Bugu Ya Vhuvhili Ya Samuele 2:1-32
2 Nga murahu Davida a vhudzisa Yehova,+ a ri: “Naa ndi nga gonya kha muṅwe wa miḓi ya Yuda?” Yehova a amba nae a ri: “Gonya.” Davida a dovha a vhudzisa a ri: “Ndi gonye ndi ye ngafhi?” A fhindula a ri: “Iya Heburoni.”+
2 Ngauralo, Davida a gonya henengei e na vhafumakadzi vhawe vhavhili, Ahinoamu+ wa Yeseriele na Abigaili+ we a vha e mufumakadzi wa Nabali wa Karamele.
3 Davida a gonya na vhanna vhe a vha e navho,+ muṅwe na muṅwe e na muṱa wawe, vha dzula miḓini ya tsini na Heburoni.
4 Nga murahu vhanna vha Yuda vha ḓa vha ḓodza Davida uri a vhe khosi nḓuni ya Yuda.+
Vha vhudza Davida vha ri: “Vhanna vha Yabese-giḽiada ndi vhone vho vhulungaho Saulo.”
5 Davida a ruma vhaḓinḓa uri vha ye kha vhanna vha Yabese-giḽiada uri vha ambe navho vha ri: “Ngavhe ni tshi fhaṱutshedzwa nga Yehova, ngauri no sumbedza muṋe waṋu Saulo lufuno lu sa shanduki nga u mu vhulunga.+
6 Zwino ngavhe Yehova a tshi ni sumbedza lufuno lu sa shanduki na uri u a fhulufhedzea. Na nṋe ndi ḓo ni sumbedza vhuthu ngauri no ita zwenezwo.+
7 Zwino ḓikhwaṱhiseni ni vhe na tshivhindi, ngauri muṋe waṋu Saulo o fa, na uri vha nnḓu ya Yuda ndi vhone vhe vha vhea nṋe uri ndi vhe khosi yavho.”
8 Fhedzi Abinere+ murwa wa Nere, mulangammbi wa Saulo, o vha o dzhia Isibosete+ murwa wa Saulo a mu isa Mahanaimi+
9 a mu vhea uri a vhe khosi kha ḽa Giḽiada,+ kha Vhaashure, kha ḽa Yeseriele,+ kha ḽa Efuraimi,+ kha ḽa Benyamini na kha ḽoṱhe ḽa Isiraele.
10 Isibosete murwa wa Saulo o vha e na miṅwaha ya 40 musi a tshi vha khosi kha ḽa Isiraele, o vhusa miṅwaha mivhili. Naho zwo ralo, vha nnḓu ya Yuda vho vha vha tshi tikedza Davida.+
11 Davida o fhedza miṅwaha ya sumbe na miṅwedzi ya rathi+ e khosi ngei Heburoni nḓuni ya Yuda.
12 Nga murahu ha tshifhinga Abinere murwa wa Nere na vhashumeli vha Isibosete murwa wa Saulo, vha ṱuwa Mahanaimi+ vha ya Gibeoni.+
13 Yoaba+ murwa wa Tseruya+ na vhashumeli vha Davida na vhone vha bva, vha ṱangana navho damuni ḽa Gibeoni; tshiṅwe tshigwada tsha dzula seli ha ḽiḽa, tshiṅwe tsha dzula seli na ḽino ḽa damu.
14 Mafheleloni Abinere a amba na Yoaba a ri: “Ndi khou humbela uri u tendele vhaṱhannga uri vha takuwe vha lwe phanḓa hashu.” Yoaba a ri: “Kha vha takuwe.”
15 Vha takuwa vha tshi ya nga tshivhalo tshavho, vha 12 vho vha vhe Vhabenyamini na Isibosete murwa wa Saulo na vhashumeli vha Davida vha 12.
16 Vha farana nga dziṱhoho, muṅwe na muṅwe a ṱhavha swina ḽawe kha lurumbu nga banga, vha vhulayana vhoṱhe. Ngauralo, henefho hune ha vha Gibeoni, ha vhidzwa Helekati-hatsurimi.
17 Ha vha na nndwa khulu vhukuma nga ḽeneḽo ḓuvha, Abinere na vhanna vha Isiraele vha kundwa nga vhashumeli vha Davida.
18 Vharwa vhararu vha Tseruya+ vhane vha vha Yoaba,+ Abishai+ na Asahele+ vho vha vhe henefho; Asahele o vha a tshi gidima sa phala.
19 Asahele a pandamedza Abinere, o vha a sa pambutsheli thungo ya tsha u ḽa kana ya tsha monde musi a tshi khou pandamedza Abinere.
20 Musi Abinere a tshi rembuluwa a vhudzisa a ri: “Naa ndi iwe, Asahele?” A fhindula a ri: “Ndi nṋe.”
21 Abinere a amba nae a ri: “Pambutshela kha tsha u ḽa kana kha tsha monde tshau, u fare muṅwe wa vhaṱhannga, u mu dzhiele zwine a vha nazwo.” Fhedzi Asahele a si litshe u mu pandamedza.
22 Abinere a dovha a amba na Asahele a ri: “Litsha u mpandamedza ngauri ndi ḓo u vhulaya. Ndi ḓo dovha nda livhana hani tshifhaṱuwo na mukomana wau Yoaba?”
23 Fhedzi a si litshe, Abinere a mu ṱhavha kha thumbu nga murahu ha pfumo,+ pfumo ḽa bva nga muṱanani; a wa a fela henefho. Muṅwe na muṅwe we a swika henefho fhethu he Asahele a fela hone o vha a tshi ima henefho.
24 Yoaba na Abishai vha pandamedza Abinere. Musi ḓuvha ḽi tshi vho kovhela vha swika tshikwarani tsha Ama, tsho livhanaho na Gia nḓilani i yaho sogani ḽa Gibeoni.
25 Henefho Vhabenyamini vha kuvhanganela Abinere, vha vha tshigwada tshithihi vha ima nṱha ha tshikwara.
26 Nga zwenezwo, Abinere a vhidzelela Yoaba a ri: “Ri ḓo lwa u swika lini? Naa a u zwi ḓivhi uri hu ḓo vha na mvelelo dzi ṱungufhadzaho? U ḓo vhudza lini vhathu vhau uri vha litshe u pandamedza vhahavho?”
27 Yoaba a fhindula a ri: “Ndi ana nga Mudzimu wa ngoho a tshilaho, arali u vhe u songo amba, vhathu vho vha vha tshi ḓo litsha u pandamedza vhahavho nga matsheloni.”
28 Yoaba a lidza luṋanga lwawe, vhanna vhe a vha e navho vha litsha u pandamedza Vhaisiraele, nndwa ya fhela.
29 Abinere na vhanna vhe a vha e navho vha tshimbila kha ḽa Araba+ vhusiku hoṱhe, vha wela Mulambo wa Yorodane vha wela muedzi woṱhe, vha swika Mahanaimi.+
30 Musi Yoaba o no litsha u pandamedza Abinere, a kuvhanganya vhathu vhoṱhe. Kha vhashumeli vha Davida ho vha hu tshi khou ṱahela vha 19 na Asahele.
31 Fhedzi vhashumeli vha Davida vho vha vho kunda Vhabenyamini na vhanna vha re na Abinere, khavho ho fa vhanna vha 360.
32 Vha dzhia Asahele+ vha mu vhulunga vhiḓani ḽa khotsi awe, ḽine ḽa vha ngei Betlehema.+ Nga zwenezwo, Yoaba na vhanna vhe a vha e navho vha tshimbila vhusiku hoṱhe, vha swika Heburoni+ musi ḽi tshi tsha.
