi bva Efuraimi, a a humisela hayani. Naho zwo ralo, eneo maswole o vha o sinyutshela Vhayuda, a humela hayani o sinyuwa zwihulu.
11 Amatsia a vha na tshivhindi, a ranga phanḓa maswole awe u swika Govhani ḽa Muṋo,+ a vhulaya vhanna vha Seiri vha 10 000.+
12 Vhanna vha Yuda vha thuba vha 10 000 vha tshi kha ḓi tshila. Vha vha isa ṱhodzini ya tombo ḽihulu, vha vha sukumedzela luwani, vha vunḓekana vhoṱhe.
13 Fhedzi maswole e Amatsia a a humisa uri a si ṱuwe nae nndwani+ o vha a tshi khou ṱhasela miḓi ya Yuda, u bva Samaria+ u swika Bethe-horoni;+ a vhulaya vhathu vha 3 000, a thuba zwithu zwinzhi.
14 Musi Amatsia a tshi bva u vhulaya Vhaedomo, a vhuya na midzimu ya vhathu vha Seiri, a i imisa uri i vhe midzimu yawe,+ a i gwadamela na u i dubisela zwiṱhavhelo.
15 Yehova a sinyutshela Amatsia nga maanḓa, a rumela muporofita a amba nae a ri: “Ndi ngani u tshi gwadamela midzimu ya vhathu ye i si kone u tshidza vhathu vhayo zwanḓani zwau?”+
16 Musi a tshi kha ḓi amba, khosi ya ri: “Naa iwe ro u nanga uri u vhe mueletshedzi wa khosi?+ Fhumula!+ Kani u ṱoḓa uri vha u vhulaye?” Muporofita a fhumula, fhedzi a dovha a ri: “Ndi a zwi ḓivha uri Mudzimu o ḓiimisela u u vhulaya, nge wa ita nga u ralo, wa si thetshelese nyeletshedzo yanga.”+
17 Musi o no amba na vhaeletshedzi vhawe, Khosi Amatsia wa Yuda a rumela mulaedza ha Yehoashi murwa wa Yoahasi murwa wa Yehu khosi ya Isiraele, a ri: “Iḓa ri lwe.”*+
18 Khosi Yehoashi wa Isiraele a rumela mulaedza kha Khosi Amatsia wa Yuda a ri: “Tsheṋe ya mipfa ya Libanoni yo rumela mulaedza kha muṱaululo wa Libanoni ya ri: ‘Ṋea murwa wanga ṅwananyana wau uri a vhe mufumakadzi wawe.’ Fhedzi tshivhanda tsha Libanoni tsha fhira nga henefho tsha kandekanya tsheṋe ya mipfa.
19 Iwe wo ri: ‘Ndo kunda Edomo.’+ Zwino mbilu yau i vho ḓihudza, u ṱoḓa u huliswa. Fhedzi dzula nḓuni* yau. Ndi ngani u tshi ḓiṱungela khombo wa wa, wa wisa na muḓi wa Yuda?”
20 Fhedzi Amatsia a si thetshelese,+ ngauri zwenezwo zwo vha zwi tshi khou itiswa nga Mudzimu wa ngoho uri a vha kumedzele zwanḓani zwa maswina,+ nge vha gwadamela midzimu ya Edomo.+
21 Yehoashi khosi ya Isiraele a ya nndwani, ene na Amatsia khosi ya Yuda vha lwa ngei Bethe-semesi,+ muḓi une wa vha wa Yuda.
22 Vhayuda vha kundwa nga Vhaisiraele, muṅwe na muṅwe a shavhela hayani* hawe.
23 Yehoashi khosi ya Isiraele a thuba Amatsia khosi ya Yuda, murwa wa Yehoashi murwa wa Yoahasi* ngei Bethe-semesi. Vha mu isa Yerusalema, vha kwasha luvhondo lwa Yerusalema u bva Khoroni ya Efuraimi+ u swika Khoroni ya Khonani,+ hune ha vha khubithi dza 400.*
24 A dzhia musuku woṱhe na siḽiva na madzanga oṱhe e a a wana nḓuni ya Mudzimu wa ngoho zwe zwa vha zwi na Obede-edomo na mbulungeloni dza nḓuni* ya khosi,+ a thuba na vhathu. Nga murahu a vhuyelela Samaria.
25 Amatsia+ murwa wa Yehoashi khosi ya Yuda a fhedza miṅwaha ya 15 musi Yehoashi+ murwa wa Yoahasi khosi ya Isiraele o no fa.+
26 Mafhungo oṱhe a Amatsia, u bva mathomoni u swika magumoni, naa ho ngo ṅwaliwa Buguni ya Mahosi a Yuda na a Isiraele?
27 Musi Amatsia a tshi tou litsha u tevhela Yehova, vha mu itela tshimbevha+ ngei Yerusalema, a shavhela Laxisi, fhedzi vha rumela vhanna uri vha mu tevhele ngei Laxisi, vha mu vhulayela henengei.
28 Vha mu humisela murahu vho mu hwala nga bere, vha mu vhulunga na vhomakhulukuku wawe muḓini wa Yuda.
Ṱhaluso dzi re magumoni a siaṱari
^ Thevhedz., “nangwaho.”
^ Talente i lingana na khilogramu dza 34,2. Sedzani Ṱhume. B14.
^ Kana “ri livhane zwifhaṱuwo.”
^ Kana “pfamoni.”
^ Thevhedz., “denndeni.”
^ U dovha a pfi Ahasia.
^ Hu ṱoḓaho u vha mithara dza 178. Sedzani Ṱhume. B14.
^ Kana “pfamoni.”
