Bugu Ya Vhuvhili Ya Samuele 3:1-39
3 Nndwa vhukati ha vha nnḓu ya Saulo na vha nnḓu ya Davida ya fhedza tshifhinga tshilapfu; Davida a bvela phanḓa a tshi vha na maanḓa,+ vha nnḓu ya Saulo vha tshi khou fhelelwa nga maanḓa.+
2 Nga tshenetsho tshifhinga, Davida a bebelwa vharwa e ngei Heburoni.+ Murwa wawe wa tanzhe o vha a tshi pfi Aminoni+ we a bebelwa ene nga Ahinoamu+ wa Yeseriele.
3 Wa vhuvhili o vha a tshi pfi Kiliaba we a bebelwa ene nga Abigaili,+ we a vha e mufumakadzi wa Nabali wa Mukaramele; wa vhuraru a tshi pfi Abesalomo+ murwa wa Maaka ṅwananyana wa Thalamai+ khosi ya Geshuri.
4 Wa vhuṋa o vha e Adonia+ murwa wa Hagithi, wa vhuṱanu o vha e Shefatia murwa wa Abitala.
5 Wa vhurathi o vha e Yithireamu we a bebelwa ene nga Egila mufumakadzi wa Davida. Vhenevho ndi vhana vha Davida vhe vha bebwa ngei Heburoni.
6 Musi nndwa vhukati ha vha nnḓu ya Saulo na vha nnḓu ya Davida i tshi khou bvela phanḓa, Abinere+ a bvela phanḓa a tshi vha na maanḓa nḓuni ya Saulo.
7 Saulo o vha e na mufumakadzi wa vhuimo ha fhasi* we a vha a tshi pfi Ritsipa,+ ṅwana wa Aya. Nga murahu Isibosete+ a amba na Abinere a ri: “Ndi ngani wo ita zwa vhudzekani na mufumakadzi wa phuli wa khotsi anga?”+
8 Abinere a sinyuwa nga maanḓa musi a tshi pfa zwe Isibosete a zwi amba, a ri: “Naa ndi tou vha mmbwa ya Yuda? Ndo sumbedza lufuno lu sa shanduki vha nnḓu ya Saulo khotsi au, na kha vharathu vhawe na vhakomana vhawe na khonani dzawe u swika ṋamusi, a tho ngo u fheṱa nda u kumedzela zwanḓani zwa Davida; zwino iwe ṋamusi u vho ntsengisela zwe nda khakha na uyu mufumakadzi.
9 Ngavhe Mudzimu a tshi ita Abinere zwine a funa, a dovhe a engedze kha zwenezwo, arali nda sa itela Davida zwe Yehova a mu anela zwone:+
10 uri ndi dzhiele vha nnḓu ya Saulo muvhuso, ndi khwaṱhise khuluṋoni ya Davida uri a vhuse Isiraele na Yuda, u bva Dani u swika Beresaba.”+
11 Isibosete ho ngo tsha amba tshithu na tshithihi u itela u fhindula Abinere, ngauri o vha a tshi khou mu ofha.+
12 Abinere a rumela vhaḓinḓa ha Davida, a ri: “Shango ndi ḽa nnyi?” A dovha a ri: “Vhofha mulanga na nṋe, ndi ḓo ita zwine nda nga kona uri Vhaisiraele vha ime na iwe.”+
13 Davida a ri: “Zwo luga! Ndi ḓo vhofha mulanga na iwe. Tshithu tshithihi fhedzi tshine nda tshi humbela kha iwe ndi tsha uri u songo lingedza u ḓa phanḓa hanga arali wa sa thoma wa ḓisa Mihali,+ ṅwana wa Saulo, musi u tshi ḓa u mmbona.”
14 Davida a rumela vhaḓinḓa kha Isibosete,+ murwa wa Saulo, a ri: “Vhuisa Mihali mufumakadzi wanga, we nda fhulufhedzisa u mu vhinga ngauri ndo ḓisa vhuṱanzi* ha uri ndo vhulaya Vhafilisita vha 100.”+
15 Isibosete a ruma vhaḓinḓa uri vha ye u mu dzhia ha munna wawe Palatiele+ murwa wa Laisi.
16 Fhedzi munna wawe a mu tevhela a tshi khou lila u vhuya u swika Bakurimi.+ Abinere a amba nae a ri: “Huma!” Palatiele a huma.
17 Abinere a amba na vhahulwane vha Isiraele, a ri: “Ndi kale ni tshi ṱoḓa uri Davida a vhe khosi yaṋu.
18 Zwino dzhiani vhukando, ngauri Yehova o amba na Davida a ri: ‘Ndi ḓo tshidza vhathu vhanga vha Isiraele zwanḓani zwa Vhafilisita na zwanḓani zwa maswina avho oṱhe nga tshanḓa tsha Davida mushumeli wanga.’”+
19 Abinere a dovha a amba na vhathu vha Benyamini.+ Nga murahu Abinere a ya a amba na Davida tshiphirini ngei Heburoni a mu vhudza zwe Vhaisiraele na vhoṱhe vha nnḓu ya Benyamini vha tendelana khazwo.
20 Musi Abinere na vhanna vha 20 vha tshi swika ha Davida ngei Heburoni, Davida a itela Abinere na vhanna vhe a vha e navho tshimima.
21 Abinere a amba na Davida a ri: “Nnditshe ndi ṱuwe ndi ye u kuvhanganya Vhaisiraele vhoṱhe ndi tshi itela iwe Thovhela muṋe wanga uri vha vhofhe mulanga na iwe, iwe u ḓo vhusa vhoṱhe vhane wa funa.” Davida a litsha Abinere a ṱuwa, a ṱuwa nga mulalo.
22 Vhashumeli vha Davida na Yoaba vha vhuya vha tshi bva nndwani, vho fara thundu nnzhi ye vha i thuba. Abinere o vha a si tsha vha na Davida ngei Heburoni ngauri Davida o vha o mu litsha a ṱuwa nga mulalo.
23 Musi Yoaba+ a tshi vhuya na mmbi yoṱhe ye a vha e nayo, Yoaba a vhudzwa uri: “Abinere+ murwa wa Nere+ o vha o ḓa ha khosi, khosi ya mu litsha a ṱuwa, ene a ṱuwa nga mulalo.”
24 Yoaba a ya ha khosi a ri: “Wo ita mini? Abinere o vha o ḓa ha iwe. Ndi ngani wo mu litsha a sokou ṱuwa zwawe?
25 U a ḓivha zwavhuḓi uri Abinere murwa wa Nere o vha o ḓa fhano uri a u fhure na uri a ḓivhe huṅwe na huṅwe hune wa ya hone na uri a ḓivhe tshiṅwe na tshiṅwe tshine wa tshi ita.”
26 Yoaba a ṱuwa phanḓa ha Davida, a ruma vhaḓinḓa uri vha tevhele Abinere, vha vhuya nae vha tshi bva tshisimani tsha Sira; fhedzi Davida o vha a sa ḓivhi tshithu nga hazwo.
27 Musi Abinere a tshi humela Heburoni,+ Yoaba a mu isa thungo khoroni uri a ambe nae tshiphirini. Naho zwo ralo, a mu ṱhavha kha thumbu musi vhe henefho, a fa;+ o vha a tshi khou mu lifhedza nge a vhulaya Asahele+ murathu wawe.
28 Musi Davida a tshi zwi pfa nga murahu, a ri: “Yehova u a ḓivha uri nṋe na muvhuso wanga a ri na mulandu wa malofha+ a Abinere murwa wa Nere lini na lini.
29 Ngavhe mulandu u tshi vhuyelela nṱha ha ṱhoho ya Yoaba+ na kha vhoṱhe vha nnḓu ya khotsi awe. Ngavhe nḓuni ya Yoaba hu tshi dzula hu na munna a re na vhulwadze ha u rothisa luḓi nga tshiraḓo tshawe tsha mbeu+ kana wa mapele+ kana munna ane a shumisa tshishumiswa tsha u luka kana ane a vhulawa nga banga kana ane a shaya zwiḽiwa!”+
30 Yoaba na Abishai+ mukomana wawe vho vhulaya Abinere+ nge a vhulaya Asahele murathu wavho nndwani+ ngei Gibeoni.
31 Davida a amba na Yoaba na vhathu vhoṱhe vha re nae a ri: “Kherukanyani zwiambaro zwaṋu ni ambare madzanganda, ni lilele Abinere.” Khosi Davida o vha a tshi khou tshimbila nga murahu ha bogisi ḽa mufu.
32 Vha vhulunga Abinere ngei Heburoni; khosi ya vusa tshililo tshihulu ngei vhiḓani ḽa Abinere, vhathu vhoṱhe vha lila.
33 Khosi ya imbela Abinere ya ri:
“Naa Abinere o vha o fanela u fa sa tsilu?
34 Zwanḓa zwau zwo vha zwi songo vhofhiwa,Milenzhe yau yo vha i songo vhofhiwa nga ngeḓane.*
Wo fa sa muthu a tshi vhulawa nga mavemu.”*+
Vhathu vhoṱhe vha dovha vha mu lilela.
35 Nga murahu vhathu vhoṱhe vha ḓa vha ṋea Davida vhurotho ha u mu khuthadza hu tshi kha ḓi vha masiari, fhedzi Davida a ana a ri: “Ngavhe Mudzimu a tshi nnyita zwine a funa, a dovhe a engedze kha zwenezwo arali nda ḽa vhurotho kana tshiṅwe tshithu ḽi sa athu u kovhela!”+
36 Vhathu vhoṱhe vha zwi ṱhogomela, zwa vha takadza. Zwoṱhe zwe khosi ya vha i tshi zwi ita zwo vha zwi tshi takadza vhathu vhoṱhe.
37 Ngauralo, vhathu vhoṱhe na Vhaisiraele vhoṱhe vha zwi ḓivha nga ḽeneḽo ḓuvha uri khosi a yo ngo dzhenisa tshanḓa kha u vhulawa ha Abinere murwa wa Nere.+
38 Khosi ya amba na vhashumeli vhayo ya ri: “Naa a ni zwi ḓivhi uri ṋamusi kha ḽa Isiraele ho vhulawa mukololo a re muḓivhalea?+
39 Naho ṋamusi ndo vhewa uri ndi vhe khosi,+ ndi ḓipfa ndi si na nungo, vhenevha vhanna vha re vharwa vha Tseruya+ vha na tshiṱuhu tshihulu.+ Ngavhe Yehova a tshi lifhedza muitazwivhi u ya nga zwe a zwi ita.”+
Ṱhaluso dzi re magumoni a siaṱari
^ Sedzani Mutevhe Wa Ṱhalutshedzo Ya Maipfi.
^ Thevhedz., “maganda a zwiraḓo zwa vhanna vha Vhafilisita.”
^ Thevhedz., “koporo.”
^ Thevhedz., “vharwa vha songo lugaho.”