Bugu Ya Vhuvhili Ya Koronika 29:1-36
29 Hiskia+ o vha e na miṅwaha ya 25 musi a tshi vha khosi, o vhusa miṅwaha ya 29 Yerusalema. Mme awe a tshi pfi Abia ṅwana wa Sakaria.+
2 O dzula a tshi ita zwo lugaho phanḓa ha Yehova,+ u fana na Davida makhulukuku wawe.+
3 Nga ṅwaha wa u thoma a tshi khou vhusa, nga ṅwedzi wa u thoma, o vula mavothi a nnḓu ya Yehova a a lugisa.+
4 A ḓisa vhotshifhe na Vhalevi a vha kuvhanganya muṱani wa vhubvaḓuvha.
5 A amba navho a ri: “Nthetsheleseni inwi Vhalevi. Zwino ḓikunakiseni+ ni ite uri nnḓu ya Yehova Mudzimu wa vhomakhulukuku waṋu i vhe khethwa, ni bvise zwithu zwi songo kunaho fhethu hukhethwa.+
6 Ngauri vhokhotsi ashu a vho ngo fhulufhedzea, vho ita zwi sa takadzi phanḓa ha Yehova Mudzimu washu.+ Vho mu laṱa vha furalela dennde ḽikhethwa ḽa Yehova vha mu ṱutshela.+
7 Vho dovha vha vala na mavothi a vurannḓa,+ vha dzima dzimbone.+ Vha litsha u fhisela Mudzimu wa Isiraele zwioro+ na u ṋekedza zwiṱhavhelo zwa u fhiswa+ fhethu hukhethwa.
8 Yehova a sinyutshela vhathu vha Yuda na vha Yerusalema,+ a vha ita zwi ofhisaho na zwi mangadzaho, a ita uri vha goḓiwe, samusi ni tshi khou zwi vhona.+
9 Vhomakhulukuku washu vho vhulawa nga banga,+ vharwa vhashu, vhananyana vhashu na vhafumakadzi vhashu vho ya vhuthubwani nga nṱhani ha zwenezwi.+
10 Zwino ndi tama u vhofha mulanga na Yehova Mudzimu wa Isiraele,+ uri a si tsha ri sinyutshela.
11 Vharwa vhanga, zwino a si tshifhinga tsha u litshelela zwithu,* ngauri Yehova o ni nanga uri ni ime phanḓa hawe, ni vhe vhaḓinḓa vhawe,+ ni mu dubisele zwiṱhavhelo.”+
12 Nga zwenezwo, Vhalevi vha takuwa: Mahathe murwa wa Amasai na Yoele murwa wa Asaria wa Mukehati;+ kha Vhamerari,+ Kishi murwa wa Abadi na Asaria murwa wa Yahalelele; kha Vhagerisoni,+ Yoa murwa wa Zima na Edeni murwa wa Yoa;
13 kha vharwa vha Elitsafani, Shimiri na Yeuele; kha vharwa vha Asafu,+ Sakaria na Mathanya;
14 kha vharwa vha Hemani,+ Yehiele na Shimei; kha vharwa vha Yeduthuni,+ Shemaya na Usiele.
15 Vha kuvhanganya vhahavho vha ita uri vha vhe vhakhethwa, vha ḓa sa zwe khosi ya laya i tshi tevhedza zwe Yehova a amba, uri vha ite uri nnḓu ya Yehova i vhe khethwa.+
16 Vhotshifhe vha dzhena nḓuni ya Yehova uri vha kunakise, vha bvisela nnḓa zwithu zwoṱhe zwi re na tshika zwe vha zwi wana thembeleni ya Yehova, vha zwi isa muṱani+ wa nnḓu ya Yehova. Vhalevi vha zwi dzhia vha zwi hwala vha zwi isa Govhani ḽa Kidironi.+
17 Vha thoma u ḓikunakisa nga ḓuvha ḽa u thoma ḽa ṅwedzi wa u thoma, nga ḓuvha ḽa vhumalo ḽa ṅwedzi, vha swika vurannḓani ya Yehova.+ Vha kunakisa nnḓu ya Yehova lwa maḓuvha a malo, vha fhedza nga ḓuvha ḽa vhu 16 ḽa ṅwedzi wa u thoma.
18 Nga murahu ha zwenezwo, vha ya ha Khosi Hiskia vha ri: “Ro kunakisa nnḓu yoṱhe ya Yehova, aḽeṱare ya tshifhiwa tsha u fhiswa+ na thundu dzayo dzoṱhe+ na ṱafula ya vhurotho ha ṱano+ na thundu dzayo.
19 Thundu dzoṱhe dze Khosi Ahasi a dzi bvisa nga u sa fhulufhedzea hawe+ tshifhingani tsha musi a tshi khou vhusa ro dzi kunakisa,+ dzi phanḓa ha aḽeṱare ya Yehova.”
20 Khosi Hiskia a vuwa nga matsheloni-tsheloni a kuvhanganya vhakololo vha muḓi, vha ya nḓuni ya Yehova.
21 Vha ḓisa mboho dza sumbe, thutha dza sumbe, ngwana dza sumbe na zwibokoṱo zwa sumbe sa tshifhiwa tsha u pfumelela tshivhi uri tshi vhe tsha muvhuso, tsha nnḓu khethwa na tsha Vhayuda.+ A vhudza vhotshifhe, vhaḓuhulu vha Aroni uri vha zwi ṋekedze kha aḽeṱare ya Yehova.
22 Vha ṱhavha kholomo,+ vhotshifhe vha dzhia malofha vha a shasha kha aḽeṱare;+ vha dovha vha ṱhavha thutha vha shasha malofha kha aḽeṱare, vha ṱhavha ngwana dza nduna vha shasha malofha kha aḽeṱare.
23 Vha ḓisa zwibokoṱo zwa tshifhiwa tsha u pfumelela tshivhi phanḓa ha khosi na tshivhidzo, vha vhea zwanḓa zwavho khazwo.
24 Vhotshifhe vha zwi ṱhavha vha ita tshifhiwa tsha u pfumelela tshivhi nga malofha azwo kha aḽeṱare, vha pfumelela Vhaisiraele vhoṱhe, ngauri khosi yo amba uri tshifhiwa tsha u fhiswa na tshifhiwa tsha u pfumelela tshivhi zwi vhe zwa Vhaisiraele vhoṱhe.
25 Nga tshenetsho tshifhinga, o vha o vhea Vhalevi nḓuni ya Yehova vho fara simbala, zwilidzo zwi re na ṱhale na haripa,+ vha tshi tevhedza ndaela ya Davida+ na ya Gada+ muvhoni wa khosi na ya muporofita Nathani,+ ngauri yeneyo ndaela yo vha i tshi bva kha Yehova a tshi shumisa vhaporofita vhawe.
26 Vhalevi vho vha vho ima vho fara zwilidzo zwa Davida, vhotshifhe vho fara phalaphala.+
27 Ndi hone Hiskia a tshi amba uri hu ṋekedzwe tshiṱhavhelo tsha u fhiswa kha aḽeṱare.+ Musi hu tshi thoma u ṋekedzwa tshifhiwa tsha u fhiswa, luimbo lwa Yehova lwa thoma khathihi na u lidzwa ha dziphalaphala, hu tshi tevhelwa vhulivhisi ha Khosi Davida wa Isiraele.
28 Tshivhidzo tshoṱhe tsha gwadama musi hu tshi khou imbiwa luimbo na phalaphala dzi tshi khou lila, zwenezwi zwoṱhe zwo bvela phanḓa u swika vha tshi fhedza u ṋekedza tshifhiwa tsha u fhiswa.
29 Musi vha tshi tou fhedza u ṋekedza tshifhiwa, khosi na vhoṱhe vhe ya vha i navho vha losha vha luvha.
30 Khosi Hiskia na vhakololo vha amba na Vhalevi uri vha rende Yehova nga phisalema dza Davida+ na dza Asafu+ muvhoni. Vha mu renda nga dakalo ḽihulu, vha gwadama vha luvha.
31 Hiskia a ri: “Ngauri zwino no ḓikumedzela Yehova, ḓisani zwiṱhavhelo na zwifhiwa zwa u livhuwa nḓuni ya Yehova.” Tshivhidzo tsha thoma u ḓisa zwiṱhavhelo na zwifhiwa zwa u livhuwa, muṅwe na muṅwe we mbilu yawe ya vha i tshi zwi funa a bvisa zwifhiwa zwa u fhiswa.+
32 Tshivhalo tsha zwifhiwa zwa u fhiswa zwe tshivhidzo tsha zwi ḓisa tsho vha tshi kholomo dza 70, thutha dza 100 na ngwana dza nduna dza 200, zwenezwi zwoṱhe zwo vha zwi tshifhiwa tsha u fhiselwa Yehova,+
33 zwifhiwa zwikhethwa zwo vha zwi kholomo dza 600 na nngu kana mbudzi dza 3 000.
34 Fhedzi ho vha hu si na vhotshifhe vho eḓanaho vhane vha nga sutula mikumba kha zwifuwo zwoṱhe zwa zwifhiwa zwa u fhiswa, Vhalevi vhahavho vha vha thusa+ u swika mushumo u tshi fhela na u swika vhotshifhe vha tshi ḓikunakisa,+ ngauri Vhalevi vho vha vha tshi dzhiela nṱha u ḓikunakisa u fhira vhotshifhe.
35 Ho vha hu na zwifhiwa zwinzhi zwa u fhiswa,+ na mapfura a zwiṱhavhelo zwa u pfumedzana+ na zwifhiwa zwa u nwiwa zwa u itela zwifhiwa zwa u fhiswa.+ Mushumo wa nnḓu ya Yehova wa vusuluswa nga u ralo.
36 Hiskia na vhathu vhoṱhe vha takalela zwe Mudzimu wa ngoho a itela vhathu,+ nge zwenezwi zwoṱhe zwa itea nga u ṱavhanya.
Ṱhaluso dzi re magumoni a siaṱari
^ Kana “awela.”
