Bugu Ya Vhuvhili Ya Samuele 15:1-37
15 Nga murahu ha zwenezwo zwithu zwoṱhe, Abesalomo a ḓiwanela gariki na bere, na vhanna vha 50 vhane vha gidima phanḓa hawe.+
2 Abesalomo o vha a tshi vuwa nga matsheloni-tsheloni a ima thungo ha nḓila i yaho khoroni ya muḓi.+ Musi muthu naho e ufhio a tshi ḓisa mulandu uri u haṱulwe+ nga khosi, Abesalomo o vha a tshi mu vhidza, a ri: “Iwe u bva muḓini ufhio?” Onoyo muthu o vha a tshi fhindula a ri: “Mushumeli wau u bva kha luṅwe lwa tshaka dza Isiraele.”
3 Abesalomo o vha a tshi amba nae a ri: “Mafhungo au ndi a ngoho, a a pfala, fhedzi a hu na muthu wa musanda ane a ḓo thetshelesa mafhungo au.”
4 Abesalomo o vha a tshi ri: “Ngavhe ndi muhaṱuli wa ḽino shango! Ane a ḓisa mulandu o vha a tshi nga u ḓisa kha nṋe, nda ita uri a haṱulwe nga nḓila yo teaho.”
5 Musi muthu a tshi sendela uri a gwadame phanḓa hawe, Abesalomo o vha a tshi isa tshanḓa a mu fara, a mu khisa.+
6 Abesalomo o ita zwenezwi kha Vhaisiraele vhoṱhe vhe vha ḓa kha khosi uri vha wane khaṱhulo; Abesalomo a tshi fhura vhanna vha Isiraele.+
7 Musi ho no fhela miṅwaha miṋa,* Abesalomo a amba na khosi a ri: “Ndi khou humbela uri u ntendele ndi ye Heburoni+ u ita zwe nda anela Yehova.
8 Ngauri nṋe mushumeli wau ndo ita wonoyo muano+ ndi tshi kha ḓi dzula ngei Geshuri+ kha ḽa Siria nda ri: ‘Arali Yehova a ita uri ndi vhuyelele Yerusalema, ndi ḓo gwadamela* Yehova.’”*
9 Khosi ya amba nae ya ri: “Tshimbila nga mulalo.” A takuwa a ya Heburoni.
10 Abesalomo a ruma dziṱholi kha tshaka dzoṱhe dza Isiraele, a ri: “Musi ni tshi tou pfa luṋanga lu tshi lila ni ri: ‘Abesalomo ndi khosi ya Heburoni!’”+
11 Vhanna vha 200 vha Yerusalema vho vha vho ṱuwa na Abesalomo henengei; vho vha vho rambiwa, vha ṱuwa vha sa humbuleli tshithu, vha sa ḓivhi zwe zwa vha zwi tshi khou itea.
12 Zwiṅwe hafhu, musi a tshi ṋekedza zwiṱhavhelo, Abesalomo a vhidza Ahitofele+ wa Mugilo, mueletshedzi+ wa Davida uri a ḓe a tshi bva muḓini wa hawe ngei Gilo.+ Tshimbevha tsha ḓi ya tshi tshi hulela, vhathu vhane vha tikedza Abesalomo vha ḓi ya vha tshi engedzea.+
13 Nga u ya ha tshifhinga ha ḓa muḓinḓa ha Davida, a ri: “Vhanna vha Isiraele vha vho ima na Abesalomo.”
14 Davida a ṱavhanya a amba na vhashumeli vhawe vhoṱhe vhe a vha e navho ngei Yerusalema a ri: “Takuwani ri shavhe+ ngauri a hu na ane a ḓo ponyoka kha Abesalomo! Ṱavhanyani uri a sa ḓo ri fara a ri ḓisela khombo, a vhulaya vha re muḓini nga banga!”+
15 Vhashumeli vha khosi vha amba nayo vha ri: “Ro ḓiimisela u ita tshiṅwe na tshiṅwe tshine thovhela muṋe washu a tshi funa.”+
16 Khosi ya ṱuwa na muṱa wayo woṱhe, fhedzi ya sia vhafumakadzi vhayo vha fumi vha vhuimo ha fhasi*+ uri vha sale vha tshi ṱhogomela nnḓu.*
17 Khosi ya bvela phanḓa na lwendo lwayo na vhathu vhoṱhe vhe ya vha i navho, vha swika vha ima Bethe-merahaka.
18 Vhashumeli vhawe vhoṱhe vho vha vha tshi khou pfuka phanḓa ha khosi, Vhakireti, Vhapelethi,+ Vhagathi+ na vhanna vha 600 vhe vha mu tevhela vha bvaho Gathi.+
19 Khosi ya amba na Ithai+ wa Mugathi ya ri: “Ndi ngani iwe u tshi khou ṱuwa na riṋe? Huma u ye u dzule na khosi ntswa, ngauri u mutsinda, wo shavha shangoni ḽa hau.
20 A si kale wo swika, naa zwino ndi fanela u ita uri u tendeleke na riṋe u ye huṅwe na huṅwe hune ra ya hone? Huma na vhahau, ngavhe Yehova a tshi u sumbedza lufuno lu sa shanduki na uri u a fhulufhedzea!”+
21 Fhedzi Ithai a fhindula khosi a ri: “Ndi ana nga Yehova a tshilaho na nga thovhela muṋe wanga a tshilaho, hune thovhela muṋe wanga a ḓo ya hone, ndo ḓiimisela u fa nae!”+
22 Davida a amba na Ithai+ a ri: “Fhira.” Ngauralo, Ithai wa Mugathi a fhira na vhanna vhoṱhe vhe a vha e navho na vhana.
23 Muṅwe na muṅwe wa ḽeneḽo shango a vusa tshililo tshihulu musi vhenevho vhathu vhoṱhe vha tshi fhira, khosi yo vha yo ima thungo ha Govha ḽa Kidironi;+ vhathu vhoṱhe vha fara nḓila ya u ya sogani.
24 Tsadoko+ na ene o vha e henefho na Vhalevi+ vhoṱhe vho hwalaho mbulungelo+ ya mulanga wa Mudzimu wa ngoho;+ vha vhea Mbulungelo ya Mudzimu wa ngoho fhasi; Abiathara+ a ḓa henefho, u swika vhathu vhoṱhe vha tshi bva muḓini.
25 Fhedzi khosi ya amba na Tsadoko ya ri: “Humisela Mbulungelo ya Mudzimu wa ngoho muḓini.+ Arali Yehova a ntakalela, u ḓo dovha a mbuisa nda dovha nda vhona na hune ya dzula hone.+
26 Fhedzi arali a ri: ‘A thi u takaleli,’ nga a nnyite zwine a vhona zwo tea.”
27 Khosi ya amba na tshifhe Tsadoko ya ri: “Naa a u muvhoni?+ Vhuyelela muḓini nga mulalo, u dzhie na murwa wau Ahimaatsi na Abiathara na murwa wawe Yonathani.+
28 Ndi ḓo mona-mona mirathoni i re sogani u swika ni tshi nḓivhadza.”+
29 Tsadoko na Abiathara vha humisela Mbulungelo ya Mudzimu wa ngoho Yerusalema, vha dzula henengei.
30 Davida a gonya Thavha* ya Miṱwari+ a tshi khou lila, o fukedza ṱhoho yawe, a tshimbila a songo ambara tshithu milenzheni. Vhathu vhoṱhe vhe a vha e navho na vhone vho vha vho fukedza ṱhoho dzavho, vha tshi khou lila musi vha tshi khou gonya.
31 Davida a vhudzwa uri: “Ahitofele ndi muṅwe wa vhane vha khou ita tshimbevha+ na Abesalomo.”+ Davida a ri: “Yowee Yehova,+ ndi khou humbela uri nyeletshedzo ya Ahitofele i vhe ya vhutsilu!”+
32 Musi Davida a tshi swika ṱhodzini ye vhathu vha vha vha tshi gwadamela hone Mudzimu, a ṱanganedzwa nga Husai+ wa Muarakiti+ tshiambaro tshawe tsho kherukana e na buse kha ṱhoho.
33 Naho zwo ralo, Davida a amba nae a ri: “Arali wa tshimbila na nṋe u ḓo nndemedza.
34 Fhedzi arali wa vhuyelela muḓini u vhudze Abesalomo u ri: ‘Thovhela, nṋe ndi mushumeli wau. Ndo vha ndi mushumeli wa khotsi au, fhedzi zwino ndi mushumeli+ wau,’ ndi hone u tshi ḓo kona u nthusa nga u khakhisa nyeletshedzo ya Ahitofele.+
35 Tshifhe Tsadoko na tshifhe Abiathara vha ḓo vha vhe na iwe henefho. Zwoṱhe zwine wa ḓo zwi pfa musanda u zwi vhudze tshifhe Tsadoko na tshifhe Abiathara.+
36 Vha na vhana vhavho vhavhili henefho, Ahimaatsi+ murwa wa Tsadoko na Yonathani+ murwa wa Abiathara, u vha rume vha ḓe vha mmbudze zwiṅwe na zwiṅwe zwine wa zwi pfa.”
37 Ngauralo, Husai khonani ya Davida+ a swika muḓini musi Abesalomo a tshi khou dzhena Yerusalema.
Ṱhaluso dzi re magumoni a siaṱari
^ Kana khamusi, “miṅwaha ya 40.”
^ Thevhedz., “shumela.”
^ Kana “ndi ḓo ṋekedza Yehova tshifhiwa.”
^ Sedzani Mutevhe Wa Ṱhalutshedzo Ya Maipfi.
^ Kana “pfamo.”
^ Kana “tshikwara.”