Bugu Ya Vhuvhili Ya Samuele 1:1-27
1 Musi Saulo o no fa, Davida a vhuya a tshi bva u vhulaya Vhaamaleke, a dzula Zikilaga+ maḓuvha mavhili.
2 Nga ḓuvha ḽa vhuraru, ha swika muṅwe munna a tshi bva kha mmbi ya Saulo zwiambaro zwawe zwo kherukana, e na buse kha ṱhoho yawe. Musi a tshi swika kha Davida, a khotha o kwatamisa tshifhaṱuwo, a luvha.
3 Davida a mu vhudzisa a ri: “U bva ngafhi?” A fhindula a ri: “Ndo ponyoka madenndeni a Isiraele.”
4 Davida a mu vhudzisa a ri: “Ho itea mini? Ndi khou humbela uri u mmbudze.” Onoyo muṱhannga a ri: “Vhathu vho shavha nndwani, vhathu vhanzhi vho fa. Saulo na murwa wawe Yonathani vho fa.”+
5 Davida a vhudzisa onoyo muṱhannga a ri: “U zwi ḓivha hani uri Saulo na murwa wawe Yonathani vho fa?”
6 Onoyo muṱhannga a fhindula a ri: “Ndo sokou ḓiwana ndi Thavhani ya Giliboa,+ nda vhona Saulo o gogoḓela pfumo ḽawe, nda vhona gariki na vhaṋameli vha bere vha tshi khou ḓa khae.+
7 Musi a tshi rembuluwa a mmbona, a mmbidzelela, nṋe nda aravha nda ri: ‘Ndi fhano!’
8 A mmbudzisa a ri: ‘Ndi iwe nnyi?’ Nṋe nda ri: ‘Nṋe ndi Muamaleke.’+
9 A ri: ‘Sendela u mphedzise, ngauri ndi khou pfa vhuṱungu vhuhulu.’
10 Nda sendela nda mu fhedzisa,+ nge nda ḓivha uri a nga si tsha tshila nge a vha o huvhala. Nda dzhia khare ye ya vha i ṱhohoni yawe na bengele ḽi re tshanḓani tshawe, ndo zwi ḓisa ha iwe muṋe wanga.”
11 Davida na vhanna vhe a vha e navho vha kherukanya zwiambaro zwavho.
12 Vha ṱungufhala na u lila,+ vha ḓidzima zwiḽiwa ḽa vhuya ḽa kovhela vha tshi khou lilela Saulo, murwa wawe Yonathani na vhathu vha Yehova na nnḓu ya Isiraele,+ ngauri vho vha vho vhulawa nga banga.
13 Davida a vhudzisa onoyo muṱhannga we a mu vhudza eneo mafhungo a ri: “Ndi iwe nnyi?” Ene a ri: “Ndi nṋe ṅwana wa Muamaleke, ane a vha mutsinda kha ḽa Isiraele.”
14 Davida a mu vhudzisa a ri: “Ndi ngani u songo ofha u imisa tshanḓa tshau wa vhulaya muḓodzwa wa Yehova?”+
15 Nga zwenezwo, Davida a vhidza muṅwe wa vhaṱhannga a ri: “Sendela u mu vhulaye.” Onoyo muṱhannga a mu ṱhavha a fa.+
16 Davida a ri: “Malofha au a ḓo vhilwa nṱha ha ṱhoho yau ngauri mulomo wau ndi wone we wa u ṱanzielela wa ri: ‘Ndi nṋe ndo vhulayaho muḓodzwa wa Yehova.’”+
17 Davida a imba luimbo lwa u lilela* Saulo na murwa wawe Yonathani,+
18 a ri vhathu vha Yuda vha funzwe lwonolwo luimbo lu vhidzwaho “Vhura,” lwo ṅwaliwaho kha bugu ya Yashara:+
19 “Iwe Isiraele, vhathu vhau vho nakaho vho vhulawa fhethu hau ha vhurabeli.+
Vhahali vhau vho vhulawa!
20 Ni songo zwi vhudza Vhagathi;+Ni songo zwi ḓivhadza nḓilani dza Asikaloni,Kana vhasidzana vha Vhafilisita vha ḓo takala,Kana vhananyana vha vhanna vha mashuvhuru vha ḓo pembela.
21 Inwi thavha dza Giliboa,+Hu songo tsha wa ṅwando kha iwe na mvula i songo tsha na kha iwe,Hu songo tsha vha na masimu ane a bveledza zwine zwa ḓo vha miṋeelo mikhethwa,+Ngauri henefho tshiṱangu tsha vhahali tsho nyadzwa,Tshiṱangu tsha Saulo a tshi tsha ḓo ḓodzwa mapfura.
22 Vhura ha Yonathani ho vhuya na malofha a vho vhulawahoNa mapfura a vhahali,+Banga ḽa Saulo ḽo vha ḽi sa vhuyi fhedzi.+
23 Saulo na Yonathani+ vho funwaho na u takalelwa musi vha tshi kha ḓi tshila,Na lufuni a vho ngo fhandekana,+Luvhilo lwavho lwo vha lu tshi fhira lwa goni,+Vhe na maanḓa u fhira ndau.+
24 Inwi vhasidzana vha Isiraele lilelani Saulo,We a ni ambadza zwiambaro zwa mivhala mitswuku na zwa maṱeleṱele,We a khavhisa zwiambaro zwaṋu nga madzanga a musuku.
25 Vhahali vho fa nndwani!
Yonathani o vhulawa fhethu hau ha vhurabeli!+
26 Ndi vhaisalela iwe Yonathani mukomana wanga,Wo vha u tshi ntakadza nga maanḓa.+
Lufuno lwashu lwo vha lu tshi mangadza u fhira lufuno lwa vhafumakadzi.+
27 Vha maanḓa vho vhulawaZwiṱhavhane zwa nndwa zwo fheliswa!”
Ṱhaluso dzi re magumoni a siaṱari
^ Kana “ṱungufhalela.”