Bugu Ya Vhuvhili Ya Samuele 17:1-29
17 Ahitofele a amba na Abesalomo a ri: “Ndi khou humbela uri u ntendele ndi nange vhanna vha 12 000 uri ri gonye ri pandamedze Davida vhusiku vhuno.
2 Ndi ḓo mu tshoṱela musi o neta a si na maanḓa,+ ndi ḓo mu tshuwisa; vhathu vhoṱhe vha re nae vha ḓo shavha, ndi ḓo vhulaya khosi fhedzi.+
3 Ndi hone ndi tshi ḓo vhuisa vhathu vhoṱhe ha iwe. U vhuya ha vhathu vhoṱhe zwi ḓitika nga zwine zwa ḓo itea kha munna ane wa khou mu ṱoḓa. Ngauralo, vhathu vhoṱhe vha ḓo vha na mulalo.”
4 Abesalomo na vhahulwane vhoṱhe vha Isiraele vha takalela zwe zwa ambiwa.
5 Naho zwo ralo, Abesalomo a ri: “Ndi khou humbela uri hu vhidzwe na Husai+ wa Muarakiti, ri pfe zwine a ḓo zwi amba.”
6 Ngauralo, Husai a ya ha Abesalomo. Abesalomo a amba nae a ri: “Yeneyi ndi nyeletshedzo ye Ahitofele a ri ṋea yone. Naa ri ite zwe a zwi amba? Arali zwi sa konadzei, iwe ri vhudze zwine ra fanela u zwi ita.”
7 Husai a amba na Abesalomo a ri: “Nyeletshedzo ye Ahitofele a u ṋea yone a si yavhuḓi kha hovhu vhuimo!”+
8 Husai a dovha a ri: “Iwe u a ḓivha zwavhuḓi uri khotsi au na vhanna vhane a vha navho ndi vhahali,+ vho sinyuwa nga maanḓa vha tou nga tshivhingwi tsho xedza vhana vhatsho.+ Zwiṅwe hafhu, khotsi au ndi muhali,+ a nga si fhedze vhusiku hoṱhe e na vhathu.
9 Hune a vha hone zwino o dzumbama kha ḽiṅwe bako kana huṅwe fhethu;+ arali a ri vutshela u thoma, vhane vha ḓo zwi pfa vha ḓo ri: ‘Vhane vha ima na Abesalomo vho kundwa!’
10 Na munna a re na tshivhindi ane mbilu yawe ya fana na ya ndau+ na ene u ḓo tshuwa, ngauri Vhaisiraele vhoṱhe vha a zwi ḓivha uri khotsi au ndi munna wa maanḓa+ na vhanna vhane a vha navho vha na tshivhindi.
11 Nyeletshedzo yanga ndi heyi: Kuvhanganya Vhaisiraele vhoṱhe u bva Dani u swika Beresaba,+ vha ḓe vhe vhanzhi sa muṱavha wa lwanzhe,+ u vha range phanḓa nndwani.
12 Ri ḓo lwa nae huṅwe na huṅwe hune ra ḓo mu wana hone, ri ḓo mu wela u fana na ṅwando une wa wela fhasi; a hu na ane a ḓo ponyoka, ene na vhathu vhawe vha nga si ponyoke.
13 Arali a shavhela muḓini, Vhaisiraele vhoṱhe vha ḓo hwala thambo vha ya kha wonoyo muḓi, ri ḓo u kokodzela govhani hu si sale na kupiḓa kwawo na kuthihi.”
14 Abesalomo na vhanna vhoṱhe vha Isiraele vha ri: “Nyeletshedzo ya Husai wa Muarakiti i khwine+ u fhira nyeletshedzo ya Ahitofele!” Ngauri Yehova o vha o ḓiimisela u khakhisa nyeletshedzo yavhuḓi ya Ahitofele+ uri Yehova a ḓisele Abesalomo khombo.+
15 Nga murahu Husai a amba na tshifhe Tsadoko na tshifhe Abiathara+ a ri: “Zwe Ahitofele a eletshedza Abesalomo na vhahulwane vha Isiraele ndi hezwi na hezwi, zwe nṋe nda eletshedza ndi hezwi na hezwi.
16 Ṱavhanyani ni rumele muthu uri a ye u vhudza Davida uri: ‘U songo lala mirathoni* ya sogani vhusiku vhuno, fhedzi u wele mulambo nga u ṱavhanya uri khosi na vhathu vhoṱhe vha re nayo vha sa ḓo vhulawa.’”+
17 Yonathani+ na Ahimaatsi+ vho vha vha tshi khou dzula Eni-rogele,+ mufumakadzi wa mushumeli a ya a vha vhudza, vha ya vha vhudza Khosi Davida, ngauri vho vha vha sa ṱoḓi u vhonwa vha tshi khou dzhena muḓini.
18 Naho zwo ralo, muṅwe muṱhannga a vha vhona a vhudza Abesalomo. Vhuvhili havho vha ṱuwa nga u ṱavhanya vha ya nḓuni ya muṅwe munna wa Bakurimi+ we a vha e na tshisima muṱani wawe. Vha ya vha dzhena nga ngomu,
19 mufumakadzi wawe a tiba tshenetsho tshisima, a shela thoro dzo fhulwaho nṱha hatsho; ho vha hu si na muthu na muthihi ane a ḓivha nga hazwo.
20 Vhashumeli vha Abesalomo vha ḓa kha onoyo mufumakadzi nḓuni yawe vha mu vhudzisa vha ri: “Ahimaatsi na Yonathani vha ngafhi?” Onoyo mufumakadzi a vha fhindula a ri: “Vho fhira nga henefha vha tshi khou ya mulamboni.”+ Vhenevho vhanna vha ya vha vha ṱoḓa, fhedzi vha si vha wane, vha humela Yerusalema.
21 Musi vhenevho vhanna vho no ṱuwa, vha bva tshisimani vha ya vha ḓivhadza khosi Davida. Vha amba nae vha ri: “Takuwa u ṱavhanye u wele mulambo; ngauri hezwi ndi zwe Ahitofele a eletshedza uri u itwe zwone.”+
22 Nga u ṱavhanya Davida na vhathu vhoṱhe vhe a vha e navho vha takuwa, vha wela Mulambo wa Yorodane. Ḽi tshi tsha, vhoṱhe vho vha vho no wela Mulambo wa Yorodane.
23 Musi Ahitofele a tshi vhona uri nyeletshedzo yawe a yo ngo tevhedzwa, a vhofhelela sale kha donngi yawe a ya nḓuni yawe muḓini wa hawe.+ Musi o no dzudzanya mafhungo a muṱa wawe,+ a ḓihunga.+ A fa, a vhulungwa vhiḓani ḽa vhomakhulukuku wawe.
24 Davida a ya Mahanaimi,+ Abesalomo a wela Mulambo wa Yorodane na vhanna vhoṱhe vha Isiraele.
25 Abesalomo a vhea Amasa+ uri a vhe mulangammbi vhudzuloni ha Yoaba;+ Amasa o vha e ṅwana wa munna ane a pfi Ithira wa Muisiraele, we a ita zwa vhudzekani na Abigaili+ ṅwana wa Nahasi. Onoyo Abigaili ndi murathu wa Tseruya, mme a Yoaba.
26 Isiraele na Abesalomo vha atha madennde shangoni ḽa Giḽiada.+
27 Musi Davida a tshi tou swika Mahanaimi, Shobi murwa wa Nahasi a bvaho Raba+ ḽa Vhaamoni, Maxiri+ murwa wa Amiele a bvaho Lodebara na Barasilai+ wa Mugiḽiada a bvaho Rogelima,
28 vha ḓisa zwa u eḓela khazwo, masambelo, khali dza vumba, goroi, baḽi, fuḽauru, thoro dzo kadzingwaho, ṋawa, nḓodzi, thoro dzo omiswaho,
29 mutoli, boḓoro, nngu na tshizi. Vho ḓisela Davida na vhathu vha re nae zwenezwi zwithu zwoṱhe uri vha ḽe,+ ngauri vho ri: “Vhathu vha na nḓala, vho neta, vha na ḓora ngei sogani.”+
Ṱhaluso dzi re magumoni a siaṱari
^ Kana khamusi, “midavhini.”
