Bugu Ya Vhuvhili Ya Samuele 19:1-43
19 Yoaba a vhudzwa u pfi: “Khosi i khou lilela Abesalomo.”+
2 Nga zwenezwo, gundo ḽa ḽeneḽo ḓuvha ḽa shanduka ḽa vha tshililo kha vhathu vhoṱhe musi vha tshi pfa uri khosi i khou lilela murwa wayo.
3 Vhathu vha ṋengeledza vha vhuyelela muḓini+ nga ḽenelo ḓuvha sa vhathu vha re na ṱhoni nge vha shavha nndwani.
4 Khosi ya fukedza tshifhaṱuwo tshayo ya ṱavha mukosi ya ri: “Ṅwananga Abesalomo! Ṅwananga Abesalomo, ṅwananga!”+
5 Yoaba a dzhena pfamoni he ha vha hu na khosi, a ri: “Ṋamusi wo shonisa vhashumeli vhau vhoṱhe, vhe vha tshidza vhutshilo hau, ha vharwa vhau,+ vhananyana vhau,+ vhafumakadzi vhau na vhafumakadzi vhau vha vhuimo ha fhasi.*+
6 U funa vhane vha u vhenga, wa vhenga vhane vha u funa, ngauri wo zwi sumbedza khagala ṋamusi uri vharangaphanḓa vhau na vhashumeli vhau a si vha ndeme kha iwe, ngauri ndi na vhungoho ha uri arali ṋamusi Abesalomo o vha a tshi kha ḓi tshila, riṋe vhaṅwe roṱhe ro fa, zwo vha zwi tshi ḓo vha zwo luga kha iwe.
7 Zwino takuwa u ye u khwaṱhisedze vhashumeli vhau ngauri ndi ana nga Yehova uri arali wa sa ya, a hu na na munna na muthihi ane a ḓo sala na iwe vhusiku vhuno. Hezwi zwi ḓo u vhifhela u fhira khombo dzoṱhe dze dza u wela u bva vhuṱukuni.”
8 Khosi ya takuwa ya ya u dzula khoroni ya muḓi, vhathu vhoṱhe vha ḓivhadzwa uri: “Khosi yo dzula khoroni.” Vhathu vhoṱhe vha ḓa phanḓa ha khosi.
Fhedzi vhaṅwe Vhaisiraele vho vha vho shavhela mahayani avho.+
9 Vhathu vhoṱhe vha tshaka dza Isiraele vho vha vha tshi khou pikisana, vha tshi ri: “Khosi yo ri tshidza kha maswina ashu,+ ya ri tshidza zwanḓani zwa Vhafilisita; fhedzi zwino yo shavha shangoni ḽayo nga nṱhani ha Abesalomo.+
10 Abesalomo we ra mu vhea uri a ri vhuse+ o fela nndwani.+ Zwino ndi ngani ni sa vhuisi khosi?”
11 Khosi Davida a rumela mulaedza kha tshifhe Tsadoko+ na tshifhe Abiathara+ a ri: “Ambani na vhahulwane vha Yuda,+ ni ri: ‘Ndi ngani ni tshi khou lenga u vhuisa khosi pfamoni yayo, ngeno zwe zwa ambiwa nga Vhaisiraele vhoṱhe zwo swika kha khosi pfamoni yayo?
12 Inwi ni mashaka anga; ni malofha anga na ṋama yanga. Ndi ngani ni tshi khou lenga u vhuisa khosi?’
13 Ni vhudze Amasa+ ni ri: ‘Naa a u malofha anga na ṋama yanga? Ngavhe Mudzimu a tshi nnyita zwikene na zwikene a dovhe a engedze arali wa sa vha mulangammbi wanga u bva zwino vhuimoni ha Yoaba.’”+
14 Zwe Davida a zwi amba zwo ṱuṱuwedza vhanna vhoṱhe vha Yuda uri vha vhe vhathihi, vha rumela mulaedza ha khosi vha ri: “Vhuya iwe na vhashumeli vhau vhoṱhe.”
15 Khosi ya vhuya ya tshimbila, ya swika Mulamboni wa Yorodane, vhathu vha Yuda vha ḓa Giligala+ uri vha ṱanganedze khosi vha i wedze Mulambo wa Yorodane.
16 Shimei+ murwa wa Gera wa Mubenyamini a bvaho Bakurimi, a tsela henengei nga u ṱavhanya e na vhanna vha Yuda u itela u ṱanganedza Khosi Davida,
17 o vha e na vhanna vha Vhabenyamini vha 1 000. Na Tsiba+ muḓinḓa wa nnḓu ya Saulo na vharwa vhawe vha 15 na vhashumeli vhawe vha 20 vha wela Mulambo wa Yorodane khosi i sa athu u swika.
18 A* pfuka nga murathoni u itela u wedza vha muṱa wa khosi na u ita zwiṅwe na zwiṅwe zwine khosi ya funa. Musi khosi i tshi khou ṱoḓa u wela Mulambo wa Yorodane, Shimei murwa wa Gera a gwadama phanḓa hayo.
19 A amba na khosi a ri: “Thovhela a songo mmbona mulandu, u songo tsha humbula vhukhakhi he mushumeli wau a vhu ita+ ḓuvha ḽe thovhela muṋe wanga a ṱuwa Yerusalema. Ngavhe khosi i sa zwi dzhieli nṱha,
20 ngauri mushumeli wau u a ḓivha zwavhuḓi uri o khakha; ṋamusi ndo vha wa u thoma kha vhoṱhe vha nnḓu ya Yosefa u ḓa u ṱanganedza thovhela muṋe wanga.”
21 Nga zwenezwo, Abishai+ murwa wa Tseruya+ a ri: “Naa Shimei ho ngo tea u vhulawa nge a sema muḓodzwa wa Yehova?”+
22 Fhedzi Davida a ri: “Zwi ni kwama ngani inwi vharwa vha Tseruya,+ ngauri ṋamusi ni khou lwa na nṋe? Naa ṋamusi hu fanela u vhulawa muthu kha ḽa Isiraele? Naa a thi zwi ḓivhi uri ṋamusi ndi khosi ya Isiraele?”
23 Khosi ya amba na Shimei ya ri: “Iwe a u nga fi.” Khosi ya mu anela.+
24 Mefibosete+ muḓuhulu wa Saulo, na ene o vha o ya u ṱanganedza khosi. O vha a si tsha ṱamba milenzhe kana u fhungudza ndebvu dzawe kana u kuvha zwiambaro zwawe u bva nga ḓuvha ḽe khosi ya ṱuwa u swika ḓuvha ḽe ya vhuya nga mulalo.
25 Musi a tshi swika Yerusalema u itela u ṱanganedza khosi, khosi ya amba nae ya ri: “Mefibosete, ndi ngani u songo ṱuwa na nṋe?”
26 Mefibosete a ri: “Thovhela muṋe wanga, mushumeli wanga+ o mphura. Ngauri nṋe mushumeli wau ndo vha ndo ri: ‘Vhofhelela sale kha donngi yanga uri ndi ṱuwe na khosi,’ ngauri nṋe mushumeli wau ndi muholefhali.+
27 Fhedzi o ntshinya dzina kha thovhela muṋe wanga.+ Naho zwo ralo, thovhela muṋe wanga u tou nga muruṅwa wa Mudzimu wa ngoho, ita zwine wa vhona zwo tea.
28 Ngauri vha nnḓu yoṱhe ya khotsi anga vho vha vha tshi nga kha ḓi vha vho vhulawa nga thovhela muṋe wanga, fhedzi wa dzudza mushumeli wau na vhane vha ḽa ṱafulani yau.+ Ngauralo, ndi na ndugelo ifhio ya u dovha nda lilela u ṋewa zwiṅwe nga khosi?”
29 Naho zwo ralo, khosi ya amba nae ya ri: “Ndi ngani u tshi khou amba nga u ralo? Ndo phetha uri iwe na Tsiba ni kovhekane tsimu.”+
30 Mefibosete a amba na khosi a ri: “Mu litshe a dzhie yoṱhe, ngauri thovhela muṋe wanga o vhuya musanda nga mulalo.”
31 Barasilai+ wa Mugiḽiada a ḓa Mulamboni wa Yorodane a tshi bva Rogelima u itela u fhelekedza khosi Yorodane.
32 Barasilai o vha o no kalaha vhukuma, e na miṅwaha ya 80, o isela khosi zwiḽiwa musi i tshi kha ḓi dzula Mahanaimi,+ ngauri o vha o pfuma nga maanḓa.
33 Khosi ya amba na Barasilai ya ri: “U fanela u wela na nṋe, u ḓo ḽa na nṋe zwiḽiwa ngei Yerusalema.”+
34 Fhedzi Barasilai a amba na khosi a ri: “Ndi kha ḓi ḓo tshila miṅwaha mingana, lune nda nga vhuya nda ṱuwa na khosi Yerusalema?
35 Zwino ndi na miṅwaha ya 80.+ Naa ndi nga kona u ṱalukanya zwivhuya na zwivhi? Naa nṋe mushumeli wau ndi nga pfa muḓifho wa zwine nda zwi ḽa na zwine nda zwi nwa? Naa ndi nga kona u pfa zwine vhanna na vhafumakadzi vha zwi imba?+ Ndi ngani nṋe mushumeli wau ndi tshi fanela u engedza muhwalo kha iwe thovhela muṋe wanga?
36 Zwo luga musi mushumeli wau o wedza thovhela Mulambo wa Yorodane. Ndi ngani khosi i tshi fanela u nndifhela nga enea malamba?
37 Ndi khou humbela uri u litshe mushumeli wau a hume, nnditshe ndi ye u fela muḓini wa hashu tsini na vhiḓa ḽa khotsi anga na mme anga.+ Dzhia mushumeli wau Kinehamu.+ Mu tendele a tshi wela na iwe thovhela muṋe wanga, u nga mu ita zwine wa vhona zwo tea.”
38 Khosi ya ri: “Kinehamu u ḓo wela mulambo na nṋe, ndi ḓo mu itela zwine nda vhona zwo u lugela; zwiṅwe na zwiṅwe zwine wa nkhumbela ndi ḓo u itela zwone.”
39 Vhathu vhoṱhe vha thoma u wela Mulambo wa Yorodane, musi khosi i tshi wela, ya khisa Barasilai,+ ya mu fhaṱutshedza; nga murahu ha zwenezwo Barasilai a humela hayani.
40 Musi khosi i tshi wela Giligala,+ Kinehamu a wela nayo. Vhathu vhoṱhe vha Yuda na vhaṅwe vhathu vha Isiraele vha wela mulambo na khosi.+
41 Vhanna vhoṱhe vha Isiraele vha ḓa kha khosi vha ri: “Ndi ngani vhahashu vha Yuda vho u dzhia tshiphirini vha u wedza Mulambo wa Yorodane na vha nnḓu yau na vhanna vhoṱhe vhe wa vha u navho?”+
42 Vhanna vhoṱhe vha Yuda vha fhindula vhanna vha Isiraele vha ri: “Ngauri riṋe ri mashaka a khosi.+ Ndi ngani zwi tshi ni sinyusa? Naa ro vhuya ra ḽa zwiḽiwa zwa khosi, kana yo vhuya ya ri ṋea tshifhiwa?”
43 Naho zwo ralo, vhanna vha Isiraele vha fhindula vhanna vha Yuda vha ri: “Ri na mikovhe ya fumi kha khosi, ri na ndugelo khulwane kha Davida u ni fhira. Ndi ngani no ri nyadza? Naa ro vha ri songo fanela u vha vha u thoma u vhuisa khosi?” Fhedzi vhanna vha Yuda vha kunda vhanna vha Isiraele nga zwe vha zwi amba.
Ṱhaluso dzi re magumoni a siaṱari
^ Sedzani Mutevhe Wa Ṱhalutshedzo Ya Maipfi.
^ Kana khamusi, “Vha.”
