Bugu Ya Vhuvhili Ya Koronika 36:1-23
36 Nga zwenezwo, vhathu vha ḽeneḽo shango vha dzhia Yoahasi murwa wa Yosia+ vha mu vhea uri a vhe khosi vhudzuloni ha khotsi awe ngei Yerusalema.+
2 Yoahasi o vha e na miṅwaha ya 23 musi a tshi vha khosi, o vhusa miṅwedzi miraru e Yerusalema.
3 Naho zwo ralo, khosi ya Egipita ya mu bvisa vhuhosini ngei Yerusalema, ya lifhisa shango talente* dza 100 dza siḽiva na talente ya musuku.+
4 Zwiṅwe hafhu, khosi ya Egipita ya vhea Eliakima mukomana wa Yoahasi uri a vhe khosi ya Yuda na ya Yerusalema, ya shandula dzina ḽawe ya mu ira ḽa Yehoyakimi; fhedzi Nexo+ a dzhia murathu wawe Yoahasi a mu isa Egipita.+
5 Yehoyakimi+ o vha e na miṅwaha ya 25 musi a tshi vha khosi, o vhusa miṅwaha ya 11 e Yerusalema. O bvela phanḓa a tshi ita zwi sa takadzi phanḓa ha Yehova Mudzimu wawe.+
6 Khosi Nebukadanetsara+ wa Babele a ḓa u lwa nae, a mu vhofha nga ngeḓane mbili dza koporo, a mu isa Babele.+
7 Nebukadanetsara a dzhia dziṅwe thundu nḓuni ya Yehova a dzi isa Babele, a dzi vhea pfamoni yawe ngei Babele.+
8 Mafhungo oṱhe a Yehoyakimi na zwithu zwi nengisaho zwe a ita na zwithu zwivhi nga hae, zwo ṅwaliwa kha Bugu ya Mahosi a Isiraele na a Yuda; murwa wawe Yehoyakini a vha khosi vhudzuloni hawe.+
9 Yehoyakini+ o vha e na miṅwaha ya 18 musi a tshi vha khosi, o vhusa miṅwedzi miraru na maḓuvha a fumi e Yerusalema; o bvela phanḓa a tshi ita zwi sa takadzi Yehova.+
10 Mathomoni a ṅwaha, Khosi Nebukadanetsara a ruma vhathu uri vha mu ḓise Babele,+ khathihi na madzanga a mutengo muhulu a nḓuni ya Yehova.+ A vhea Tsedekia khotsimunene wa Yehoyakini uri a vhe khosi kha ḽa Yuda na ḽa Yerusalema.+
11 Tsedekia+ o vha e na miṅwaha ya 21 musi a tshi vha khosi, o vhusa miṅwaha ya 11 e Yerusalema.+
12 O bvela phanḓa a tshi ita zwi sa takadzi Yehova Mudzimu wawe. Ho ngo ḓiṱukufhadza phanḓa ha muporofita Yeremia,+ we a vha o laedzwa nga Yehova.
13 A dovha a shandukela Khosi Nebukadanetsara,+ we a mu anisa phanḓa ha Mudzimu, o dzula e na swili* a rindidza mbilu yawe, a hana u vhuyelela ha Yehova Mudzimu wa Isiraele.
14 Vharangaphanḓa vhoṱhe vha vhotshifhe khathihi na vhathu vha tou ṋaṋisa u sa fhulufhedzea, vha ita zwoṱhe zwi nengisaho zwine zwa itwa nga dzitshaka, vha dovha vha tshikafhadza nnḓu ya Yehova+ ye a i ita khethwa ngei Yerusalema.
15 Yehova Mudzimu wa vhomakhulukuku wavho a bvela phanḓa a tshi vha sevha a tshi shumisa vhaḓinḓa vhawe, a tshi vha sevha lunzhi-lunzhi, ngauri o vha a tshi pfela vhuṱungu vhathu vhawe na fhethu hune a dzula hone.
16 Fhedzi vha bvela phanḓa vha tshi goḓa vhaḓinḓa vha Mudzimu wa ngoho,+ vha nyadza zwe a amba+ na u goḓa vhaporofita vhawe,+ u vhuya u swika hu si tshee na fhulufhelo ḽa uri vha ḓo fhodzwa; mbiti dza Yehova dza vha ḓela.+
17 A vha ḓisela khosi ya Vhakaladea,+ ye ya vhulaya vhaṱhannga vhavho nga banga+ nḓuni khethwa yavho;+ a yo ngo pfela vhuṱungu vhaṱhannga kana vhasidzana,* vhaaluwa kana vha si na nungo.+ Mudzimu a kumedzela zwoṱhe zwanḓani zwayo.+
18 Thundu dzoṱhe dza nḓuni ya Mudzimu wa ngoho, khulwane na ṱhukhu, khathihi na lupfumo lwa nḓuni ya Yehova na lwa nḓuni ya khosi na vhakololo vhayo, zwoṱhe ya zwi isa Babele.+
19 Ya fhisa nnḓu ya Mudzimu wa ngoho,+ ya wisa mbondo dza Yerusalema,+ ya fhisa mitsheṱo yoṱhe yo khwaṱhaho, ya fhelisa zwithu zwoṱhe zwa madzanga.+
20 Vhe vha ponyoka banga yo vha isa vhuthubwani ngei Babele,+ vha vha vhashumeli vhayo+ na vha vharwa vhayo u swika muvhuso wa Peresia u tshi thoma u vhusa,+
21 uri hu itee zwe Yehova a amba a tshi shumisa Yeremia,+ u swika shango ḽi tshi ḓo lifha savhatha dzaḽo.+ Maḓuvha oṱhe musi ḽi si na muthu ḽo lifha savhatha, u swika miṅwaha ya 70 i tshi fhela.+
22 Nga ṅwaha wa u thoma hu tshi khou vhusa Khosi Korese+ wa Peresia, Yehova a ita uri hu itee zwe a zwi amba a tshi shumisa Yeremia,+ Yehova a ṱuṱuwedza Khosi Korese wa Peresia uri a ḓivhadze muvhusoni wawe woṱhe, a dovhe a ṅwale+ uri:
23 “Khosi Korese wa Peresia u ri: ‘Yehova Mudzimu wa ṱaḓulu o nṋea mivhuso yoṱhe ya kha ḽifhasi,+ o nndaedza uri ndi mu fhaṱele nnḓu ngei Yerusalema, kha ḽa Yuda.+ Ndi nnyi kha inwi a re muṅwe wa vhathu vhawe? Onoyo nga a ye henengei, Yehova Mudzimu wawe a vhe nae.’”+
Ṱhaluso dzi re magumoni a siaṱari
^ Talente i lingana na khilogramu dza 34,2. Sedzani Ṱhume. B14.
^ Thevhedz., “o omisa mutsinga wawe.”
