Bugu Ya Vhuvhili Ya Samuele 20:1-26
20 Ho vha hu na muṅwe munna a sa ḓivhalei ane a pfi Sheba,+ murwa wa Bikhiri wa Mubenyamini. A lidza luṋanga+ a ri: “Riṋe a ri na ndavha na Davida, a ri na ndavha na ifa ḽa murwa wa Isai.+ Iwe Isiraele, muṅwe na muṅwe nga a tevhele mudzimu wawe!”+
2 Nga zwenezwo, vhanna vhoṱhe vha Isiraele vha litsha u tevhela Davida vha tevhela Sheba murwa wa Bikhiri;+ fhedzi Vhayuda vha sala na khosi yavho, vha bva Mulamboni wa Yorodane vha swika Yerusalema.+
3 Musi Davida a tshi swika nḓuni* yawe ngei Yerusalema,+ a dzhia vhafumakadzi vha vhuimo ha fhasi* vha fumi vhe a vha o vha sia vha tshi khou ṱhogomela nnḓu,+ a vha dzudza nḓuni ine ya lindwa. O vha a tshi vha ṋea zwiḽiwa, fhedzi ho ngo ita zwa vhudzekani navho.+ Vho dzula henefho nḓuni vho lindwa u swika vha tshi fa, vho vha vha tshi nga tshilikadzi, naho munna wavho a tshi kha ḓi tshila.
4 Khosi ya amba na Amasa+ ya ri: “Vhidza vhanna vha Yuda uri vha ḓe hu sa athu u fhela maḓuvha mararu, na iwe u vhe u hone.”
5 Ngauralo, Amasa a ya a vhidza Vhayuda, fhedzi a lenga a si swike nga tshifhinga tsho vhewaho.
6 Davida a amba na Abishai+ a ri: “Sheba+ murwa wa Bikhiri a nga ri pfisa vhuṱungu u fhira Abesalomo.+ Dzhia vhashumeli vha muṋe wau u mu pandamedze uri a si wane muḓi wo tsireledzwaho nga luvhondo, a ri ponyoka.”
7 Vhanna vha re na Yoaba,+ Vhakireti, Vhapelethi+ na vhahali vhoṱhe vha mu tevhela; vha ṱuwa Yerusalema vha pandamedza Sheba murwa wa Bikhiri.
8 Musi vhe tsini na tombo ḽihulu ḽa Gibeoni,+ Amasa+ a ḓa a vha ṱanganedza. Yoaba o vha o ambara zwiambaro zwawe zwa nndwa, o kungela banga ḽawe khunduni. Musi a tshi khou tshimbila banga ḽawe ḽa wa.
9 Yoaba a amba na Amasa a ri: “Wahashu, naa u tshee wo takala?” Yoaba a fara ndebvu dza Amasa nga tshanḓa tshawe tsha u ḽa a nga u khou ṱoḓa u mu khisa.
10 Amasa ho ngo vhona banga ḽe Yoaba a vha o ḽi fara, Yoaba a mu ṱhavha kha thumbu,+ mala awe a wela fhasi. Samusi o vha a tshi khou fa ho ngo tsha dovha a mu ṱhavha. Yoaba na murathu wawe Abishai vha pandamedza Sheba murwa wa Bikhiri.
11 Muṅwe wa vhaṱhannga vha Yoaba a ima henefho a ri: “Ane a ima na Yoaba na ane a ima na Davida, nga a tevhele Yoaba!”
12 Nga tshenetsho tshifhinga, Amasa o vha a tshi khou vhumbuluwa kha malofha awe vhukati ha nḓila. Musi onoyo muṱhannga a tshi vhona uri vhathu vhoṱhe vho vha vha tshi khou ima henefho, a bvisa Amasa henefho nḓilani a mu kokodzela ḓakani. A mu fukedza nga tshiambaro, nge a vhona uri muṅwe na muṅwe o vha a tshi ima musi a tshi swika tsini nae.
13 Musi o no mu kokodzela nnḓa ha nḓila, vhanna vhoṱhe vha tevhela Yoaba uri vha pandamedze Sheba+ murwa wa Bikhiri.
14 Sheba a buḓekanya na tshaka dzoṱhe dza Isiraele a swika muḓini wa Abele Bethe-maaka.+ Na Vhabikhiri vha kuvhangana, vha mu tevhela.
15 Yoaba na vhanna a re navho vha ḓa vha tanga muḓi wa Abele Bethe-maaka vha ita thulwi dza mavu u mona na muḓi, samusi wo vha wo tsireledzwa nga mutsheṱo. Vhanna vhoṱhe vha re na Yoaba vho vha vha tshi khou bwa uri vha wise wonoyo mutsheṱo.
16 Muṅwe mufumakadzi o ṱalifhaho a vhidzelela e muḓini a ri: “Inwi vhanna, thetshelesani! Ndi khou humbela uri ni vhudze Yoaba uri: ‘Iḓa ngeno ndi ambe na iwe.’”
17 Ngauralo, Yoaba a ya khae, onoyo mufumakadzi a ri: “Naa ndi iwe Yoaba?” A fhindula a ri: “Ndi nṋe.” Onoyo mufumakadzi a ri: “Thetshelesa zwine mulanda wau a amba.” Yoaba a ri: “Ndo thetshelesa.”
18 A dovha a ri: “Tshifhingani tsha kale vho vha vha tshi dzulela u ri: ‘Kha vha ye vha vhudzise ngei muḓini wa Abele,’ thaidzo dzavho dzo vha dzi tshi tandululwa.
19 Nṋe ndi imela vha re na mulalo na vha fhulufhedzeaho kha ḽa Isiraele. Iwe u khou ṱoḓa u fhelisa muḓi une wa nga mme kha ḽa Isiraele. Ndi ngani u tshi ṱoḓa u fhelisa ifa ḽa Yehova?”+
20 Yoaba a fhindula a ri: “Ndi nga si vhuye nda fhelisa wonoyo muḓi.
21 A zwo ngo tou ralo. Fhedzi munna ane a bva dzinguni ḽa thavhani dza Efuraimi+ ane a pfi Sheba+ murwa wa Bikhiri, o shandukela Khosi Davida. Arali na ri kumedzela ene, ndi ḓo ṱuwa muḓini.” Onoyo mufumakadzi a amba na Yoaba a ri: “Ri ḓo u posa ṱhoho yawe nga mutsheṱoni!”
22 Nga zwenezwo, mufumakadzi o ṱalifhaho a ya kha vhathu vhoṱhe, vha tumula ṱhoho ya Sheba murwa wa Bikhiri vha i posa kha Yoaba. A lidza luṋanga, vha bva muḓini, muṅwe na muṅwe a ya hayani hawe;+ Yoaba a vhuyelela Yerusalema ha khosi.
23 Yoaba o vha e mulangammbi wa Isiraele;+ Benaya+ murwa wa Yehoyada+ o vha a tshi langa Vhakireti na Vhapelethi.+
24 Adoramu+ o vha a tshi langa vhane vha ita mushumo wa khombe-khombe; Yehoshafati+ murwa wa Alihudu o vha e muvhulungi wa maṅwalo.
25 Sheva o vha e muṅwaleli; Tsadoko+ na Abiathara+ vho vha vhe vhotshifhe.
26 Ira wa Muyairi na ene a vha muḓinḓa muhulwane* wa Davida.
Ṱhaluso dzi re magumoni a siaṱari
^ Kana “pfamoni.”
^ Sedzani Mutevhe Wa Ṱhalutshedzo Ya Maipfi.
^ Thevhedz., “a vha tshifhe.”
