Bugu Ya Vhuvhili Ya Samuele 9:1-13
-
Davida u sumbedza Mefibosete lufuno lu sa shanduki (1-13)
9 Davida a ri: “Naa hu kha ḓi vha na muthu o salaho wa nnḓu ya Saulo ane nda nga mu sumbedza lufuno lu sa shanduki ndi tshi itela Yonathani?”+
2 Ho vha hu na mushumeli wa nḓuni ya Saulo we a vha a tshi pfi Tsiba.+ Ngauralo, Davida a mu vhidza, a mu vhudzisa a ri: “Naa ndi iwe Tsiba?” A fhindula a ri: “Ndi nṋe mushumeli wau.”
3 Khosi ya ri: “Naa hu kha ḓi vha na muthu o salaho wa nnḓu ya Saulo ane nda nga mu sumbedza lufuno lu sa shanduki lwa Mudzimu?” Tsiba a fhindula khosi a ri: “Hu kha ḓi vha na ṅwana muthihi wa Yonathani; o holefhala milenzhe.”+
4 Khosi ya ri: “U ngafhi?” Tsiba a fhindula a ri: “U nḓuni ya Maxiri+ murwa wa Amiele ngei Lodebara.”
5 Khosi Davida a ṱavhanya a ruma vhathu uri vha ye vha mu dzhie nḓuni ya Maxiri murwa wa Amiele ngei Lodebara.
6 Musi Mefibosete murwa wa Yonathani murwa wa Saulo a tshi swika ha Davida, a khotha o kwatamisa tshifhaṱuwo, a luvha. Ngauralo, Davida a ri: “Ndi iwe Mefibosete?” Ene a fhindula a ri: “Ndi nṋe mushumeli wau.”
7 Davida a amba nae a ri: “U songo ofha, ngauri ndi ḓo u sumbedza lufuno lu sa shanduki+ ndi tshi itela khotsi au Yonathani, ndi ḓo dovha nda u ṋea shango ḽa Saulo makhulu wau, iwe u ḓo ḽa na nṋe tshifhinga tshoṱhe.”+
8 Mefibosete a luvha a ri: “Nṋe mushumeli wau ndi tou vha mini, u tshi tou takalela nṋe ane a nga mmbwa yo faho?”+
9 Khosi ya vhidza Tsiba muḓinḓa wa Saulo ya amba nae ya ri: “Tshiṅwe na tshiṅwe tshe tsha vha tshi tsha Saulo na zwoṱhe zwa nnḓu yawe ndi zwi ṋea muḓuhulu wa muṋe wau.+
10 Iwe na vharwa vhau na vhashumeli vhau ni mu limele tsimu, ni kuvhanganye zwibveledzwa zwayo, zwi ḓo vha zwiḽiwa zwa muṱa wa muḓuhulu wa muṋe wau. Fhedzi Mefibosete muḓuhulu wa muṋe wau u ḓo ḽa na nṋe tshifhinga tshoṱhe.”+
Tsiba o vha e na vharwa vha 15 na vhashumeli vha 20.+
11 Tsiba a amba na khosi a ri: “Mushumeli wau u ḓo ita zwoṱhe zwine thovhela muṋe wanga a laya mushumeli wawe.” Ngauralo, Mefibosete a ḽa ṱafulani ya khosi sa muṅwe wa vharwa vha khosi.
12 Mefibosete o vha e na murwa we a vha a tshi kha ḓi vha muṱuku we a vha a tshi pfi Mika;+ vhoṱhe vha dzulaho nḓuni ya Tsiba vha vha vhashumeli vha Mefibosete.
13 Mefibosete we a vha o holefhala milenzhe+ a dzula Yerusalema, misi yoṱhe o vha a tshi ḽa na khosi.+
