Maḽeaxi 2:1-17
2 “Inwi vhotshifhe, ndi khou laya inwi.+
2 Arali na sa nthetshelesa, zwa si vhe zwa ndeme kha inwi u hulisa dzina ḽanga,” u ralo Yehova wa mavhuthu, “Ndi ḓo ni rumela samba,+ nda shandula phaṱhutshedzo dzaṋu dza vha samba.+ Ngauri a ni khou zwi dzhiela nṱha, ndo shandula phaṱhutshedzo dzaṋu dza vha samba.”
3 “Nga nṱhani haṋu, ndi ḓo tshinyadza* mbeu ye na i ṱavha,+ ndi ḓo ni hasha khofheni nga matoko a zwifuwo zwine na ita ngazwo zwiṱhavhelo vhuṱamboni haṋu; na inwi ni ḓo iswa henefho.*
4 Ndi hone ni tshi ḓo ḓivha zwa uri ndo ni ṋea hoyu mulayo uri mulanga wanga we nda u vhofha na Levi u bvele phanḓa,”+ u ralo Yehova wa mavhuthu.
5 “Mulanga we nda u vhofha nae wo tsireledza vhutshilo hawe. Wa dovha wa ita uri a tshile nga mulalo. U a nṱhonifha nga nṱhani ha dzenedzi phaṱhutshedzo. Ho ngo takalela u ita zwithu zwine zwa ntsinyusa, ngauri o vha a tshi hulisa dzina ḽanga.
6 O vha a tshi amba nga ha mulayo* wa ngoho,+ ho ngo vhuya a amba zwithu zwivhi. O tshimbila na nṋe nga mulalo, o vha o luga,+ a ita uri vhanzhi vha litshe u ita vhuvhi.
7 Ngauri tshifhe u fanela u gudisa vhathu uri vha ḓivhe Mudzimu, vhathu vha fanela u mu vhudzisa nga ha mulayo,*+ ngauri ndi muḓinḓa wa Yehova wa mavhuthu.
8 “Fhedzi inwi no pambuwa. No ita uri vhathu vhanzhi vha si tevhedze mulayo.*+ No tshinya mulanga wa Levi,”+ u ralo Yehova wa mavhuthu.
9 “Ndi ḓo ita uri ni nyadziwe na u dzhielwa fhasi nga vhathu vhoṱhe, ngauri a no ngo tshimbila nḓilani dzanga, fhedzi no ita tshiṱalula ni tshi shumisa mulayo.”+
10 “Naa roṱhe a ri vhana vha khotsi muthihi?+ Naa a ro ngo sikwa nga Mudzimu muthihi? Zwino ndi ngani ri tshi shandukelana,+ ra nyadza mulanga wa vhomakhulukuku washu?
11 Yuda o ita vhukwila, ho itwa zwithu zwi nengisaho ngei Isiraele na Yerusalema; Yuda o nyadza Yehova, Ene ane a funa zwikhethwa,+ o vhinga ṅwananyana a gwadamelaho mudzimu wa mazwifhi.+
12 Yehova u ḓo fhelisa vhoṱhe vha re madenndeni a Yakobo vhane vha ita zwenezwi, hu sa londwi uri ndi nnyi, naho a tshi ḓisela Yehova wa mavhuthu tshifhiwa.”+
13 “Hu na zwiṅwe zwine na zwi ita, zwine zwa ita uri aḽeṱareni ya Yehova hu liliwe na u gomelwa, zwa ita uri a si tsha vha na ndavha na tshifhiwa tshaṋu kana u takalela naho tshi tshini tshine na tshi ḓisa.+
14 Inwi ni ri, ‘Ndi ngani?’ Ndi ngauri Yehova ndi ṱhanzi ya mulanga we wa u vhofha na mufumakadzi wau wa musi u tshee muswa, we wa mu shandukela naho e mufarisi wau, e mufumakadzi wa mulanga wau.*+
15 Naho zwo ralo, hu na vhaṅwe vhukati haṋu vhe vha ḓiimisela u sa ita zwenezwi, ngauri vha ṱoḓa u beba vhana* vha Mudzimu ngangoho. Vhenevha vha kha ḓi tenda u livhiswa nga maanḓa a Mudzimu. Zwino na inwi ḓiṱolisiseni ni humbule nga nḓila yo teaho. Ḓiimiseleni u sa shandukela mufumakadzi waṋu wa musi ni tshee muswa.
16 Ngauri ndi vhenga ane a ṱala,”+ u ralo Yehova Mudzimu wa Isiraele, “nda vhenga na ane a ita khakhathi,” u ralo Yehova wa mavhuthu. “Lindani muya waṋu, ni songo shandukelana.+
17 “No netisa Yehova nga zwine na zwi amba.+ Fhedzi inwi ni ri, ‘Ro mu netisa ngani?’ Nga u amba na ri, ‘Vhoṱhe vhane vha ita zwivhi vha khou ita zwivhuya maṱoni a Yehova, u a vha takalela,’+ kana nga u amba na ri, ‘U ngafhi Mudzimu ane a haṱula nga nḓila yo teaho?’”
Ṱhaluso dzi re magumoni a siaṱari
^ Thevhedz., “kaidza.”
^ Ndi fhethu hune matoko a zwifuwo zwa zwiṱhavhelo a laṱiwa hone.
^ Kana “ndayo.”
^ Kana “ndayo.”
^ Kana khamusi, “nga ndayo yaṋu.”
^ Kana “mufamakadzi wau wa mulayoni.”
^ Thevhedz., “mbeu.”
