Bugu Ya Vhuvhili Ya Samuele 7:1-29
7 Musi khosi Davida o no dzula nḓuni* yawe,+ Yehova o no mu awedza kha maswina awe oṱhe,
2 a amba na muporofita Nathani+ a ri: “Nṋe ndi khou dzula nḓuni ya miṱaululo+ ngeno Mbulungelo ya Mudzimu wa ngoho i tshi khou dzula denndeni.”+
3 Nathani a fhindula khosi a ri: “Ita zwi re mbiluni yau, ngauri Yehova u na iwe.”+
4 Nga honoho vhusiku, Yehova a ḓa a amba na Nathani a ri:
5 “Tshimbila u ye u vhudze mushumeli wanga Davida uri: ‘Yehova u ri: “Naa ndi iwe ane wa ḓo mphaṱela nnḓu ine nda ḓo dzula khayo?+
6 Ngauri a thi athu u dzula nḓuni u bva ḓuvha ḽe nda bvisa vhathu vha Isiraele ngei Egipita u swika ṋamusi,+ fhedzi ndo vha ndi tshi tendeleka ndi tshi bva fhano ndi tshi ya fhaḽa ndi denndeni.+
7 Tshifhinga tshoṱhe ndi tshi khou tshimbila na Vhaisiraele* vhoṱhe, naa ndo vhuya nda amba na muṅwe wa vharangaphanḓa vha tshaka dza Isiraele we nda mu vhea uri a lise vhathu vhanga vha Isiraele nda ri: ‘Ndi ngani ni songo mphaṱela nnḓu ya miṱaululo?’”’
8 Zwino amba na mushumeli wanga Davida uri: ‘Yehova wa mavhuthu u ri: “Ndo u dzhia u tshi bva pfuloni, u tshi tevhela sambi,+ nda u ita murangaphanḓa wa vhathu vha Isiraele.+
9 Ndi ḓo vha na iwe hoṱhe hune wa ya,+ ndi ḓo fhelisa maswina au oṱhe phanḓa hau;+ ndi ḓo ita uri u vhe na bvumo,+ vhunga vhaṅwe vhathu vha re na bvumo kha ḽifhasi.
10 Ndi ḓo ṋea vhathu vhanga vha Isiraele vhudzulo, vha ḓo dzula henefho vha si tsha thithiswa; vhathu vhavhi a vha nga ḓo dovha vha vha tsikeledza sa zwe vha zwi ita tshifhingani tsho fhiraho,+
11 u bva tshee nda vhea vhahaṱuli+ uri vha haṱule vhathu vhanga vha Isiraele. Ndi ḓo u awedza kha maswina au oṱhe.+
“‘“Zwiṅwe hafhu, Yehova o u vhudza uri, ane a ḓo fhaṱela iwe nnḓu ndi ene Yehova.+
12 Musi maḓuvha au a tsini na u fhela,+ u tshi vho fa, wa vhulungwa na vhomakhulukuku wau, ndi ḓo vusa ṅwana* wau ane a ḓo ḓa nga murahu hau, ndi ḓo khwaṱhisa muvhuso wawe.+
13 Ndi ene ane a ḓo mphaṱela nnḓu ine ya ḓo hulisa dzina ḽanga,+ ndi ḓo khwaṱhisa khuluṋoni ya muvhuso wawe u ya nga hu sa fheli.+
14 Ndi ḓo vha khotsi awe, ene a vha murwa wanga.+ Musi a tshi khakha, ndi ḓo mu kaidza* nga nḓila ine vhathu vha kaidza ngayo.+
15 A thi nga litshi u mu sumbedza lufuno lu sa shanduki vhunga ndo litsha u sumbedza Saulo,+ we nda mu bvisa phanḓa hau.
16 Nnḓu yau na muvhuso wau zwi ḓo dzula zwo tsireledzea phanḓa hau; muvhuso wau u ḓo vha wa tshoṱhe.”’”+
17 Nathani o vhudza Davida eneo mafhungo oṱhe na ḽeneḽo bono ḽoṱhe.+
18 Khosi Davida a ḓa a dzula phanḓa ha Yehova a ri: “Iwe Yehova Murena Muvhusahoṱhe, ndi tou vha nnyi? Nnḓu yanga i tou vha mini zwe zwa ita uri u nnyitele zwithu zwingafha?+
19 Zwa tou nga zwenezwo zwo vha zwi songo eḓana, Iwe Yehova Murena Muvhusahoṱhe, wo dovha wa amba nga ha nnḓu ya mushumeli wau ya tshifhingani tshi ḓaho; yeneyi ndi ndayo* ya vhathu vhoṱhe, Iwe Yehova Murena Muvhusahoṱhe.
20 Ndi mini zwine nṋe Davida nda nga dovha nda zwi amba, ngeno u tshi ḓivha zwavhuḓi mushumeli wau,+ Iwe Yehova Murena Muvhusahoṱhe?
21 Wo ita zwenezwi zwithu zwoṱhe zwihulu u tshi itela zwe wa amba, wa tendelana na zwine mbilu yau ya zwi funa.*+
22 Ndi ngazwo u muhulwane vhukuma,+ Iwe Yehova Murena Muvhusahoṱhe. A hu na ane a nga iwe,+ a hu na muṅwe Mudzimu nga nnḓa ha iwe;+ zwoṱhe zwe ra zwi pfa nga nḓevhe dzashu zwi khwaṱhisedza zwenezwi.
23 Ndi lufhio luṅwe lushaka kha ḽifhasi lune lwa nga vhathu vhau vha Isiraele?+ Mudzimu o ya a vha rengulula uri vha vhe vhathu vhawe,+ a ḓiitela dzina+ nga u ita zwithu zwihulu na zwi mangadzaho.+ Wo pandela dzitshaka na midzimu yadzo u tshi itela vhathu vhau vhe wa ḓirengululela vhone ngei Egipita.
24 Wo ita uri vhathu vha Isiraele vha vhe vhau lwa tshoṱhe;+ Iwe Yehova wa vha Mudzimu wavho.+
25 “Zwino Iwe Yehova Mudzimu, ngavhe u tshi itela mushumeli wau na vha nnḓu yawe zwe wa fhulufhedzisa misi yoṱhe, ngavhe u tshi ita vhunga wo fhulufhedzisa.+
26 Ngavhe dzina ḽau ḽi tshi huliswa lwa tshoṱhe,+ vhathu vha ambe vha ri: ‘Yehova wa mavhuthu ndi Mudzimu wa Isiraele,’ ngavhe nnḓu ya mushumeli wau Davida i tshi khwaṱhiswa phanḓa hau.+
27 Ngauri iwe Yehova wa mavhuthu Mudzimu wa Isiraele, wo dzumbululela mushumeli wau wa ri: ‘Ndi ḓo u fhaṱela nnḓu.’*+ Ndi ngazwo mushumeli wau e na tshivhindi tsha u rabela yeneyi thabelo.
28 Iwe Yehova Murena Muvhusahoṱhe, u Mudzimu wa ngoho, zwine wa zwi amba ndi ngoho+ na mushumeli wau wo mu fhulufhedzisa zwenezwi zwithu zwavhuḓi.
29 Ngavhe zwi tshi u takadza u fhaṱutshedza nnḓu ya mushumeli wau, i dzule i phanḓa hau tshifhinga tshoṱhe;+ ngauri Iwe Yehova Murena Muvhusahoṱhe, wo fhulufhedzisa u fhaṱutshedza nnḓu ya mushumeli wau lwa tshoṱhe.”+
Ṱhaluso dzi re magumoni a siaṱari
^ Kana “pfamoni.”
^ Thevhedz., “vharwa vha Isiraele.”
^ Thevhedz., “mbeu.”
^ Thevhedz., “ndi ḓo mu rwa nga ṱhamu.”
^ Kana “mulayo.”
^ Kana “tendelana na zwine wa zwi funa.”
^ Kana “muvhuso.”
