Bugu Ya Vhuvhili Ya Koronika 5:1-14
5 Salomo a fhedza mushumo woṱhe we a vha a tshi fanela u u ita nḓuni ya Yehova.+ Salomo a ḓisa zwithu zwe khotsi awe Davida a zwi ita zwikhethwa,+ a dzhenisa siḽiva, musuku na madzanga oṱhe mbulungeloni dza nḓuni ya Mudzimu wa ngoho.+
2 Nga tshenetsho tshifhinga, Salomo a kuvhanganya vhahulwane vha Isiraele, vharangaphanḓa vhoṱhe vha tshaka dzavho, vharangaphanḓa vha miṱa ya vhokhotsi vha Isiraele. Vha ḓa Yerusalema uri vha hwale mbulungelo ya mulanga wa Yehova u bva Muḓini wa Davida+ une wa vha Tsioni.+
3 Vhanna vhoṱhe vha Isiraele vha kuvhangana phanḓa ha khosi vhuṱamboni* vhune ha farwa nga ṅwedzi wa vhusumbe.+
4 Vhahulwane vhoṱhe vha Isiraele vha ḓa, Vhalevi vha hwala Mbulungelo.+
5 Vha ḓisa Mbulungelo, dennde ḽa muṱangano+ na thundu dzoṱhe khethwa dze dza vha dzi denndeni. Vhotshifhe na Vhalevi* vha gonya nazwo.
6 Khosi Salomo na tshitshavha tshoṱhe tsha Isiraele, tsho vhidzwaho uri tshi ṱangane nae, tsho ima nae phanḓa ha Mbulungelo. Ha ṋekedzwa zwiṱhavhelo+ zwa nngu na kholomo nnzhi vhukuma lwe vha si kone u zwi vhala.
7 Vhotshifhe vha ḓisa mbulungelo ya mulanga wa Yehova vhudzuloni hayo, kamarani ya nga ngomu-ngomu, fhethu Hukhethwa-khethwa, fhasi ha phapha dza vhakerube.+
8 Phapha dza vhakerube dzo vha dzo ṱharamuwa nṱha ha Mbulungelo, lwe vhakerube vha tsira Mbulungelo na thanda dzayo+ u bva nṱha.
9 Dzenedzo thanda dzo vha dzo lapfa lwe ṱhodzi dzadzo dza vha dzi tshi vhonala fhethu Hukhethwa, phanḓa ha kamara ya nga ngomu-ngomu, fhedzi dzi sa vhonali nga nnḓa. Dzi kha ḓi vha henefho na ṋamusi.
10 Nga ngomu ha Mbulungelo ho vha hu si na tshithu nga nnḓa ha mbaba mbili dza matombo dze Mushe a dzi vhea nga ngomu hayo ngei Horebe,+ musi Yehova a tshi vhofha mulanga+ na vhathu vha Isiraele vha tshi bva Egipita.+
11 Musi vhotshifhe vha tshi bva fhethu hukhethwa (ngauri vhotshifhe vhoṱhe vha re henefho vho vha vho ḓikunakisa,+ hu sa londwi uri ndi vha tshigwada tshifhio),+
12 vhaimbi vhoṱhe vha Vhalevi+ vha tshigwada tsha Asafu,+ tsha Hemani,+ tsha Yeduthuni+ na vharwa vhavho na mashaka avho, vho ambara zwiambaro zwa labi ḽavhuḓi, vho fara simbala, zwilidzo zwi re na ṱhale na haripa; vho ima nga thungo ya vhubvaḓuvha ha aḽeṱare, vhe na vhotshifhe vha 120 vha tshi khou lidza phalaphala.+
13 Nga tshenetsho tshifhinga, musi vhalidzi vha phalaphala na vhaimbi vha tshi khou renda na u livhuwa Yehova nga vhuthihi, na musi hu tshi lila phalaphala, simbala na zwiṅwe zwilidzo, vha tshi khou renda Yehova, “ngauri ndi wavhuḓi; lufuno lwawe lu sa shanduki ndi lwa lini na lini,”+ nga murahu, nnḓu ya Yehova ya ḓala gole.+
14 Vhotshifhe vha si tsha kona u ita mishumo yavho nga nṱhani ha gole, ngauri vhugala ha Yehova ho vha ho ḓadza nnḓu ya Mudzimu wa ngoho.+
