Bugu Ya Vhuvhili Ya Samuele 14:1-33
14 Yoaba murwa wa Tseruya+ a ṱhogomela uri khosi yo ṱuvha Abesalomo.+
2 Yoaba a rumela muthu ngei Thekoa+ uri a vhidze mufumakadzi o ṱalifhaho, a amba nae a ri: “Ndi khou humbela uri u ḓiite u nga u khou lilela mufu, u ambare zwiambaro zwine zwa ambarwa nga vhane vha lilela mufu, u songo ḓola mapfura.+ U ḓiite mufumakadzi o no fhedzaho tshifhinga tshilapfu a tshi khou lilela mufu.
3 U ye ha khosi u ambe nayo.” Yoaba a mu vhudza zwine a fanela u zwi amba.
4 Mufumakadzi wa Muthekoa a ya phanḓa ha khosi a khotha o kwatamisa tshifhaṱuwo, a luvha a ri: “Yowee thovhela, nthuse!”
5 Khosi ya ri: “Mulandu ndi mini?” Onoyo mufumakadzi a ri: “Ndi tshilikadzi; munna wanga o fa.
6 Nṋe mushumeli wau ndo vha ndi na vharwa vhavhili, vhenevho vhana vha lwa nga tshavho musi vhe tsimuni. Ho vha hu si na wa u vha lamula, muṅwe a rwa muṅwe a mu vhulaya.
7 Zwino muṱa woṱhe wo vutshela nṋe mushumeli wau, u ri: ‘Ḓisa we a vhulaya muṅwe uri ri mu vhulaye nge a vhulaya+ wahawe, naho zwi tshi nga amba u vhulaya muḽaifa!’ Vha ḓo vhulaya ṅwananga o salaho, ndi ene we nda mu fhulufhela, munna wanga a sala a si tshee na dzina kana ṅwana kha ḽifhasi.”
8 Khosi ya amba na mufumakadzi ya ri: “Vhuyelela hayani hau, ndi ḓo lugisa mafhungo.”
9 Mufumakadzi wa Muthekoa a amba na khosi a ri: “Yowee, thovhela muṋe wanga, nga hu vhonwe nṋe mulandu na vha nnḓu ya khotsi anga, u songo vha kha thovhela na khuluṋoni yawe.”
10 Khosi ya ri: “Arali muṅwe muthu a dovha amba na iwe, u mu ḓise kha nṋe, ha tsha ḓo dovha a u dina.”
11 Fhedzi a ri: “Thovhela nga a humbule Yehova Mudzimu wau uri mulifhedzi+ a si tsha dovha a tshinya a vhulaya ṅwananga.” Davida a ri: “Ndi ana nga Yehova a tshilaho,+ a hu na na luvhudzi na luthihi lwa ṅwana wau lune lwa ḓo wela fhasi.”
12 Onoyo mufumakadzi a ri: “Ndi khou humbela uri mushumeli wau a ambe na thovhela muṋe wanga.” Khosi ya ri: “Amba!”
13 Onoyo mufumakadzi a ri: “Ndi ngani wo ita zwithu zwo raloho wa khakhela vhathu vha Mudzimu?+ Musi khosi i tshi amba nga yeneyo nḓila, zwi ita uri i vhe na mulandu, ngauri khosi a i athu u vhuisa ṅwana wayo we ya mu pandela.+
14 Ri ḓo fa, ra tou nga maḓi o shululelwaho fhasi, ane a si tsha kona u kumbelwa. Fhedzi Mudzimu a nga si fhelise vhutshilo, u humbula zwiitisi zwa uri o pandelwaho a si dzule o pandelwa.
15 Tshiitisi tsha uri ndi ḓe ndi vhudze thovhela muṋe wanga ndi ngauri vhathu vho ntshuwisa. Ngauralo, mushumeli wau a ri: ‘Ndi khou humbela u amba na khosi. Khamusi khosi i ḓo ita zwe phuli yawe ya mu humbela zwone.
16 Ngavhe khosi i tshi thetshelesa ya tshidza phuli yayo zwanḓani zwa munna ane a khou ṱoḓa u mmbulaya khathihi na ṅwananga muthihi fhedzi uri ri si tsha wana ifa ḽe Mudzimu a ri ṋea ḽone.’+
17 Mushumeli wau a ri: ‘Ngavhe ipfi ḽa thovhela muṋe wanga ḽi tshi rudza mbilu yanga,’ ngauri thovhela muṋe wanga u tou nga muruṅwa wa Mudzimu wa ngoho kha u ṱalukanya zwivhuya na zwivhi. Ngavhe Yehova Mudzimu wau a tshi vha na iwe.”
18 Khosi ya fhindula onoyo mufumakadzi ya ri: “Ndi khou humbela uri u songo ndzumbela naho tshi tshini tshine nda ḓo u vhudzisa tshone.” Mufumakadzi a ri: “Ndi khou humbela uri thovhela muṋe wanga a ambe.”
19 Khosi ya vhudzisa ya ri: “Naa ndi Yoaba o u rumaho uri u ḓe u mmbudze enea mafhungo oṱhe?”+ Onoyo mufumakadzi a fhindula a ri: “Ndi ana nga vhutshilo hau, thovhela muṋe wanga, zwine wa khou amba ndi zwone, ngauri ndi Yoaba mushumeli wau we a mpfunzedza enea mafhungo oṱhe e nṋe mushumeli wau nda a amba.
20 Mushumeli wau Yoaba o ita nga u rali uri a shandule mafhungo, fhedzi muṋe wanga o ṱalifha u fana na muruṅwa wa Mudzimu wa ngoho, u a ḓivha zwithu zwoṱhe zwine zwa khou itea shangoni.”
21 Khosi ya amba na Yoaba ya ri: “Zwo luga, ndi ḓo ita nga u ralo.+ Tshimbila u ye u dzhie houḽa muṱhannga Abesalomo.”+
22 Yoaba a khotha tshifhaṱuwo tshawe tsho lavhelesa fhasi a luvha, a renda khosi. Yoaba a ri: “Ṋamusi mushumeli wau u a zwi ḓivha uri u a ntakalela, iwe thovhela muṋe wanga, ngauri thovhela o ṱanganedza khumbelo ya mushumeli wawe.”
23 Yoaba a takuwa a ya Geshuri+ u dzhia Abesalomo a mu ḓisa Yerusalema.
24 Naho zwo ralo, khosi ya ri: “Nga a vhuyelele nḓuni yawe, fhedzi a songo ḓa kha nṋe.” Ngauralo, Abesalomo a ya nḓuni yawe, a si ye ha khosi.
25 Kha ḽoṱhe ḽa Isiraele ho vha hu si na munna we a vha a tshi khoḓwa nga lunako u fhira Abesalomo. U bva kha mulenzhe wawe u swika kha ṱhoho yawe ho vha hu si na tshi soliseaho.
26 Musi a tshi vheula ṱhoho yawe, o vha a tshi i vheula mafheloni a ṅwaha muṅwe na muṅwe ngauri mavhudzi awe o vha a tshi mu lemela, a tshi lemela shekele dza 200* o kalwa nga tshikalo tsha tombo tsha musanda.*
27 Abesalomo o vha e na vharwa vhararu+ na ṅwananyana muthihi we a vha a tshi pfi Thamara. O vha o naka nga maanḓa.
28 Abesalomo a dzula Yerusalema miṅwaha mivhili, fhedzi a si ye ha khosi.+
29 Ngauralo, Abesalomo a vhidza Yoaba uri a mu rume ha khosi, fhedzi a si ḓe. A dovha a mu vhidza lwa vhuvhili, a dovha a hana.
30 Abesalomo a amba na vhashumeli vhawe a ri: “Yoaba u na tsimu tsini na yanga, henefho tsimuni o lima baḽi. Iyani ni i fhise nga mulilo.” Ngauralo, vhashumeli vha Abesalomo vha fhisa yeneyo tsimu.
31 Yoaba a takuwa a ḓa nḓuni ya Abesalomo a ri: “Ndi ngani vhashumeli vhau vho fhisa tsimu yanga?”
32 Abesalomo a amba na Yoaba a ri: “Ndo rumela mulaedza nda ri: ‘Iḓa ndi u rume ha khosi u i vhudzise u ri: “Ndo vhuyela mini Geshuri?+ Zwo vha zwi tshi ḓo vha zwi khwine arali ndi vhe ndi tshi kha ḓi dzula henengei. Zwino ndi khou ṱoḓa u vhona khosi, arali ndi na mulandu, khosi kha i mmbulaye.”’”
33 Ngauralo, Yoaba a ya a amba na khosi. Khosi ya vhidza Abesalomo, a ya a luvha, a khotha o kwatamisa tshifhaṱuwo tshawe phanḓa ha khosi. Khosi ya khisa Abesalomo.+
Ṱhaluso dzi re magumoni a siaṱari
^ Khilogramu dzi ṱoḓaho u vha 2,3. Sedzani Ṱhume. B14.
^ Khamusi tshenetshi ndi tshikalo tshe tsha vha tshi tshi dzula pfamoni kana shekele ya “musanda” i sa fani na dziṅwe shekele.
