Bugu Ya Vhuvhili Ya Koronika 7:1-22
7 Musi Salomo a tshi tou fhedza u rabela,+ ha wa mulilo u tshi bva ṱaḓulu,+ wa fhisa tshifhiwa tsha u fhiswa na zwiṱhavhelo, vhugala ha Yehova ha ḓadza nnḓu.+
2 Vhotshifhe vha si kone u dzhena nḓuni ya Yehova ngauri vhugala ha Yehova ho vha ho ḓadza nnḓu ya Yehova.+
3 Vhathu vhoṱhe vha Isiraele vha tshi vhona mulilo u tshi wa na vhugala ha Yehova he ha vha vhu nṱha ha nnḓu, vha khotha muṱani wo itwaho nga matombo vho kwatamisa zwifhaṱuwo zwavho, vha luvha na u livhuwa Yehova, “ngauri ndi wavhuḓi; lufuno lwawe lu sa shanduki ndi lwa lini na lini.”
4 Khosi na vhathu vhoṱhe vha ṋekedza zwiṱhavhelo phanḓa ha Yehova.+
5 Khosi Salomo a ṋekedza zwiṱhavhelo zwa kholomo dza 22 000 na nngu dza 120 000. Khosi na vhathu vhoṱhe vha ṋekedza Mudzimu wa ngoho yeneyo nnḓu.+
6 Vhotshifhe vho vha vho ima fhethu hune vha shuma hone, Vhalevi vho fara zwilidzo zwine zwa shumiswa musi hu tshi imbelwa Yehova.+ (Khosi Davida o vha o ita zwenezwo zwilidzo u itela u livhuwa Yehova a tshi khou renda navho.* Vha tshi ri: “Ngauri lufuno lwawe lu sa shanduki ndi lwa lini na lini.”) Vhotshifhe vho vha vha tshi khou lidzela nṱha phalaphala+ phanḓa havho, ngeno Vhaisiraele vhoṱhe vho ima.
7 Salomo a ita uri muṱa wa vhukati u re phanḓa ha nnḓu ya Yehova u vhe mukhethwa, ngauri o vha a tshi fanela u ṋekedza zwifhiwa+ zwa u fhiswa na zwipiḓa zwa mapfura a zwiṱhavhelo zwa u pfumedzana henefho, ngauri aḽeṱare ya koporo+ ye Salomo a i ita yo vha i ṱhukhu lwe zwiṱhavhelo zwa u fhiswa, zwifhiwa zwa thoro+ na zwipiḓa zwa mapfura zwa vha zwi sa fheleli khayo.+
8 Nga tshenetsho tshifhinga, Salomo a ita vhuṱambo ha maḓuvha a sumbe+ e na Vhaisiraele vhoṱhe, vha re tshivhidzo tshihulu u bva Lebo-hamathi* u swika Muedzini wa Egipita.+
9 Fhedzi nga ḓuvha ḽa vhumalo vha fara muṱangano mukhethwa,+ nge vha fhedza maḓuvha a sumbe vha tshi khou vula aḽeṱare na maḓuvha a sumbe a vhuṱambo.
10 Nga ḓuvha ḽa vhu 23 nga ṅwedzi wa vhusumbe, a litsha vhathu vha ṱuwa vha ya mahayani avho vho takalela+ zwivhuya zwoṱhe zwe Yehova a zwi sumbedza Davida na Salomo na vhathu vhawe vha Isiraele.+
11 Salomo a fhedza u fhaṱa nnḓu ya Yehova, nnḓu* ya khosi+ na zwoṱhe zwe Salomo a elekanya u zwi ita nga ha nnḓu ya Yehova na nnḓu yawe a zwi khunyeledza nga hu bvelelaho.+
12 Yehova a ḓivhonadza kha Salomo+ vhusiku, a ri: “Ndo pfa thabelo yau, ndo ḓinangela henefha fhethu uri hu vhe nnḓu ya zwiṱhavhelo.+
13 Musi ndi tshi vala ḽiṱaḓulu ha si vhe na mvula na musi ndi tshi laya nzie uri dzi fhedze shango, nda rumela malwadze kha vhathu vhanga,
14 arali vhathu vhanga vhane vha vhidzwa+ nga dzina ḽanga vha ḓiṱukufhadza+ vha rabela na u nṱoḓa vha ṱutshela nḓila dzavho mmbi,+ ndi hone ndi tshi ḓo vha pfa ndi ṱaḓulu nda vha hangwela zwivhi zwavho nda fhodza shango ḽavho.+
15 Zwino ndi ḓo dzula ndo lavhelesa, nda pfa thabelo dzine dza rabelwa afha fhethu.+
16 Zwino ndo nanga na u ita uri yeneyi nnḓu i vhe khethwa uri dzina ḽanga ḽi vhe henefho lwa tshoṱhe,+ ndi ḓo i linda na u i ṱhogomela tshifhinga tshoṱhe.+
17 “Arali wa tshimbila phanḓa hanga vhunga khotsi au Davida, wa ita zwoṱhe zwe nda u laya, wa thetshelesa maitele anga na khaṱhulo dzanga,+
18 ndi ḓo khwaṱhisa khuluṋoni ya vhuhosi hau,+ samusi ndo vhofha mulanga na khotsi au Davida,+ nda ri: ‘Hu ḓo dzula hu na munna kha lushaka lwau ane a ḓo vhusa Isiraele.’+
19 Fhedzi arali wa ntshandukela, wa ṱutshela milayo yanga na ndaela dzanga zwe nda u ṋea zwone, wa ya wa shumela miṅwe midzimu, wa i gwadamela,+
20 ndi ḓo bvisa Vhaisiraele shangoni ḽanga ḽe nda vha ṋea ḽone,+ yeneyi nnḓu ye nda i ita khethwa ndi tshi itela dzina ḽanga, a thi tsha ḓo i lavhelesa, ndi ḓo ita uri vhathu vhoṱhe vha i nyadze na u i goḓa.+
21 Yeneyi nnḓu i ḓo vha shubi. Ane a fhira tsini nayo u ḓo sedza o mangala,+ a ri: ‘Ndi ngani Yehova o ita zwenezwi kha ḽeneḽi shango na kha yeneyi nnḓu?’+
22 Vha ḓo ri: ‘Ndi nga nṱhani ha uri vho ṱutshela Yehova+ Mudzimu wa vhomakhulukuku wavho, we a vha bvisa shangoni ḽa Egipita,+ vha nambatela miṅwe midzimu vha i gwadamela na u i shumela.+ Ndi ngazwo o vha ḓisela eneo maṱungu oṱhe.’”+
Ṱhaluso dzi re magumoni a siaṱari
^ Khamusi hu khou ambiwa Vhalevi.
^ Kana “khoroni ya Hamathi.”
^ Kana “pfamo.”
