Vhurifhi Ha Vhuvhili Vhu Yaho Kha Vhakorinta 9:1-15
9 A zwi ṱoḓei uri ri ni ṅwalele nga ha u thusa* vhakhethwa,+
2 ngauri ndi a ḓivha uri no ḓiimisela u thusa. Ndi zuwa nga ha inwi kha Vhamakedonia. Ndo vha vhudza uri inwi ni re ngei Axaya no fhedza ṅwaha no lugela u thusa. Vhunzhi havho vho ḓiimisela u thusa nga nṱhani ha u ḓiimisela haṋu.
3 Ndi ruma vhahashu uri zwi vhonale uri a ri khou sokou zuwa musi ri tshi ri no ḓiimisela u thusa. Dzulani no lugela u thusa, samusi ndo amba uri ni ḓo ita nga u ralo.
4 Arali nda ḓa na Vhamakedonia, ra wana ni songo ḓilugisa, ri ḓo shona ngauri ro vha ro ni fhulufhela. Na inwi na shona.
5 Ndi vhona zwo tea u ṱuṱuwedza vhahashu uri vha ḓe kha inwi hu tshee na tshifhinga, uri ni kuvhanganye zwe na fhulufhedzisa u zwi bvisa nga u ḓifunela, uri musi ri tshi swika ri wane zwo luga, zwi vhonale uri no bvisa nga u ḓifunela hu si nga u tou kombetshedzwa.
6 Samusi ni tshi zwi ḓivha, ane a zwala zwiṱuku u ḓo kaṋa zwiṱuku, ane a zwala zwinzhi u ḓo kaṋa zwinzhi.+
7 Muṅwe na muṅwe nga a ite zwe a phetha mbiluni yawe, a songo zwi ita o ṱungufhala kana nga u tou kombetshedzea,+ ngauri Mudzimu u funa ane a ṋea o takala.+
8 Zwiṅwe hafhu, Mudzimu u na maanḓa a u ni sumbedza vhuthu hawe vhuhulu, uri ni si shaye tshithu, fhedzi ni vhe na zwinzhi kha zwoṱhe zwine na zwi shaya, uri ni ite mishumo yoṱhe yavhuḓi.+
9 (Vhunga ho ṅwaliwa u pfi: “O ṋea zwinzhi;* o ṋea vhashai, u luga hawe hu ḓo humbulwa lini na lini.”+
10 Ene ane a ṋea muzwali mbeu nnzhi na vhurotho ha u ḽa, u ḓo ni ṋea mbeu a dovha a i andisa, a ni thusa uri ni vhe na mvelelo dzavhuḓi kha mishumo yaṋu yo lugaho.)
11 Mudzimu o ni fhaṱutshedza uri ni kone u ṋea zwinzhi. Vhathu vha ḓo livhuwa Mudzimu nga nṱhani ha zwine na zwi ṋea vhaṅwe.
12 Musi ri tshi thusa vhaṅwe nga yeneyi nḓila zwi vhuyedza vhakhethwa+ kha zwine vha zwi shaya, na u ita uri vhathu vhanzhi vha livhuwe Mudzimu.
13 Musi ni tshi ita zwenezwi ni sumbedza zwine na vha zwone, zwa ita uri vhathu vha rende Mudzimu ngauri ni khou tshila u tendelana na mafhungo maḓifha ane na a huwelela nga ha Kristo, ngauri ni sumbedza mafunda khavho na kha vhathu vhoṱhe.+
14 Vha ḓo ni funa na u ni rabelela kha Mudzimu, nga nṱhani ha vhuthu vhuhulu he a ni sumbedza hone.
15 Ri livhuwa Mudzimu nge a ri ṋea tshenetshi tshifhiwa tshi sa vhambedzwi na tshithu.