Bugu Ya Vhuvhili Ya Koronika 34:1-33
34 Yosia+ o vha e na miṅwaha ya malo musi a tshi vha khosi, o vhusa miṅwaha ya 31 e Yerusalema.+
2 O ita zwo lugaho phanḓa ha Yehova, a tshimbila nḓilani dza Davida makhulukuku wawe, ho ngo pambutshela thungo ya tsha u ḽa kana ya tsha monde.
3 Nga ṅwaha wa vhu 8 a tshi khou vhusa, musi a tshee mutukana, a thoma u ṱoḓa Mudzimu wa Davida makhulukuku wawe;+ nga ṅwaha wa vhu 12, a thoma u kunakisa Yuda na Yerusalema+ nga u bvisa fhethu ha vhurabeli,+ thanda khethwa,* midzimu ya zwifanyiso zwo vhaḓwaho+ na zwifanyiso zwa tsimbi.
4 Vha dovha vha thutha aḽeṱare dza Vhobaali e henefho, a wisa na hune ha ṱomiwa hone zwioro he ha vha hu nṱha hadzo. A dovha a remekanya thanda khethwa,* a kwashekanya midzimu ya zwifanyiso zwo vhaḓwaho na zwifanyiso zwa tsimbi, buse ḽazwo a ḽi hasha nṱha ha mavhiḓa a vhe vha vha vha tshi zwi ṋekedza zwiṱhavhelo.+
5 A fhisa marambo a vhotshifhe kha aḽeṱare dzavho.+ A kunakisa ḽa Yuda na ḽa Yerusalema nga u tou ralo.
6 Na vha miḓini ya Manase, ya Efuraimi,+ ya Simioni na u swika kha ya Nafutali, khathihi na mashubi a u mona nayo,
7 a thutha dziaḽeṱare na u remekanya thanda khethwa* na midzimu ya zwifanyiso zwo vhaḓwaho,+ a zwi ita buse; a wisa na hoṱhe hune ha ṱomiwa hone zwioro kha shango ḽa Isiraele,+ nga murahu a humela Yerusalema.
8 Nga ṅwaha wa vhu 18 a tshi khou vhusa, musi o no kunakisa shango na thembele,* a ruma Shafani+ murwa wa Atsalia, Maaseya murangaphanḓa wa muḓi na Yoa murwa wa Yoahazi muvhulungi wa maṅwalo uri vha lugise nnḓu ya Yehova Mudzimu wawe.+
9 Vha ya kha tshifhe muhulu Hilikia vha mu ṋea tshelede ye ya ḓiswa nḓuni ya Mudzimu, ye vhalindi vha miṋango vha Vhalevi vha i kuvhanganya kha vha lushaka lwa Manase, lwa Efuraimi na kha Vhaisiraele vhoṱhe,+ u katela na kha vha lushaka lwa Yuda, kha lwa Benyamini na kha vhadzulapo vha Yerusalema.
10 Vha i ṋea vho vhewaho uri vha ṱhogomele mushumo une wa itwa nḓuni ya Yehova. Vhashumi vha nḓuni ya Yehova vha i shumisela u lugisa nnḓu.
11 Vha i ṋea vhanna vha re na vhutsila na vhafhaṱi uri vha renge matombo o tsheṱiwaho na matanda a phuphu dza nnḓu na u lugisa nnḓu dze mahosi a Yuda a dzi litsha dzi tshi tshinyala.+
12 Vhenevho vhanna vho ita mushumo nga u fhulufhedzea.+ Vho vha vha tshi langiwa nga Vhalevi: Yahathi na Obadia vha Vhamerari+ na Sakaria na Meshulamu vha Vhakehati,+ uri vha vhe vhalavhelesi. Vhalevi vhoṱhe vha re vhomakone vha u lidza zwilidzo,+
13 vho vha vha tshi langa vhashumi zwavho,* vha tshi lavhelesa vhoṱhe vha itaho mishumo yoṱhe; vhaṅwe Vhalevi vho vha vhe vhaṅwaleli, vhaḓinḓa na vhalindakhoro.+
14 Musi vha tshi khou bvisa tshelede ye ya ḓiswa nḓuni ya Yehova,+ tshifhe Hilikia a wana bugu ya Mulayo+ wa Yehova ye a i ṅwala a tshi shumisa* Mushe.+
15 Ngauralo, Hilikia a amba na Shafani muṅwaleli a ri: “Ndo wana bugu ya Mulayo nḓuni ya Yehova.” Hilikia a i ṋea Shafani.
16 Shafani a ḓisa bugu kha khosi, a amba nayo a ri: “Vhashumeli vhau vha khou ita mishumo yoṱhe ye vha ṋewa yone.
17 Vho dzhia tshelede ye vha i wana nḓuni ya Yehova, vha i ṋea vhanna vho vhewaho na vhane vha ita mushumo.”
18 Shafani muṅwaleli a dovha a amba na khosi a ri: “Hu na bugu ye tshifhe Hilikia a nṋea yone.”+ Shafani a thoma u i vhala phanḓa ha khosi.+
19 Musi khosi i tshi tou pfa mafhungo a re kha Mulayo, ya kherukanya zwiambaro zwayo.+
20 Khosi ya laya Hilikia, Ahikamu+ murwa wa Shafani, Abidoni murwa wa Mika, Shafani muṅwaleli na Asaya mushumeli wa khosi ya ri:
21 “Iyani ni mmbudzisele kha Yehova, ni vhudzisele na vho salaho Isiraele na Yuda nga ha mafhungo a yeneyi bugu ye ya wanala; ngauri mbiti dza Yehova dzine dza ḓo ri ḓela ndi khulu, nge vhomakhulukuku washu vha si ite zwe Yehova a amba, vha si tevhedze zwoṱhe zwo ṅwaliwaho kha heyi bugu.”+
22 Hilikia na vhe vha rumiwa nga khosi, vha ya kha muporofita Huluda+ mufumakadzi wa Shalumu murwa wa Thikiva murwa wa Hasara. Shalumu a ṱhogomelaho kamara ya u vhea zwiambaro. Huluda o vha a tshi dzula kha Tshiṱiriki Tshiswa tsha Yerusalema; vha amba nae henefho.+
23 A amba navho a ri: “Zwe Yehova Mudzimu wa Isiraele a zwi amba ndi hezwi: ‘Vhudza munna o u rumaho kha nṋe u ri:
24 “Yehova u ri: ‘Ndi ḓo ḓisa maṱungu henefha fhethu na kha vhadzulapo vhaho,+ masamba oṱhe o ṅwaliwaho kha bugu+ ye vha i vhala phanḓa ha khosi ya Yuda.
25 Ngauri vho nṱutshela+ vha dubisela miṅwe midzimu zwiṱhavhelo uri vha ntsinyuse+ nga mishumo yoṱhe ya zwanḓa zwavho, mbiti dzanga dzi ḓo shuluwela henefha fhethu, a dzi nga dzimiwi.’”+
26 Fhedzi khosi ya Yuda ye ya ni ruma u vhudzisa Yehova, ni i vhudze uri, “Yehova Mudzimu wa Isiraele u ri: ‘Kha mafhungo e wa a pfa,+
27 ngauri wo ṱavhanya wa ḓisola, wa ḓiṱukufhadza phanḓa ha Mudzimu musi u tshi pfa zwe a amba nga ha henefha fhethu na vhadzulapo vhaho, wa ḓiṱukufhadza phanḓa hanga, wa kherukanya zwiambaro zwau, wa lila phanḓa hanga, na thabelo yau ndo i pfa,+ u ralo Yehova.
28 Ndi ngazwo u tshi ḓo fa wa vhulungwa na vhomakhulukuku wau, u ḓo vhulungwa ḽo lala, a u nga vhoni maṱungu oṱhe ane nda ḓo a ḓisa fhano na kha vhadzulapo vhaho.’”’”+
Vha ḓivhadza khosi eneo mafhungo.
29 Khosi ya rumela mulaedza, ya vhidza vhahulwane vhoṱhe vha Yuda na vha Yerusalema.+
30 Nga murahu, khosi ya ya nḓuni ya Yehova i na vhanna vhoṱhe vha Yuda, vhadzulapo vhoṱhe vha Yerusalema, vhotshifhe, Vhalevi, vhathu vhoṱhe, vhahulwane khathihi na vhaṱuku. Ya vhala mafhungo oṱhe a re buguni ya mulanga ye ya waniwa nḓuni ya Yehova vhathu vha tshi zwi pfa.+
31 Khosi ya ima fhethu hayo, ya vhofha mulanga*+ phanḓa ha Yehova uri i ḓo tevhela Yehova, ya tevhedza ndaela dzawe, khumbudzo dzawe na maitele awe nga mbilu yayo yoṱhe na nga zwoṱhe zwine ya vha zwone+ nga u tevhedza maipfi a mulanga wo ṅwaliwaho kha yeneyi bugu.+
32 Ya dovha ya ita uri vhoṱhe vha re Yerusalema na kha ḽa Benyamini vha tendelane na wonoyo mulanga. Vhadzulapo vha Yerusalema vha ita zwoṱhe zwo ṅwaliwaho kha mulanga wa Mudzimu, Mudzimu wa vhomakhulukuku wavho.+
33 Yosia a bvisa zwithu zwoṱhe zwi nengisaho* mashangoni oṱhe a Vhaisiraele,+ a ita uri muṅwe na muṅwe kha ḽa Isiraele a shumele Yehova Mudzimu wavho. Vhutshiloni hawe hoṱhe, a vho ngo litsha u tevhela Yehova Mudzimu wa vhomakhulukuku wavho.
Ṱhaluso dzi re magumoni a siaṱari
^ Sedzani Mutevhe Wa Ṱhalutshedzo Ya Maipfi.
^ Sedzani Mutevhe Wa Ṱhalutshedzo Ya Maipfi.
^ Sedzani Mutevhe Wa Ṱhalutshedzo Ya Maipfi.
^ Thevhedz., “nnḓu.”
^ Kana “vhahwali vha mihwalo.”
^ Thevhedz., “nga tshanḓa tsha.”
^ Kana “vusulusa mulanga.”
^ Kana “midzimu ya zwifanyiso.”
