Bugu Ya Vhuvhili Ya Samuele 10:1-19
-
Vhaamoni na Vhasiria vha a kundwa (1-19)
10 Nga murahu khosi ya Vhaamoni+ ya fa, murwa wawe Hanunu a vha khosi vhudzuloni hawe.+
2 Davida a ri: “Hanunu murwa wa Nahasi ndi ḓo mu sumbedza lufuno lu sa shanduki samusi khotsi awe o ntsumbedza lufuno lu sa shanduki.” Ngauralo, Davida a ruma vhashumeli vhawe uri vha ye u mu khuthadza nge a vha o felwa nga khotsi awe. Musi vhashumeli vha Davida vha tshi swika shangoni ḽa Vhaamoni,
3 vhakololo vha Vhaamoni vha amba na Hanunu muṋe wavho vha ri: “Naa u vhona u nga Davida u khou hulisa khotsi au nge a rumela vhakhuthadzi kha iwe? Naa Davida ho ngo rumela vhashumeli vhawe uri vha ḓe kha iwe uri vha tandule muḓi na u u ṱola vha u thuba?”
4 Hanunu a fara vhashumeli vha Davida a vha vheula ndebvu thungo nthihi,+ a gera zwiambaro zwavho u swika nga fhasi ha khundu, a vha litsha vha ṱuwa.
5 Musi Davida a tshi vhudzwa, a ṱavhanya a rumela vhashumeli vhawe uri vha ye vha vha ṱanganedze ngauri vhenevho vhanna vho vha vho shoniswa zwihulu; khosi ya vha vhudza uri: “Dzulani Yeriko+ u swika ndebvu dzaṋu dzi tshi dovha dza mela, ni kone u vhuya.”
6 Nga u ya ha tshifhinga Vhaamoni vha vhona uri vha vho vhengwa nga Davida, Vhaamoni vha ruma vhaḓinḓa uri vha ye vha renge Vhasiria vha Bethe-rehobo+ na Vhasiria vha Tsoba,+ maswole a 20 000; kha khosi ya Maaka+ vha wana vhanna vha 1 000; kha Ishitobo* vha wana vhanna vha 12 000.+
7 Musi Davida a tshi zwi pfa, a rumela Yoaba na mmbi yawe yoṱhe na vhahali vhawe.+
8 Vhaamoni vha bva vha ima vho ḓilugiselela u lwa khoroni ya muḓi, ngeno Vhasiria vha Tsoba na vha Rehobo, na Ishitobo* na Maaka vho ima vhe vhoṱhe mudavhini.
9 Musi Yoaba a tshi vhona uri mmbi yo vha i tshi khou ḓa u lwa nae i nga phanḓa na nga murahu, a nanga maṅwe maswole a vhahali kha ḽa Isiraele, a a vhea uri a ḓilugiselele u lwa na Vhasiria.+
10 A vhea vhaṅwe vhanna vhoṱhe nga fhasi ha Abishai murathu wawe,+ uri vha ime vho ḓilugiselela u lwa na Vhaamoni.+
11 A ri: “Arali Vhasiria vha vha na maanḓa u mphira, u ḓe u nndamulele; fhedzi arali Vhaamoni vha vha na maanḓa u u fhira, ndi ḓo ḓa nda u lamulela.
12 Ri tea u ḓikhwaṱhisa na u vha na tshivhindi+ ri tshi itela vhathu vha hashu na miḓi ya Mudzimu washu, Yehova u ḓo ita zwine a vhona zwo tea.”+
13 Yoaba na vhanna vhe a vha e navho vha ya u lwa na Vhasiria, vha mu shavha.+
14 Musi Vhaamoni vha tshi vhona uri Vhasiria vho shavha, na vhone vha shavha Abishai vha dzhena muḓini. Nga murahu ha zwenezwo, Yoaba a litsha Vhaamoni a humela Yerusalema.
15 Musi Vhasiria vha tshi vhona uri vho kundwa nga Vhaisiraele, vha dovha vha kuvhangana vhoṱhe.+
16 Hadadesere+ a rumela vhaḓinḓa uri vha vhidze Vhasiria vhane vha dzula seli ha Mulambo,*+ vha ḓa Helama, vho rangwa phanḓa nga Shobaka mulangammbi wa Hadadesere.
17 Musi Davida a tshi vhudzwa, a ṱavhanya a kuvhanganya Vhaisiraele vhoṱhe, vha wela Mulambo wa Yorodane vha swika Helama. Vhasiria vha ima vho ḓilugiselela u lwa na Davida, vha lwa nae.+
18 Fhedzi Vhasiria vha shavha Vhaisiraele; Davida a vhulaya vhatshimbidzi vha gariki vha 700 na vhaṋameli vha bere vha 40 000 vha Vhasiria, a vhulaya Shobaka mulangammbi wavho.+
19 Musi mahosi oṱhe na vhashumeli vha Hadadesere vha tshi vhona uri vho kundwa nga Vhaisiraele, vha ṱavhanya vha pfumedzana na Vhaisiraele, vha vha vhashumeli vhavho;+ Vhasiria vho vha vha tshi vho ofha u thusa Vhaamoni.
Ṱhaluso dzi re magumoni a siaṱari
^ Kana “vhanna vha Tobo.”
^ Kana “vhanna vha Tobo.”
^ Ndi Yufuratha.