Bugu Ya Vhuvhili Ya Samuele 4:1-12
4 Musi Isibosete+ murwa wa Saulo a tshi pfa uri Abinere o fela ngei Heburoni,+ a kulea nungo, Vhaisiraele vhoṱhe vha tshuwa.
2 Ho vha hu na vhanna vhavhili vha langaho tshigwada tsha mavemu tsha murwa wa Saulo, muṅwe a tshi pfi Baana, muṅwe a tshi pfi Rekhaba. Vho vha vhe vharwa vha Rimoni wa Mubeerothe, wa lushaka lwa Benyamini. (Ngauri na Beerothe+ o vha a tshi vhalwa sa tshipiḓa tsha Benyamini.
3 Vhabeerothe vho shavhela Githaimi,+ vha kha ḓi vha vhatsinda henengei u swika na ṋamusi.)
4 Yonathani+ murwa wa Saulo o vha e na ṅwana we a vha o holefhala milenzhe.+ O vha e na miṅwaha miṱanu musi hu tshi vhigwa mafhungo a bvaho Yeseriele+ nga ha Saulo na Yonathani, muleli wawe a mu beba a shavha nae, fhedzi musi a tshi khou shavha o tshuwa, a mu wisa a holefhala. O vha a tshi pfi Mefibosete.+
5 Vharwa vha Rimoni wa Mubeerothe, Rekhaba na Baana, vha ya nḓuni ya Isibosete hu tshi khou fhisa nga masiari, vha mu wana o eḓela.
6 Vha dzhena nḓuni vha tshi nga vho ḓa u dzhia goroi, vha mu ṱhavha kha thumbu; Rekhaba na murathu wawe Baana+ vha shavha.
7 Musi vha tshi dzhena nḓuni, o vha o eḓela kha mmbete wawe kamarani yawe ya u eḓela, vha mu ṱhavha vha mu vhulaya, nga murahu vha mu tumula ṱhoho. Vha dzhia ṱhoho yawe vha tshimbila vhusiku hoṱhe nḓilani i yaho Araba.
8 Mafheleloni vha ḓisa ṱhoho ya Isibosete+ ha Davida ngei Heburoni, vha amba na khosi vha ri: “Kheyi ṱhoho ya Isibosete murwa wa Saulo swina ḽau+ ḽe ḽa vha ḽi tshi ṱoḓou u vhulaya.+ Ṋamusi Yehova u khou lifhedzela thovhela muṋe washu nga u vhulaya Saulo na vhana vhawe.”
9 Naho zwo ralo, Davida a fhindula Rekhaba na murathu wawe Baana, vharwa vha Rimoni wa Mubeerothe, a ri: “Ndi ana nga Yehova a tshilaho, we a ntshidza kha khombo dzoṱhe,+
10 musi muṅwe muthu a tshi mmbudza uri: ‘Saulo o fa,’+ a tshi humbula uri u khou nḓisela mafhungo avhuḓi, ndo mu fara nda mu vhulaya+ ngei Zikilaga. Eneo ndi malamba a muḓinḓa e a a wana kha nṋe!
11 Zwino hu pfi mini musi vhanna vhavhi vho vhulaya munna o lugaho nḓuni yawe e mmbeteni wawe! Naa a tho ngo tea u vhila malofha awe zwanḓani zwaṋu,+ nda ni fhelisa kha ḽifhasi?”
12 Davida a laedza vhaṱhannga uri vha vha vhulaye.+ Vha vha tumula zwanḓa na milenzhe, vha vha ṋembeledza+ damuni ḽa Heburoni. Vha dzhia ṱhoho ya Isibosete vha i vhulunga vhiḓani ḽa Abinere ngei Heburoni.
