Maḽeaxi 1:1-14
1 Khaṱhulo ya Mudzimu ndi heyi:
Zwe Yehova a zwi vhudza Vhaisiraele a tshi shumisa Maḽeaxi* ndi hezwi:
2 Yehova u ri, “Ndo ni funa.”+
Fhedzi inwi na ri: “Wo ri funa nga nḓila-ḓe?”
Yehova u ri, “Naa Esau o vha e si mukomana wa Yakobo?+ Fhedzi ndo funa Yakobo,
3 nda vhenga Esau;+ nda tshinyadza thavha dzawe,+ nda ita uri ifa ḽawe ḽi vhe soga ḽi dzulwaho nga phunguwe.”+
4 “Naho Vhaedomo vha tshi ri, ‘Ro tshinyadzwa, fhedzi ri ḓo vhuya ra fhaṱulula mashubi ashu,’ Yehova wa mavhuthu u ri, ‘Ni ḓo fhaṱa, fhedzi nṋe nda wisa, ni ḓo pfi “fhethu ha vhuvhi” na “vhathu vho laṱiwaho nga Yehova lwa tshoṱhe.”+
5 Ni ḓo zwi vhona na ri: “Ngavhe Yehova a tshi huliswa shangoni ḽa Isiraele.”’”
6 “‘Ṅwana u hulisa khotsi awe+ na mushumeli u hulisa muṋe wawe. Arali nṋe ndi khotsi,+ khezwi ni sa nkhulisi?+ Arali ndi muṋe* waṋu, khezwi ni sa nṱhonifhi?’ Nṋe Yehova wa mavhuthu ndi amba na inwi vhotshifhe vhane na nyadza dzina ḽanga.+
“‘Fhedzi inwi ni ri: “Dzina ḽau ro ḽi nyadza hani?”’
7 “‘Nga u ḓisa zwiḽiwa* zwi re na tshika aḽeṱareni yanga.’
“‘Na ri: “Ro u tshikafhadza hani?”’
“‘Nga u amba uri: “Ṱafula ḽa Yehova+ ḽi a nengisa.”
8 Musi ni tshi ḓisa tshifuwo tsho swingaho sa tshiṱhavhelo, ni ri: “A zwo ngo khakhea.” Na ḓisa tshifuwo tsho holefhalaho kana tshi lwalaho, na ḓi ri: “A zwo ngo khakhea.”’”+
Yehova wa mavhuthu u ri: “Lingedzani u zwi isa kha muvhusi waṋu. Naa u ḓo ni takalela kana u ni sumbedza vhuthu?”
9 Yehova wa mavhuthu u ri: “Humbelani Mudzimu uri a ri sumbedze vhuthu. Naa u ḓo ri sumbedza vhuthu arali ri tshi khou mu ḓisela zwenezwi zwifhiwa?”
10 Yehova wa mavhuthu u ri: “Ndi nnyi kha inwi ane a tenda u vala mavothi?*+ Huufha na aḽeṱare yanga ni sa i fungi ni songo thoma na badelisa.+ A thi ni takaleli, na zwifhiwa zwine na zwi ṋekedza a thi zwi takaleli.”+
11 Yehova wa mavhuthu u ri: “Dzina ḽanga ḽi ḓo huliswa vhukati ha tshaka, u bva vhubvaḓuvha u swika vhukovhela.+ Fhethu hoṱhe hu ḓo dubiswa zwiṱhavhelo, zwifhiwa zwi ḓo ṋekedzwa dzinani ḽanga sa tshifhiwa tsho kunaho; ngauri dzina ḽanga ḽi ḓo huliswa vhukati ha tshaka.”+
12 “Fhedzi inwi ni khou nnyadza+ nga u amba uri, ‘Ṱafula ḽa Yehova ḽi na tshika, mitshelo yaḽo na zwiḽiwa zwaḽo zwi a nengisa.’+
13 Ni dovha na ri, ‘Zwi a netisa!’ ni zwi nukhedza no sinyalala,” u ralo Yehova wa mavhuthu. “Ni ḓisa zwifuwo zwo tswiwaho, zwo holefhalaho na zwi lwalaho. Ni ḓisa zwithu zwo raloho sa tshifhiwa! Naa ndi tea u zwi ṱanganedza?”+ u ralo Yehova.
14 Yehova wa mavhuthu u ri: “Hu semiwa ane a ita vhukwila nga u anela Yehova na u mu itela tshiṱhavhelo tsho holefhalaho, ngeno e na tshifuwo tshavhuḓi kha sambi ḽawe. Ngauri nṋe ndi Khosi khulu,+ dzina ḽanga ḽi ḓo vha tshimangadzo kha dzitshaka.”+
Ṱhaluso dzi re magumoni a siaṱari
^ Zwine zwa amba uri “Muḓinḓa Wanga.”
^ Kana “muṋe muhulu.”
^ Thevhedz., “vhurotho.”
^ Zwi khagala uri ndi mushumo wa u vala mavothi a thembele.