Bugu Ya Vhuvhili Ya Koronika 32:1-33
32 Musi Hiskia o no ita zwenezwo zwithu zwoṱhe nga u fhulufhedzea,+ Khosi Saniheribi wa Asuri a ḓa a vutshela ḽa Yuda. A tanga miḓi yo tsireledzwaho nga mbondo, o ḓiimisela u wisa mbondo na u thuba miḓi.+
2 Musi Hiskia a tshi vhona uri Saniheribi o ḓa o ḓiimisela u lwa na Yerusalema,
3 a ita phetho na vhakololo na vhahali vhawe ya uri hu valwe maḓi ane a bva zwisimani a si tsha elela a tshi ya nnḓa ha muḓi,+ vha mu tikedza.
4 Ha kuvhangana vhathu vhanzhi, vha vala zwisima zwoṱhe na mulambwana we wa vha u tshi elela henefho shangoni, vha ri: “A ri ṱoḓi uri mahosi a Asuri a wane maḓi musi a tshi ḓa.”
5 A dovha a ḓiimisela u fhaṱulula luvhondo lwoṱhe lwe lwa vha lwo wiswa, a fhaṱa mitsheṱo nṱha halwo, nga nnḓa a fhaṱa luṅwe luvhondo. A dovha a lugisa Tshikwara*+ tshi re Muḓini wa Davida, a ita zwiṱhavhane zwinzhi na zwiṱangu zwinzhi.
6 A vhea vhalangammbi vha u langa vhathu, a vha kuvhanganya luvhanḓeni lwa khoro ya muḓi a vha ṱuṱuwedza a ri:
7 “Ni vhe na tshivhindi na maanḓa. Ni songo ofha kana na tshuwa khosi ya Asuri+ na magogo oṱhe ane ya vha nao, ngauri vhane vha vha na riṋe ndi vhanzhi u fhira vhane vha vha nayo.+
8 Yone yo ḓitika nga maanḓa a vhathu,* fhedzi riṋe ri thuswa nga Yehova Mudzimu washu,+ ndi ene ane a lwa nndwa dzashu.” Vhathu vha khwaṱhiswa nga maipfi a Khosi Hiskia wa Yuda.+
9 Nga murahu ha zwenezwo, musi Khosi Saniheribi wa Asuri e ngei Laxisi+ e na maswole awe oṱhe,* a rumela vhashumeli vhawe ngei Yerusalema, ha Khosi Hiskia wa Yuda na ha Vhayuda vhoṱhe vha re Yerusalema,+ a ri:
10 “Zwe Khosi Saniheribi wa Asuri a zwi amba ndi hezwi: ‘No fhulufhela mini zwine zwa ita uri ni dzule Yerusalema ngeno wo tangiwa?+
11 Naa a si Hiskia ane a khou ni xedza uri ni fe nga nḓala na ḓora, a tshi ri: “Yehova Mudzimu washu u ḓo ri tshidza zwanḓani zwa khosi ya Asuri”?+
12 Naa a si ene Hiskia we a thutha fhethu ha vhurabeli ha Mudzimu+ na aḽeṱare dzawe,+ a vhudza vhathu vha Yuda na vha Yerusalema a ri: “Ni gwadame phanḓa ha aḽeṱare nthihi, ni dubise zwiṱhavhelo khayo”?+
13 Naa a ni ḓivhi zwe nṋe na vhomakhulukuku wanga ra zwi ita kha vhathu vhoṱhe vha maṅwe mashango?+ Naa midzimu ya dzenedzo tshaka dza eneo mashango yo kona u tshidza mashango ayo zwanḓani zwanga?+
14 Ndi ufhio kha midzimu yoṱhe ya dzenedzo tshaka dze vhomakhulukuku wanga vha dzi fhelisa we a kona u tshidza vhathu vhawe zwanḓani zwanga, lune Mudzimu waṋu a nga kona u ni tshidza zwanḓani zwanga?+
15 Zwino ni songo tendela Hiskia a tshi ni fhura kana u ni xedza nga yeneyo nḓila!+ Ni songo mu fhulufhela, ngauri a hu na mudzimu wa lushaka naho lu lufhio kana wa muvhuso naho u ufhio we a kona u tshidza vhathu vhawe zwanḓani zwanga na zwa vhomakhulukuku wanga. Na Mudzimu waṋu a nga si kone u ni tshidza zwanḓani zwanga!’”+
16 Vhashumeli vhawe vha bvela phanḓa vha tshi sema Yehova Mudzimu wa ngoho na Hiskia mushumeli wawe.
17 A dovha a ṅwala marifhi+ a u sema Yehova Mudzimu wa Isiraele+ na u amba luvhi nga hae, a ri: “Mudzimu wa Hiskia a nga si tshidze vhathu vhawe zwanḓani zwanga+ vhunga midzimu ya tshaka dza maṅwe mashango i songo kona u tshidza vhathu vhayo zwanḓani zwanga.”
18 Vha bvela phanḓa vha tshi vhidzelela vhathu vha Yerusalema vha re kha luvhondo, uri vha ofhe na u vha tshuwisa nga luambo lwa Vhayuda uri vha kone u thuba muḓi.+
19 Vha amba luvhi nga ha Mudzimu wa Yerusalema u fana na musi vha tshi amba luvhi nga midzimu ya vhathu vha kha ḽifhasi, ye ya itwa nga zwanḓa zwa vhathu.
20 Fhedzi Khosi Hiskia na muporofita Yesaya+ murwa wa Amotsi vha bvela phanḓa vha tshi rabela nga ha mafhungo eneo na u lilela thuso i bvaho ṱaḓulu.+
21 Ndi hone Yehova a tshi ruma muruṅwa a fhelisa muhali muṅwe na muṅwe,+ murangaphanḓa, mulangammbi wa madenndeni a khosi ya Asuri, a humela shangoni ḽawe o shona. Nga murahu a dzhena nḓuni* ya mudzimu wawe, vhaṅwe vha vharwa vhawe vha mu vhulaya nga banga.+
22 Yehova a tshidza Hiskia nga u ralo na vhadzulapo vha Yerusalema zwanḓani zwa Khosi Saniheribi wa Asuri na zwanḓani zwa vhaṅwe vhoṱhe, a vha ṋea mulalo thungo dzoṱhe.
23 Vhathu vhanzhi vha ḓisa zwifhiwa ha Yehova ngei Yerusalema na zwithu zwavhuḓi ha Khosi Hiskia wa Yuda,+ a thoma u ṱhonifhiwa nga maanḓa kha tshaka dzoṱhe.
24 Misini yeneyo Hiskia a lwala lwe a ṱoḓou fa, a rabela Yehova+ we a mu fhindula na u mu ṋea tshiga.+
25 Fhedzi Hiskia a si ṱanganedze zwe a itelwa zwone, ngauri o vha a tshi vho ḓihudza mbiluni yawe, a ita uri Mudzimu a mu sinyutshele, a sinyutshele na vhathu vha Yuda na vha Yerusalema.
26 Naho zwo ralo, Hiskia na vhadzulapo vha Yerusalema vha ḓiṱukufhadza,+ Yehova a si tsha vha sinyutshela misini ya Hiskia.+
27 Hiskia a vha na lupfumo luhulu na vhugala;+ a ḓifhaṱela maḓulu+ awe a u vhea siḽiva, musuku, matombo a ndeme, mapfura a baḽisamu, zwiṱangu na zwithu zwoṱhe zwi tamisaho.
28 O dovha a ita na fhethu ha u vhulungela zwibveledzwa zwa thoro, waini ntswa na mapfura, khathihi na mikungwa ya zwifuwo zwo fhambanaho na mikungwa ya nngu.
29 A dovha a ḓiwanela miḓi, a vha na masambi manzhi a nngu na a kholomo, ngauri Mudzimu o vha o mu ṋea thundu nnzhi.
30 Hiskia ndi ene we a vala zwisima zwa nṱha zwa maḓi+ a Gihoni,+ a a pambusela vhukovhela Muḓini wa Davida,+ Hiskia a vha a bvelelaho kha mishumo yawe yoṱhe.
31 Naho zwo ralo, musi vhaambeli vha vhakololo vha Babele vha tshi rumiwa u ya u mu vhudzisa nga ha tshiga+ tshe tsha itea shangoni,+ Mudzimu wa ngoho a mu ṱutshela uri a mu linge,+ uri a ḓivhe zwoṱhe zwi re mbiluni yawe.+
32 Mafhungo oṱhe a Hiskia na mishumo yawe ya lufuno lu sa shanduki,+ zwo ṅwaliwa kha bono ḽa muporofita Yesaya,+ murwa wa Amotsi, kha Bugu ya Mahosi a Yuda na a Isiraele.+
33 Hiskia a vhulungwa na vhomakhulukuku wawe, vha mu vhulungela tshivhangani tsha u ya mavhiḓani a vharwa vha Davida;+ Vhayuda vhoṱhe na vhadzulapo vha Yerusalema vha mu hulisa lufuni lwawe. Murwa wawe Manase a vha khosi vhudzuloni hawe.
Ṱhaluso dzi re magumoni a siaṱari
^ Kana “Milo.” Ndi ipfi ḽa Tshihevheru ḽine ḽa amba u “ḓadza.”
^ Thevhedz., “tshanḓa tsha ṋama.”
^ Kana “e na mmbi yawe i re na maanḓa a mangadzaho.”
^ Kana “thembeleni.”
