Bugu Ya Vhuvhili Ya Samuele 18:1-33
18 Davida a vhala vhathu vhe a vha e navho, a vhea vhane vha ranga phanḓa vha zwigidi na vhane vha ranga phanḓa vha maḓana.+
2 Zwiṅwe hafhu, Davida a ruma vhenevho vhanna vha bva vhe zwigwada zwiraru, tshiṅwe tsho rangwa phanḓa nga Yoaba,+ tshiṅwe tsho rangwa phanḓa nga Abishai+ mukomana wa Yoaba, murwa wa Tseruya,+ tsha vhuraru tsho rangwa phanḓa nga Ithai+ wa Mugathi. Khosi ya amba na vhenevho vhanna ya ri: “Ndi ḓo bva na inwi.”
3 Fhedzi vha ri: “U songo bva,+ ngauri arali ra shavha kana vhaṅwe vhashu vha fa, a zwi nga ḓo vha dina; ngauri iwe u wa ndeme u fhira riṋe vha 10 000.+ Ngauralo, zwi ḓo vha khwine u tshi ri thusa u muḓini.”
4 Khosi ya amba navho ya ri: “Zwiṅwe na zwiṅwe zwine na vhona zwi khwine, ndi ḓo zwi ita.” Khosi ya ima tsini ha khoro ya muḓi, vhanna vha bva vhe zwigwada zwa maḓana na zwigwada zwa zwigidi.
5 Khosi ya laedza Yoaba, Abishai na Ithai ya ri: “Ni fare zwavhuḓi Abesalomo muṱhannga wanga ni tshi itela nṋe.”+ Vhanna vhoṱhe vha zwi pfa musi khosi i tshi vhudza vharangaphanḓa vhoṱhe nga ha Abesalomo.
6 Vhanna vha bva vha ya ḓakani u ṱangana na Vhaisiraele, vha lwela ḓakani ḽa Efuraimi.+
7 Henefho vhathu vha Isiraele+ vha kundwa nga vhashumeli vha Davida,+ nga ḽeneḽo ḓuvha ha vha na bulayo ḽihulu, ha fa vhanna vha 20 000.
8 Nndwa ya phaḓalala na ḽeneḽo shango ḽoṱhe. Zwiṅwe hafhu, nga ḽeneḽo ḓuvha ha fa vhathu vhanzhi ḓakani u fhira vhe vha vhulawa nga banga.
9 Mafheleloni Abesalomo a ḓiwana o livhana na vhashumeli vha Davida. Abesalomo o vha o ṋamela meila, yeneyo meila ya sera nga fhasi ha matavhi a muri muhulu, ṱhoho yawe ya fashwa nga wonoyo muri, a sala o nembelela ngeno meila ye a vha o i ṋamela yo fhirela phanḓa.
10 Muṅwe a mu vhona a vhudza Yoaba+ a ri: “Ndo vhona Abesalomo o nembelela murini muhulu.”
11 Yoaba a fhindula onoyo munna a ri: “Arali wo mu vhona, ndi ngani u songo mu vhulaya henefho a wela fhasi? Ndo vha ndi tshi ḓo u ṋea shekele* dza fumi dza siḽiva na bannda.”
12 Fhedzi onoyo munna a fhindula Yoaba a ri: “Naho arali ndi vhe ndo ṋewa shekele dza 1 000 dza siḽiva, ndo vha ndi sa ḓo isa tshanḓa tshanga kha ṅwana wa khosi, ngauri ro pfa khosi i tshi laya iwe, Abishai na Ithai ya ri: ‘Ni ṱhogomele muṱhannga wanga Abesalomo uri a si huvhadzwe.’+
13 Arali ndo vha ndi songo thetshelesa, ndo mu vhulaya, khosi yo vha i tshi ḓo fhedzisela yo zwi ḓivha, iwe wo vha u sa ḓo ntsireledza.”
14 Yoaba a ri: “A thi nga ḓo ḓifhedzela tshifhinga nga iwe!” Yoaba a dzhia misevhe miraru a ṱhavha Abesalomo kha mbilu musi a tshi kha ḓi tshila o nembelela henefho murini muhulu.
15 Vhaḓinḓa vha fumi vhane vha hwala zwiṱhavhane zwa Yoaba vha ḓa vha mu ṱhavha u swika a tshi fa.+
16 Yoaba a lidza luṋanga, vhanna vha litsha u pandamedza Vhaisiraele; Yoaba a vha litshisa.
17 Vha hwala Abesalomo vha mu posa dindini ḽihulu henefho ḓakani, vha ṱhopha matombo nṱha hawe a vha tshiṱhopho tshihulu.+ Vhaisiraele vhoṱhe vha shavhela mahayani avho.
18 Musi Abesalomo a tshi kha ḓi tshila, o vha o ḓifhaṱela tshihumbudzi ngei Govhani ḽa Khosi,+ nge a ri: “A thi na ṅwana ane a ḓo ita uri dzina ḽanga ḽi humbulwe.”+ Ngauralo, a ira tshenetsho tshihumbudzi dzina ḽawe, na ṋamusi tshi kha ḓi vhidzwa Tshihumbudzi tsha Abesalomo.
19 Ahimaatsi+ murwa wa Tsadoko a ri: “Ndi khou humbela uri u ntendele ndi gidimele ha khosi uri ndi i vhudze enea mafhungo, ngauri Yehova o i haṱula nga nḓila yo teaho nga u i tsireledza kha maswina ayo.”+
20 Fhedzi Yoaba a amba nae a ri: “Ṋamusi a si iwe ane wa ḓo isa mafhungo. Fhedzi u ḓo a isa ḽiṅwe ḓuvha, ṋamusi a wo ngo fanela u a isa, ngauri ṅwana wa khosi o fa.”+
21 Yoaba a amba na Mukushi+ a ri: “Tshimbila u ye u vhudze khosi zwe wa zwi vhona.” Mukushi a losha Yoaba, a gidima a ṱuwa.
22 Ahimaatsi murwa wa Tsadoko a dovha a amba na Yoaba a ri: “Naho ha nga itea mini, ndi khou humbela uri u ntendele ndi tevhele Mukushi.” Naho zwo ralo, Yoaba a ri: “Ṅwananga ndi ngani u tshi fanela u mu tevhela ngeno hu si na mafhungo ane wa ḓo a amba?”
23 Ene a ri: “Naho ha nga itea mini, ntendele ndi gidime.” Yoaba a amba nae a ri: “Tevhela!” Ahimaatsi a fara nḓila i bvaho nga tshiṱirikini tsha Yorodane, a fhirela Mukushi.
24 Davida o vha o dzula vhukati ha khoro mbili dza muḓi,+ mulindi+ a gonya nṱha ha ṱhanga ya khoro a ima henefho. A sedza a vhona munna a tshi khou gidima e eṱhe.
25 Mulindi a vhidzelela a ḓivhadza khosi. Khosi ya ri: “Arali e eṱhe, u na mafhungo.” Musi onoyo munna a tshi vho sendela tsini-tsini,
26 mulindi a vhona muṅwe munna a tshi khou gidima. Ngauralo, mulindi a vhidzelela mulindakhoro a ri: “Ndi khou vhona muṅwe munna a tshi khou gidima e eṱhe!” Khosi ya ri: “Na onoyo u khou ḓisa mafhungo.”
27 Mulindi a ri: “Ndi khou vhona munna wa u thoma a tshi khou gidima u fana na Ahimaatsi+ murwa wa Tsadoko,” khosi ya ri: “Ndi munna o lugaho, o fara mafhungo avhuḓi.”
28 Mafheleloni Ahimaatsi a vhidzelela khosi a ri: “Zwoṱhe zwo luga!” A khotha phanḓa ha khosi o kwatamisa tshifhaṱuwo tshawe a ri: “Nga hu khoḓwe Yehova Mudzimu wau, we a fhelisa vhanna vhe vha shandukela thovhela muṋe wanga!”+
29 Naho zwo ralo, khosi ya ri: “Naa uḽa muṱhannga Abesalomo u tshee o takala?” Ahimaatsi a fhindula a ri: “Ndo vhona hu na bonyongo ḽihulu musi Yoaba a tshi ruma mushumeli wa khosi na mushumeli wau, fhedzi a thi ḓivhi uri ho itea mini.”+
30 Khosi ya ri: “Imela thungo.” Ene a imela thungo.
31 Ha swika Mukushi.+ Mukushi a ri: “Thovhela muṋe wanga thetshelesa mafhungo haya: Ṋamusi Yehova o haṱula nga nḓila yo teaho nga u u vhofholola zwanḓani zwa vhoṱhe vhe vha u shandukela.”+
32 Fhedzi khosi ya amba na Mukushi ya ri: “Naa uḽa muṱhannga Abesalomo u tshee o takala?” Mukushi a fhindula a ri: “Ngavhe maswina oṱhe a thovhela muṋe wanga na vhoṱhe vhane vha u shandukela uri vha u huvhadze vha tshi fana na onoyo muṱhannga!”+
33 Eneo mafhungo a vhaisa khosi, ya gonya kamarani ya nṱha ya khoro, ya lila. Ya tshimbila i tshi ri: “Abesalomo ṅwananga, ṅwananga Abesalomo! Ngavhe hu fe nṋe vhudzuloni hau, iwe ṅwananga Abesalomo, ṅwananga!”+
Ṱhaluso dzi re magumoni a siaṱari
^ Shekele nthihi i lemela gramu dza 11,4. Sedzani Ṱhume. B14.
