Bugu Ya Vhuvhili Ya Koronika 3:1-17
3 Salomo a thoma u fhaṱa nnḓu ya Yehova+ ngei Yerusalema Thavhani ya Moriya,+ he Yehova a ḓivhonadza kha khotsi awe Davida,+ fhethu he Davida a hu lugiselela ngei hune ha fhefherelwa hone* ha Oronani+ wa Muyebusi.
2 O thoma u fhaṱa nga ḓuvha ḽa vhuvhili ḽa ṅwedzi wa vhuvhili, nga ṅwaha wa vhuṋa musi a tshi khou vhusa.
3 Mutheo we Salomo a u thea a tshi fhaṱa nnḓu ya Mudzimu wa ngoho wo vha u vhulapfu ha khubithi dza 60 na vhuphara ha khubithi dza 20,+ u ya nga muelo wa kale.*
4 Vurannḓa ya nga phanḓa yo vha i vhulapfu ha khubithi dza 20, vhu tshi lingana na vhuphara ha nnḓu,* vhulapfu hayo ho vha hu 120;* nga ngomu a i ḓodza musuku vhukuma.+
5 A fhaṱela yeneyo nnḓu khulu nga matanda a mudzhunipa, nga murahu a a ḓodza musuku vhukuma,+ a a khavhisa nga zwifanyiso zwa mitshevho+ na dzingeḓane.+
6 A dovha a nambatedza matombo avhuḓi a mutengo muhulu nḓuni;+ musuku+ we a u shumisa wo vha u musuku u bvaho ngei Paravaimi.
7 A ḓodza nnḓu, matanda, miṋango, mbondo dzayo na mavothi ayo nga musuku;+ a kora zwifanyiso zwa vhakerube kha mbondo.+
8 A ita fhethu* Hukhethwa-khethwa;+ vhulapfu haho ho vha hu tshi lingana na vhuphara ha nnḓu, vhu khubithi dza 20 na vhuphara haho vhu khubithi dza 20. A hu ḓodza musuku vhukuma wa talente* dza 600.+
9 Tshileme tsha musuku we wa vha u kha zwibigiri wo vha u shekele* dza 50; kamara khulwane dza nṱha a dzi ḓodza musuku.
10 Nga ngomu fhethu* Hukhethwa-khethwa a ita zwifanyiso zwa vhakerube zwivhili, a zwi ḓodza musuku.+
11 Phapha dzoṱhe dza vhakerube+ dzo vha dzi khubithi dza 20; lufhafha luthihi lwa mukerube wa u thoma lwo vha lu vhulapfu ha khubithi ṱhanu, lu tshi kwama luvhondo lwa nnḓu, luṅwe lufhafha lwawe lwo vha lu vhulapfu ha khubithi ṱhanu, lu tshi kwama luṅwe lwa phapha dza muṅwe mukerube.
12 Lufhafha luthihi lwa muṅwe mukerube lwo vha lu vhulapfu ha khubithi ṱhanu, lu tshi kwama luṅwe luvhondo lwa nnḓu, luṅwe lufhafha lwawe lwo vha lu vhulapfu ha khubithi ṱhanu, lu tshi kwama luṅwe lwa phapha dza mukerube wa u thoma.
13 Phapha dza vhenevho vhakerube dzo vha dzo ṱharamuwa dza ita khubithi dza 20; vho vha vho ima nga milenzhe; vho lavhelesa nga ngomu.*
14 A dovha a ita na khetheni+ nga harane ya muvhala wa lutombo, wuḽu ya phephulu, harane tswuku na labi ḽavhuḓi, a rungelela zwifanyiso zwa vhakerube khaḽo.+
15 A ita phuphu mbili+ phanḓa ha nnḓu, dza vhulapfu ha khubithi dza 35, ṱhoho iṅwe na iṅwe ya phuphu yo vha i khubithi ṱhanu.+
16 A dovha a ita ngeḓane a dzi nembeledza u mona na ṱhoho dza phuphu, a ita maphomagraneithi a 100 a a vhofhelela kha dzenedzo ngeḓane.
17 A imisa dzenedzo phuphu phanḓa ha thembele, iṅwe i thungo ya tsha u ḽa,* iṅwe i thungo ya tsha monde;* i re kha thungo ya tsha u ḽa a ri i pfi Yakini,* ya thungo ya tsha monde a ri i pfi Boasi.*
Ṱhaluso dzi re magumoni a siaṱari
^ Kana “luvhatani.”
^ Khubithi yo ḓoweleaho i lingana na senthimithara dza 44,5, fhedzi vhaṅwe vha humbula uri “muelo wa kale” u ambela kha khubithi ndapfu i linganaho na senthimithara dza 51,8. Sedzani Ṱhume. B14.
^ Kana “khubithi dza 20 u ṱanḓavhuwa na vhuphara ha nnḓu.”
^ Muelo u si na vhuṱanzi.
^ Thevhedz., “nnḓu.”
^ Talente i lingana na khilogramu dza 34,2. Sedzani Ṱhume. B14.
^ Shekele nthihi i lemela gramu dza 11,4. Sedzani Ṱhume. B14.
^ Thevhedz., “nnḓu.”
^ Thungo ya fhethu Hukhethwa.
^ Kana “tshipembe.”
^ Kana “devhula.”
^ Zwine zwa amba uri “Ngavhe [Yehova] A Tshi Khwaṱhisa.”
^ Khamusi zwi amba “Nungo.”
