Bugu Ya Vhuvhili Ya Koronika 31:1-21
31 Musi vha tshi tou fhedza zwenezwo zwoṱhe, Vhaisiraele vhoṱhe vha re hone vha ya miḓini ya Yuda, vha kwashekanya phuphu khethwa,+ vha rema thanda khethwa,*+ vha thutha fhethu ha vhurabeli+ na dziaḽeṱare+ kha ḽoṱhe ḽa Yuda na ḽa Benyamini, u katela na ḽa Efuraimi na ḽa Manase,+ u swika vha tshi fhedza zwoṱhe, nga murahu Vhaisiraele vhoṱhe vha humela miḓini yavho hune vha dzula hone.
2 Hiskia a vhea vhotshifhe u ya nga zwigwada zwavho+ na Vhalevi u ya nga zwigwada zwavho,+ tshigwada tshiṅwe na tshiṅwe tsha vhotshifhe na tsha Vhalevi tsho vha tsho avhelwa mushumo watsho,+ tsho vha tshi tshi ṋekedza zwifhiwa zwa u fhiswa na zwiṱhavhelo zwa u pfumedzana, u shumela, u livhuwa na u renda khoroni dza miṱa* ya Yehova.+
3 Khosi ya ṋeela nga mukovhe wa thundu yayo u itela zwifhiwa zwa u fhiswa,+ u katela na zwifhiwa zwa nga matsheloni na nga madekwana,+ khathihi na zwifhiwa zwa u fhiswa zwa Dzisavhatha,+ zwa ṅwedzi muswa+ na zwa vhuṱambo,+ vha tshi tevhedza zwo ṅwaliwaho kha Mulayo wa Yehova.
4 Zwiṅwe hafhu, a laya vhadzulapo vha Yerusalema uri vha ṋee vhotshifhe na Vhalevi mukovhe wo teaho,+ uri vha tevhedze nga vhuronwane* mulayo wa Yehova.
5 Musi hu tshi tou pfala yeneyo ndaela, Vhaisiraele vha ḓisa zwiranzhe zwinzhi zwa thoro, waini ntswa, mapfura,+ mutoli na zwibveledzwa zwoṱhe zwa masimuni;+ vha bvisa tshafumi kha tshiṅwe na tshiṅwe nga vhunzhi.+
6 Vhathu vha Isiraele na vha Yuda vha dzulaho miḓini ya Yuda na vhone vha bvisa tshafumi tsha kholomo na tsha nngu na tshafumi tsha zwithu zwikhethwa+ zwe zwa itwa zwikhethwa kha Yehova Mudzimu wavho. Vha zwi kuvhanganya zwa ita zwiṱhopho zwinzhi.
7 Vha thoma u zwi kuvhanganya nga ṅwedzi wa vhuraru;+ vha fhedza nga ṅwedzi wa vhusumbe.+
8 Musi Hiskia na vhakololo vha tshi ḓa u vhona zwe zwa kuvhanganywa, vha renda Yehova, vha fhaṱutshedza vhathu vhawe vha Isiraele.
9 Hiskia a vhudzisa vhotshifhe na Vhalevi nga ha zwe zwa kuvhanganywa,
10 Asaria muhulwane wa vhotshifhe wa nnḓu ya Tsadoko a amba nae a ri: “U bva tshee vha thoma u ḓisa miṋeelo nḓuni ya Yehova,+ vhathu vha khou u ḽa vha fura, hu tshee ho sala zwinzhi ngauri Yehova o fhaṱutshedza vhathu vhawe, ha ita na u sala hezwi zwinzhi.”+
11 Hiskia a vha vhudza uri vha lugise kamara dza u vhulungela zwithu*+ nḓuni ya Yehova, vha ita nga u ralo.
12 Vha bvela phanḓa vha tshi ḓisa miṋeelo nga u fhulufhedzea, tshafumi+ na zwithu zwikhethwa; Konanya wa Mulevi a vhewa uri a vhe mulangi wa zwenezwo zwithu zwoṱhe, wa vhuvhili o vha e Shimei murathu wawe.
13 Yehiele, Azasia, Nahathi, Asahele, Yerimothe, Yosabada, Eliele, Yisimaxia, Mahathe na Benaya vho vha vhe vhathusi vha Konanya na murathu wawe Shimei, u ya nga ndaela ya Khosi Hiskia, Asaria o vha a tshi lavhelesa zwa nḓuni ya Mudzimu wa ngoho.
14 Kore murwa wa Imina wa Mulevi we a vha e mulindakhoro ya vhubvaḓuvha,+ o vha a tshi langa zwifhiwa zwa u ḓifunela+ zwa Mudzimu wa ngoho, o vha a tshi kovhekanya muṋeelo une wa bviselwa Yehova+ na zwithu zwikhethwa-khethwa.+
15 Vha re nga fhasi hawe miḓini ya vhotshifhe vho vha vhe Edeni, Minyamini, Yeshua, Shemaya, Amaria na Shekanya,+ vha shumaho nga u fhulufhedzea, vha tshi kovhela vhahavho mikovhe i linganaho u ya nga zwigwada zwavho,+ vhaṱuku na vhahulwane nga nḓila i fanaho.
16 Hu sa vhalwi zwe zwa ṋewa vhanna vhoṱhe, u bva kha vhatukana vha re na miṅwaha miraru u ya nṱha, vho ṅwaliswaho kha mutevhe wa lushaka, vha tshi ḓa ḓuvha ḽiṅwe na ḽiṅwe u shuma nḓuni ya Yehova na u ita mishumo ya zwigwada zwavho.
17 Mutevhe wa lushaka lwa vhotshifhe wo vha u tshi ya nga miṱa ya vhokhotsi avho,+ u fana na wa Vhalevi vha re na miṅwaha ya 20 u ya nṱha,+ u ya nga mishumo ya zwigwada zwavho.+
18 Mutevhe wa lushaka lwavho wo vha u tshi katela vhana vhavho, vhafumakadzi vhavho, vharwa na vhananyana vhavho, tshivhidzo tshavho tshoṱhe ngauri vho dzula vhe vhakhethwa vha tshi itela zwikhethwa nga nṱhani ha mushumo we vha ṋewa nge vha fhulufhedzea
19 na vhana vha Aroni, vhane vha vha vhotshifhe vha dzulaho mashangoni a pfulo u mona na miḓi yavho.+ Kha miḓi yoṱhe ho vha hu na vhanna vho nangiwaho u ya nga madzina avho uri vha ṋee vhanna vhoṱhe* mukovhe kha vhotshifhe na vhoṱhe vha re kha mutevhe wa lushaka lwa Vhalevi.
20 Hiskia o ita zwenezwo kha ḽoṱhe ḽa Yuda, a bvela phanḓa a tshi ita zwithu zwavhuḓi, zwo lugaho na u fhulufhedzea phanḓa ha Yehova Mudzimu wawe.
21 Mushumo muṅwe na muṅwe we a u ita uri a ṱoḓe Mudzimu wawe, hu sa londwi uri wo vha u tshi tshimbidzana na mushumo wa nnḓu ya Mudzimu wa ngoho+ kana Mulayo na ndaela, o vha a tshi u ita nga mbilu yoṱhe, a bvelela.
Ṱhaluso dzi re magumoni a siaṱari
^ Sedzani Mutevhe Wa Ṱhalutshedzo Ya Maipfi.
^ Thevhedz., “madennde.”
^ Kana “vha ḓikumedzele tshoṱhe kha.”
^ Kana “kamara dza u ḽela.”
^ Thevhedz., “vhanna u katela na vhatukana.”
