Bugu Ya Vhuvhili Ya Samuele 21:1-22
21 Ho vhuya ha vha na nḓala+ misini ya Davida ya fhedza miṅwaha miraru, Davida a vhudzisa Yehova, Yehova a ri: “Saulo na vha nnḓu yawe vha na mulandu wa malofha, ngauri vho vhulaya Vhagibeoni.”+
2 Ngauralo, khosi ya vhidza Vhagibeoni+ ya amba navho. (Vhagibeoni vho vha vha si Vhaisiraele, fhedzi vho vha vhe masalela a Vhaamori,+ Vhaisiraele vho vha vho ana uri a vha nga vha vhulayi,+ fhedzi Saulo a ṱoḓa u vha vhulaya a tshi tshivhela vhathu vha Isiraele na vha Yuda.)
3 Davida a amba na Vhagibeoni a ri: “Ndi ni itele mini, ri nga pfumedzana hani, uri ni kone u fhaṱutshedza zwine zwa vha zwa Yehova?”
4 Vhagibeoni vha amba nae vha ri: “Zwine ra zwi ṱoḓa kha Saulo na nnḓu yawe a si siḽiva kana musuku;+ ri nga si vhulaye muthu kha ḽa Isiraele.” A tshi pfa zwenezwo a ri: “Zwiṅwe na zwiṅwe zwine na zwi amba ndi ḓo ni itela zwone.”
5 Vha amba na khosi vha ri: “Munna we a ri vhulaya, a ri vhambela maano a uri fhelisa uri ri si tshile shangoni ḽa Isiraele,+
6 nga ri ṋewe vharwa vhawe vha sumbe. Ri ḓo fhahea mitumbu yavho+ phanḓa ha Yehova ngei Gibia+ ha Saulo we a vha o nangwa nga Yehova.”+ Khosi ya ri: “Ndi ḓo vha kumedzela zwanḓani zwaṋu.”
7 Naho zwo ralo, khosi ya pfela vhuṱungu Mefibosete+ murwa wa Yonathani murwa wa Saulo, nga nṱhani ha muano we Davida na Yonathani murwa wa Saulo vha u vhofha dzinani ḽa Yehova.+
8 Nga zwenezwo, khosi ya dzhia Arimoni na Mefibosete, vharwa vhavhili vha Ritsipa+ ṅwananyana wa Aya we a vha bebela Saulo na vharwa vhaṱanu vhe Mihali*+ ṅwananyana wa Saulo a vha bebela Adiriele+ murwa wa Barasilai wa Mumehola.
9 A vha kumedzela zwanḓani zwa Vhagibeoni, vha vha fhahea thavhani phanḓa ha Yehova.+ Vhenevho vhoṱhe vha sumbe vha fa; vho vhulawa nga maḓuvha a u thoma a khaṋo, musi hu tshi thoma u kaṋwa baḽi.
10 Ritsipa+ ṅwananyana wa Aya a dzhia dzanganda a ḽi adza nṱha ha tombo u bva khaṋo i tshi thoma u swika mvula ya ṱaḓulu i tshi nela zwenezwo zwitumbu; ho ngo tendela zwiṋoni zwi tshi kavha khazwo nga masiari kana u tendela zwivhanda zwi tshi sendela tsini nga madekwana.
11 Davida a vhudzwa zwe zwa itwa nga Ritsipa ṅwananyana wa Aya, mufumakadzi wa vhuimo ha fhasi* wa Saulo.
12 Davida a ya a dzhia marambo a Saulo na a Yonathani murwa wawe kha vharangaphanḓa* vha Yabese-giḽiada,+ e vha a tswa khoroni ya Bethesani, he Vhafilisita vha a fhahea hone nga ḓuvha ḽe vha vhulaya ngaḽo Saulo ngei Giliboa.+
13 Davida a dzhia marambo a Saulo na marambo a Yonathani murwa wawe, vha dovha vha kuvhanganya marambo a vhanna vhe vha vhulawa.+
14 Vha vhulunga marambo a Saulo na a Yonathani murwa wawe shangoni ḽa Benyamini ngei Tsela+ vhiḓani ḽa khotsi awe Kishi.+ Musi vho no ita zwoṱhe zwe khosi ya vha laya, Mudzimu a pfa thabelo dzavho dza u rabelela shango.+
15 Ha dovha ha vha na nndwa vhukati ha Vhafilisita na Vhaisiraele.+ Davida na vhashumeli vhawe vha ya vha lwa na Vhafilisita, fhedzi Davida a neta.
16 Yisibi-benobo muḓuhulu wa Vharefaimi+ we pfumo ḽawe ḽa koporo ḽa vha ḽi tshi lemela shekele dza 300*+ we a vha o fara banga ḽiswa, a humbula u vhulaya Davida.
17 Nga khathihi fhedzi Abishai+ murwa wa Tseruya a ḓa a mu thusa,+ a ṱhavha Mufilisita a mu vhulaya. Nga tshenetsho tshifhinga, vhanna vha re na Davida vha ana vha ri: “A wo ngo tsha fanela u dovha wa ṱuwa na riṋe nndwani!+ U songo dzima luvhone lwa Isiraele!”+
18 Ha dovha ha vuwa iṅwe nndwa na Vhafilisita+ ngei Gobo. Nga tshenetsho tshifhinga, Sibekai+ wa Muhusha a vhulaya Safa, we a vha e muḓuhulu wa Vharefaimi.+
19 Ha dovha ha vuwa nndwa na Vhafilisita+ ngei Gobo, Elihanani murwa wa Yaari-origimi wa Mubetlehema a vhulaya Goliata wa Mugathi, we thanda ya pfumo ḽawe ya vha i ndenya i tshi nga thanda ya vhaluki.+
20 Ha dovha ha vuwa nndwa ngei Gathi, henefho ho vha hu na munna mulapfu-lapfu, e na minwe ya 6 kha zwanḓa zwoṱhe na zwikunwane zwa 6 kha milenzhe yoṱhe, zwoṱhe zwo ṱangana zwo vha zwi 24; na ene o vha e muḓuhulu wa Vharefaimi.+
21 Onoyo munna a goḓa Vhaisiraele.+ Mafheleloni Yonathani murwa wa Shimei+ mukomana wa Davida, a mu vhulaya.
22 Vhenevha vhanna vhaṋa vho vha vhe vhaḓuhulu vha Vharefaimi vha ngei Gathi, vho vhulawa nga Davida na vhashumeli vhawe.+
Ṱhaluso dzi re magumoni a siaṱari
^ Kana khamusi, “Meraba.”
^ Sedzani Mutevhe Wa Ṱhalutshedzo Ya Maipfi.
^ Kana khamusi, “vhaṋe vha mashango.”
^ Khilogramu dzi ṱoḓaho u vha 3,42. Sedzani Ṱhume. B14.
