Bugu Ya Vhuvhili Ya Koronika 30:1-27
-
Hiskia u pembelela Paseka (1-27)
30 Hiskia a rumela mulaedza kha ḽoṱhe ḽa Isiraele+ na ḽa Yuda, a dovha a ṅwalela vha Efuraimi na vha Manase marifhi,+ uri vha ḓe nḓuni ya Yehova ngei Yerusalema vha itele Yehova Mudzimu wa Isiraele Paseka.+
2 Naho zwo ralo, khosi, vhakololo na tshivhidzo tshoṱhe tsha ngei Yerusalema vha dzudzanya uri vha ite Paseka nga ṅwedzi wa vhuvhili,+
3 nge vha si kone u i ita nga tshifhinga tsho ḓoweleaho,+ ngauri ho vha hu si na vhotshifhe vhanzhi vho ḓikunakisaho+ na vhathu vha songo kuvhangana ngei Yerusalema.
4 Khosi na tshivhidzo tshoṱhe vha vhona yeneyi nzudzanyo yo tea.
5 Ngauralo, vha ita phetho ya uri vha ḓivhadze kha ḽoṱhe ḽa Isiraele, u bva Beresaba u swika Dani,+ uri vhathu vha ḓe vha itele Yehova Mudzimu wa Isiraele Paseka ngei Yerusalema, ngauri vhanzhi vho vha vha si tsha tevhedza zwo ṅwaliwaho.+
6 Vhaḓinḓa* vha ya kha ḽoṱhe ḽa Isiraele na ḽa Yuda vho fara marifhi a bvaho kha khosi na kha vhakololo, sa zwe khosi ya laya, ya ri: “Vhathu vha Isiraele, vhuyelelani kha Yehova Mudzimu wa Abrahamu, wa Isaka na wa Isiraele, uri a vhuyelele kha masalela e a ponyoka zwanḓani zwa mahosi a Asuri.+
7 Ni songo fana na vhomakhulukuku waṋu na vhahaṋu vhe vha si fhulufhedzee kha Yehova Mudzimu wa vhomakhulukuku wavho, a vha ita zwi ofhisaho, sa zwine na khou zwi vhona.+
8 Zwino ni songo vha na tshikhuna u fana na vhomakhulukuku waṋu.+ Ḓiṱukufhadzeni kha Yehova ni ḓe nḓuni yawe khethwa+ ye a i kunakisa lwa tshoṱhe, ni shumele Yehova Mudzimu waṋu, uri a si tsha ni sinyutshela.+
9 Ngauri musi ni tshi vhuyelela ha Yehova, vhahaṋu na vharwa vhaṋu vha ḓo khathutshelwa nga vhathubi vhavho,+ vha tendelwa vha tshi vhuyelela kha ḽino shango,+ ngauri Yehova Mudzimu waṋu u a pfela vhuṱungu* a dovha a khathutshela,+ a nga si ni furalele arali na vhuyelela khae.”+
10 Vhaḓinḓa* vha tshimbila muḓi nga muḓi kha ḽoṱhe ḽa Efuraimi na ḽa Manase,+ vha swika na kha ḽa Sebuloni, fhedzi vhathu vho vha vha tshi khou vha sea na u vha goḓa.+
11 Naho zwo ralo, vhaṅwe vhathu vha bvaho kha ḽa Ashere, kha ḽa Manase na kha ḽa Sebuloni vha ḓiṱukufhadza vha ḓa Yerusalema.+
12 Tshanḓa tsha Mudzimu wa ngoho tsho vha tshi ngei Yuda u itela uri vha vhe na vhuthihi* uri vha ite zwe khosi na vhakololo vha zwi laya vha tshi shumisa ipfi ḽa Yehova.
13 Magogo a vhathu a kuvhangana ngei Yerusalema uri a ite Vhuṱambo ha Vhurotho vhu si na Mbiliso+ nga ṅwedzi wa vhuvhili;+ tsho vha tshi tshivhidzo tshihulu nga maanḓa.
14 Vha takuwa vha thutha aḽeṱare dze dza vha dzi Yerusalema,+ vha thutha na aḽeṱare dza zwioro dzoṱhe,+ vha dzi laṱa ngei Govhani ḽa Kidironi.
15 Vha ṱhavha tshiṱhavhelo tsha Paseka nga ḓuvha ḽa vhu 14 ḽa ṅwedzi wa vhuvhili. Vhotshifhe na Vhalevi vha shona, vha ḓikunakisa, vha ḓisa zwifhiwa zwa u fhiswa nḓuni ya Yehova.
16 Vha ima vhuimoni havho, u ya nga Mulayo wa Mushe mushumeli wa Mudzimu wa ngoho; nga zwenezwo vhotshifhe vha shasha malofha+ e vha ṋewa nga Vhalevi.
17 Ho vha hu na vhathu vhanzhi tshivhidzoni vha songo ḓikunakisaho, Vhalevi vho vha vhe na vhuḓifhinduleli ha u ṱhavhela vhoṱhe vha songo kunaho tshiṱhavhelo tsha Paseka,+ uri vha kune phanḓa ha Yehova.
18 Ngauri vhathu vhanzhi, zwihuluhulu vha bvaho kha vha Efuraimi, kha vha Manase,+ kha vha Isashari na kha vha Sebuloni, vho vha vha sa athu u ḓikunakisa, fhedzi vha ḽa Paseka, vha si tsha tevhedza zwo ṅwaliwaho. Fhedzi Hiskia a vha rabelela a ri: “Ngavhe Yehova o lugaho+ a tshi hangwela
19 muṅwe na muṅwe we a lugiselela mbilu yawe uri a ṱoḓe Yehova Mudzimu wa ngoho,+ Mudzimu wa vhomakhulukuku wawe, naho a sa athu u kunakiswa u ya nga zwilinganyo zwikhethwa.”+
20 Yehova a thetshelesa Hiskia, a khathutshela* vhathu.
21 Vhaisiraele vha re Yerusalema vha ita Vhuṱambo ha Vhurotho vhu si na Mbiliso+ lwa maḓuvha a sumbe vho takala nga maanḓa,+ Vhalevi na vhotshifhe vha tshi khou renda Yehova ḓuvha na ḓuvha, vha tshi khou lidzela Yehova zwilidzo zwavho zwi tshi khou lilela nṱha.+
22 Hiskia o dovha a ṱuṱuwedza Vhalevi vhoṱhe vhe vha ita zwithu nga vhuṱali musi vha tshi shumela Yehova. Vha ḽa kha honoho vhuṱambo maḓuvha a sumbe,+ vha tshi ṋekedza zwiṱhavhelo zwa u pfumedzana+ na u livhuwa Yehova Mudzimu wa vhomakhulukuku wavho.
23 Tshivhidzo tshoṱhe tsha ita phetho uri tshi ite Paseka maṅwe maḓuvha a sumbe, nga zwenezwo tsha dovha tsha i ita lwa maḓuvha a sumbe tsho takala.+
24 Khosi Hiskia wa Yuda o ṋea tshivhidzo mboho dza 1 000 na nngu dza 7 000, vhakololo vha ṋea tshivhidzo mboho dza 1 000 na nngu dza 10 000;+ vhotshifhe vhanzhi vho vha vha tshi khou ḓikunakisa.+
25 Tshivhidzo tshoṱhe tsha Yuda, vhotshifhe, Vhalevi, tshivhidzo tshoṱhe tshi bvaho Isiraele+ na vhatsinda+ vha bvaho shangoni ḽa Isiraele na vhane vha dzula ngei Yuda vha bvela phanḓa vho takala.
26 Ha vha na dakalo ḽihulu ngei Yerusalema, ngauri u bva tshifhingani tsha Salomo murwa wa Davida khosi ya Isiraele, ho vha hu sa athu u itea zwithu zwo raloho ngei Yerusalema.+
27 Mafheleloni vhotshifhe vha Vhalevi vha ima vha fhaṱutshedza vhathu;+ Mudzimu a vha pfa, thabelo yavho ya swika vhudzuloni hawe vhukhethwa, ngei ṱaḓulu.
Ṱhaluso dzi re magumoni a siaṱari
^ Thevhedz., “Vhagidimi.”
^ Kana “u na vhulenda.”
^ Thevhedz., “Vhagidimi.”
^ Thevhedz., “a vha ṋee mbilu nthihi.”
^ Thevhedz., “fhodza.”
