Bugu Ya Vhuvhili Ya Koronika 9:1-31
9 Khosi ya mufumakadzi ya Sheba+ yo pfa hu tshi ambiwa nga ha Salomo, ngauralo, ya ḓa Yerusalema uri i linge Salomo nga u mu vhudzisa mbudziso dzi konḓaho.* Yo vha i tshi khou fhelekedzwa nga vhaḓinḓa vhanzhi-vhanzhi,* vhe na gamela dzo hwalaho mapfura a baḽisamu na musuku munzhi+ na matombo manzhi a mutengo muhulu. Ya amba na Salomo nga zwoṱhe zwi re mbiluni yayo.+
2 Salomo a fhindula mbudziso dzayo dzoṱhe. A hu na tshe tsha konḓela Salomo u i ṱalutshedza.
3 Musi khosi ya mufumakadzi ya Sheba i tshi vhona vhuṱali hoṱhe ha Salomo,+ nnḓu ye a i fhaṱa,+
4 zwiḽiwa zwa ṱafulani yawe,+ nḓila ine vhashumeli vhawe vha dzula ngayo ṱafulani, mushumo une wa itwa nga vhane vha ḓisa zwiḽiwa ṱafulani na zwiambaro zwavho, vhafari vha zwinwelo na zwiambaro zwavho na zwiṱhavhelo zwawe zwa u fhiswa zwe a vha a tshi zwi ṋekedza tshifhinga tshoṱhe nḓuni ya Yehova,+ ya mangala vhukuma.
5 Ya amba na khosi ya ri: “Mafhungo e nda a pfa ndi shangoni ḽa hashu nga ha zwe wa zwi khunyeledza na nga ha vhuṱali hau o vha e a ngoho.
6 Fhedzi a tho ngo tenda eneo mafhungo u swika ndi tshi ḓa, nda tou zwi vhona nga maṱo anga.+ Fhedzi ndo vha ndi songo vhudzwa mafhungo oṱhe a vhuṱali hau vhuhulu.+ Vhuṱali hau na lupfumo lwau zwi fhira zwithu zwoṱhe zwe nda zwi pfa. Zwine wa vha zwone zwi fhira zwithu zwoṱhe zwe nda zwi pfa.+
7 Hu takala vhathu vhau na vhashumeli vhau vhane vha ima phanḓa hau tshifhinga tshoṱhe vha tshi khou thetshelesa vhuṱali hau!
8 Nga hu rendwe Yehova Mudzimu wau, we a u vhea kha khuluṋoni yawe uri u vhe khosi i imelaho Yehova Mudzimu wau nge a u takalela. Ngauri Mudzimu wau u funa uri Isiraele+ ḽi dzule ḽi hone lini na lini, o u vhea uri u vhe khosi yaḽo uri u haṱule nga u luga.”
9 Ya ṋea khosi talente* dza 120 dza musuku,+ mapfura manzhi a baḽisamu na matombo a mutengo muhulu. A ho ngo tsha dovha ha ḓiswa mapfura manzhi nga u rali a baḽisamu u fana na e a ḓiselwa Khosi Salomo nga khosi ya mufumakadzi ya Sheba.+
10 Zwiṅwe hafhu, vhashumeli vha Hiramu na vhashumeli vha Salomo vhe vha ḓisa musuku u bvaho Ofiri+ vho dovha vha ḓisa na matanda manzhi a miri ya aḽigamu na matombo a mutengo muhulu.+
11 Khosi ya ita zwiṱepisi zwa nnḓu ya Yehova+ na zwa nnḓu* ya khosi+ nga matanda a miri ya aḽigamu, ya itela vhaimbi haripa na zwilidzo zwi re na ṱhale.+ Zwithu zwo raloho zwo vha zwi sa athu u vhonwa shangoni ḽa Yuda.
12 Khosi Salomo a ṋea khosi ya mufumakadzi ya Sheba zwoṱhe zwine ya zwi tama na zwine ya zwi humbela, zwa fhira* zwe ya vha yo zwi ḓisela khosi, a engedza kha zwe a i ṋea nga mafunda. Nga murahu ha zwenezwo ya humela shangoni ḽa hayo na vhashumeli vhayo.+
13 Tshileme tsha musuku we wa vha u tshi ḓiselwa Salomo nga ṅwaha tsho vha tshi talente dza 666 dza musuku,+
14 hu sa vhalwi une wa ḓiswa nga vhavhambadzi na vharengisi na mahosi oṱhe a Vhaarabu na vhavhusi vha shango vha ḓiselaho Salomo musuku na siḽiva.+
15 Khosi Salomo o ita zwiṱangu zwihulwane zwa 200 zwo ḓodziwaho musuku+ (tshiṱangu tshiṅwe na tshiṅwe tsho vha tsho ḓodziwa musuku wa shekele* dza 600)+
16 na zwiṱangu zwiṱuku* zwa 300 zwo ḓodziwaho musuku (tshiṱangu tshiṅwe na tshiṅwe tsho vha tsho ḓodziwa mina* tharu dza musuku). Khosi ya zwi vhea Nḓuni ine ya vhidzwa Ḓaka ḽa Libanoni.+
17 Khosi ya ita na khuluṋoni khulu nga ṋanga dza nḓou, ya i ḓodza musuku vhukuma.+
18 Ho vha hu na zwiṱepisi zwa rathi zwa u ya kha khuluṋoni, yeneyo khuluṋoni yo vha i na fhethu hune a kanda hone ha musuku, yo vha i na ha u tika zwanḓa thungo dzoṱhe, hu na zwifanyiso zwa ndau mbili+ henefho nga matungo a zwa u tika zwanḓa.
19 Ho vha hu na zwifanyiso zwa 12+ zwa ndau zwo ima kha zwiṱepisi zwa rathi, matungo oṱhe a zwiṱepisi zwa rathi hu na ndau nthihi-nthihi. A hu na muṅwe muvhuso we wa ita zwithu zwi ngaho zwenezwi.
20 Zwinwelo zwoṱhe zwa Khosi Salomo zwo vha zwi zwa musuku, thundu dzoṱhe dza Nḓuni ine ya vhidzwa Ḓaka ḽa Libanoni dzo vha dzi dza musuku vhukuma. Ho vha hu si na tshithu na tshithihi tshe tsha itwa nga siḽiva, ngauri siḽiva yo vha i tshi dzhiiwa i si ya ndeme misini ya Salomo.+
21 Ngauri zwikepe zwa khosi zwo vha zwi tshi ya Tharasisi+ zwi na vhashumeli vha Hiramu.+ Zwikepe zwa Tharasisi zwo vha zwi tshi ḓa luthihi nga murahu ha miṅwaha miraru, zwo hwala musuku na siḽiva, ṋanga dza nḓou,+ ṱhoho na phikhokho.
22 Khosi Salomo o vha a tshi fhira mahosi oṱhe a re kha ḽifhasi nga lupfumo na nga vhuṱali.+
23 Mahosi a ḽifhasi ḽoṱhe o ḓa a tshi ṱoḓa u vhona Salomo na u pfa vhuṱali hawe he Mudzimu wa ngoho a vhu vhea mbiluni yawe.+
24 Khosi iṅwe na iṅwe yo vha i tshi ḓisa tshifhiwa, madzanga a siḽiva, madzanga a musuku, zwiambaro,+ mapfumo, mapfura a baḽisamu, bere na meila, zwi tshi ḓiswa ṅwaha muṅwe na muṅwe.
25 Salomo o vha e na fhethu ha 4 000 hune bere dzawe dza dzula hone na gariki na bere* dza 12 000,+ a dzi vhea miḓini ya gariki, dziṅwe a dzi vhea tsini na khosi ngei Yerusalema.+
26 A vhusa mahosi oṱhe u bva Mulamboni* u swika shangoni ḽa Vhafilisita na u ya mukanoni wa Egipita.+
27 Khosi ya ita uri ngei Yerusalema siḽiva i ḓale sa matombo, miṱaululo ya ḓala sa miri ya mihuyu ya ngei Shefela.+
28 Vho vha vha tshi ḓisela Salomo bere dzi bvaho Egipita+ na kha maṅwe mashango oṱhe.
29 Mafhungo oṱhe a Salomo,+ u bva mathomoni u swika magumoni, naa ho ngo ṅwaliwa kha mafhungo a muporofita Nathani,+ kha vhuporofita ha Ahia+ wa Mushiḽo, na kha mafhungo a mabono a Ido+ muvhoni nga ha Yerobeamu+ murwa wa Nebatha?
30 Salomo o vhusa ḽoṱhe ḽa Isiraele e Yerusalema miṅwaha ya 40.
31 Salomo a vhulungwa na vhomakhulukuku wawe. Vha mu vhulunga Muḓini wa Davida khotsi awe;+ murwa wawe Rehabeamu a vha khosi vhudzuloni hawe.+
Ṱhaluso dzi re magumoni a siaṱari
^ Kana “muduba.”
^ Kana “dzithai.”
^ Talente i lingana na khilogramu dza 34,2. Sedzani Ṱhume. B14.
^ Kana “pfamo.”
^ Kana khamusi, “u engedza kha zwifhiwa zwi tshimbidzanaho na mutengo wa.”
^ Shekele nthihi i lemela gramu dza 11,4. Sedzani Ṱhume. B14.
^ Kanzhi zwi farwa nga vhapfuli vha misevhe.
^ Maṅwaloni a Tshihevheru mina nthihi i lemela gramu dza 570. Sedzani Ṱhume. B14.
^ Kana “vhaṋameli vha bere.”
^ Ndi Yufuratha.
