Bugu Ya Vhuvhili Ya Samuele 13:1-39
13 Abesalomo murwa wa Davida o vha e na khaladzi o nakaho ane a pfi Thamara,+ Aminoni+ murwa wa Davida o vha a tshi mu funa.
2 Aminoni a tsikeledzea nga maanḓa a vhuya a lwala ngauri o vha a tshi funa khaladzi awe Thamara, we a vha a kha ḓivha musidzana,* Aminoni o vha a tshi vhona zwi tshi konḓa uri a mu ite zwine a funa.
3 Aminoni o vha e na khonani ye ya vha i tshi pfi Yohanadaba+ murwa wa Shimea,+ mukomana wa Davida; Yohanadaba o vha e munna o ṱalifhaho nga maanḓa.
4 Yohanadaba a mu vhudzisa a ri: “Ndi ngani u tshi dzula wo ṱungufhala iwe ṅwana wa khosi? Mulandu ndi mini?” Aminoni a ri: “Ndi khou funa Thamara khaladzi+ a murathu wanga Abesalomo.”
5 Yohanadaba a mu fhindula a ri: “Eḓela mmbeteni wau u ḓiite u nga u khou lwala. Musi khotsi au a tshi ḓa u u vhona, u mu vhudze uri: ‘Ndi khou humbela uri khaladzi anga Thamara a ḓe a mphe zwiḽiwa ngauri ndi khou lwala. Ndi ṱoḓa u mu vhona a tshi nndugisela zwiḽiwa, ndi hone ndi tshi ḓo ḽa.’”
6 Aminoni a eḓela a ḓiita u nga u khou lwala, khosi ya ḓa u mu vhona. Aminoni a amba na khosi a ri: “Ndi khou humbela uri u tendele khaladzi anga Thamara a ḓe a mbakele khekhe mbili dza tshivhumbeo tsha mbilu ndi tshi zwi vhona, ndi hone ndi tshi ḓo ḽa.”
7 Davida a rumela mulaedza ha Thamara we a vha e nḓuni a ri: “Ndi khou humbela uri u ye nḓuni ya khaladzi au Aminoni u mu lugiselele zwiḽiwa.”
8 Ngauralo, Thamara a ya nḓuni ya khaladzi awe Aminoni, he a vha o eḓela hone. A dzhia suko ḽa fuḽauru a ḽi suka, a baka khekhe Aminoni a tshi zwi vhona.
9 A dzi bvisa kha pani a mu ṋea. Fhedzi Aminoni a hana u ḽa a ri: “Vhudza vhathu uri vha bve!” Vhathu vha bva.
10 Aminoni a amba na Thamara a ri: “Nḓisele zwiḽiwa kamarani, ndi hone ndi tshi ḓo ḽa.” Ngauralo, Thamara a dzhia khekhe dza tshivhumbeo tsha mbilu dze a vha o dzi baka a dzi ḓisa kamarani ha khaladzi awe Aminoni.
11 Musi Thamara a tshi sendela tsini nae uri a mu ṋee, Aminoni a mu fara a ri: “Khaladzi anga, iḓa u lale na nṋe.”
12 Fhedzi Thamara a amba nae a ri: “Hai khaladzi anga! U songo ntshonisa, ngauri zwithu zwo raloho a zwi itwi Isiraele.+ U songo ita zwenezwi zwithu zwi shonisaho.+
13 Ndi ḓo tshila hani wo ntshonisa? Na iwe vha ḓo u dzhia sa muthu a sa ḓivhalei kha ḽa Isiraele. Ndi khou humbela uri u ambe na khosi; i nga si hane na nṋe.”
14 Fhedzi a si mu thetshelese, a mu kunda nga nungo, a mu shonisa nga u mu tzhipa.
15 Aminoni a thoma u mu vhenga nga maanḓa, vengo ḽawe ḽa fhira nḓila ye a vha a tshi mu funa ngayo. Aminoni a amba nae a ri: “Vuwa u ṱuwe!”
16 Thamara a amba nae a ri: “Aiwa khaladzi anga; zwino vhuvhi ha u mpandela vhu fhira ha zwe wa nnyita!” Fhedzi a si mu thetshelese.
17 Aminoni a vhidza muḓinḓa wawe muṱuku a ri: “Ndi khou humbela uri u bvise uyu muthu phanḓa hanga, u hoṋe muṋango.”
18 (O vha o ambara tshiambaro tshavhuḓi, ngauri zwo vha zwi zwone zwiambaro zwe zwa vha zwi tshi ambarwa nga vhananyana vha khosi vhane vha kha ḓivha vhasidzana.*) Muḓinḓa wa Aminoni a mu bvisela nnḓa, a khia muṋango.
19 Thamara a ḓishela miḽora ṱhohoni,+ a kherukanya tshiambaro tshavhuḓi tshe a vha o tshi ambara; a vhea zwanḓa zwawe kha ṱhoho, a ṱuwa a tshi khou lila.
20 Khaladzi awe Abesalomo+ a mu vhudzisa a ri: “Naa a si Aminoni khaladzi au we a vha e na iwe? Khaladzi anga u songo vhudza muthu haya mafhungo. Aminoni ndi khaladzi au.+ U songo vhilaela nga ha enea mafhungo.” Thamara a dzula e eṱhe nḓuni ya khaladzi awe Abesalomo.
21 Musi Khosi Davida a tshi pfa nga ha zwenezwo zwithu zwoṱhe, a sinyuwa nga maanḓa.+ Fhedzi o vha a sa funi u vhaisa ṅwana wawe Aminoni ngauri o vha a tshi mu funa, nge a vha e tanzhe ḽawe.
22 Fhedzi Abesalomo a si ambe tshithu na Aminoni, fhungo ḽivhi kana ḽavhuḓi. Naho zwo ralo, Abesalomo a vhenga+ Aminoni nge a shonisa khaladzi awe Thamara.+
23 Nga murahu ha miṅwaha mivhili, vhavheuli vha nngu vha Abesalomo vho vha vhe ngei Baali-hatsoro tsini na Efuraimi,+ Abesalomo o vha o ramba vharwa vhoṱhe vha khosi.+
24 Ngauralo, Abesalomo a ḓa a amba na khosi a ri: “Mushumeli wau u khou vheula nngu dzawe. Ndi khou humbela uri khosi na vhashumeli vhayo vha ṱuwe na nṋe.”
25 Fhedzi khosi ya amba na Abesalomo ya ri: “Aiwa ṅwananga. Arali ra ya roṱhe ri ḓo u lemedza.” Naho Abesalomo o kombetshedza khosi, a yo ngo tenda u ya, fhedzi ya mu fhaṱutshedza.
26 Abesalomo a ri: “Arali u sa khou ṱuwa na riṋe, ndi khou humbela uri u tendele mukomana wanga Aminoni a ṱuwe na riṋe.”+ Khosi ya mu fhindula ya ri: “Ndi ngani a tshi fanela u ṱuwa na iwe?”
27 Fhedzi Abesalomo a mu kombetshedza, a tendela Aminoni na vhana vhoṱhe vha khosi vha tshi ṱuwa nae.
28 Abesalomo a amba na vhaḓinḓa vhawe a ri: “Ni sedzese musi Aminoni o no kambiwa nga waini, nṋe ndi ḓo ri: ‘Vhulayani Aminoni!’ Ni mu vhulaye. Ni songo ofha. Ndi nṋe ane a khou ni laedza. Ḓikhwaṱhiseni ni vhe na tshivhindi.”
29 Vhaḓinḓa vha Abesalomo vha ita Aminoni zwe Abesalomo a vha vhudza zwone; vhaṅwe vhana vhoṱhe vha khosi vha ṋamela meila dzavho vha shavha.
30 Musi vhe nḓilani, Davida a vhudzwa uri: “Abesalomo o vhulaya vharwa vhoṱhe vha khosi, a hu na na muthihi wavho o ponyokaho.”
31 Khosi ya takuwa ya kherukanya zwiambaro zwayo ya eḓela fhasi, vhaṅwe vhashumeli vhayo vhoṱhe vho vha vho ima tsini nayo zwiambaro zwavho zwo kherukana.
32 Naho zwo ralo, Yohanadaba+ murwa wa Shimea+ mukomana wa Davida a ri: “Muṋe wanga a songo vhuya a humbula uri ho vhulawa vharwa vhoṱhe vha khosi, ngauri ndi Aminoni fhedzi o vhulawaho.+ Ndi Abesalomo we a laedza,+ we a zwi humbula u bva nga ḓuvha ḽe Aminoni a nyadzisa khaladzi awe+ Thamara.+
33 Thovhela muṋe wanga a songo tenda mafhungo a uri: ‘Vhana vhoṱhe vha khosi vho vhulawa’; ndi Aminoni e eṱhe o vhulawaho.”
34 Nga tshenetsho tshifhinga, Abesalomo o vha o shavha.+ Nga murahu mulindi a lavhelesa a vhona hu na vhathu vhanzhi vhane vha khou ḓa nga nḓila i re nga murahu hawe tsini na thavha.
35 Yohanadaba+ a amba na khosi a ri: “Vhana vha khosi vho vhuya, samusi mushumeli wau o vha o amba.”
36 Musi a tshi tou fhedza u amba, vhana vha khosi vha dzhena vha vusa tshililo tshihulu; khosi na vhashumeli vhayo vhoṱhe na vhone vha vusa tshililo tshihulu.
37 Fhedzi Abesalomo a shavhela ha Thalamai+ murwa wa Amihudu khosi ya Geshuri. Davida a lilela murwa wawe tshifhinga tshilapfu.
38 Abesalomo a shavhela Geshuri,+ a dzula henefho miṅwaha miraru.
39 Mafheleloni Khosi Davida a ṱuvha Abesalomo, ngauri o vha a si tsha lilela Aminoni.
Ṱhaluso dzi re magumoni a siaṱari
^ Sedzani Mutevhe Wa Ṱhalutshedzo Ya Maipfi.
